Perumpamaan Suku Karo 01

PMS - 1. Kalungkang bagi si nantik la erluluk = Andingenna, si la banci jadi. Ndahi dahin si sia-sia. 2. Bagi santik kerahen = Kalak kerahen si malas, ndekah nanti gelah ndekah ngadi erdahin. Ikataken man kalak si ipedekah-dekahna urusenna gelah melawen ndahi dahin si kurang rincuhna ia ndahisa. Si des: bagi santik aron 3. Bagi si cecio bas sapo tarum ritik, deren bas asang darat. = Andingenna, ingan ernalem mberati. Umpamana sesekalak mindo penampat man kalimbubuna. Dungna itupu kalimbubuna e ia. 4. Balik-baliken bagi silan sarimunte = Silan sarimunte ngataken melias, mekelesa nina. 5. Bagi sarintangtang ndabuh kunamo, ise pe la tama demna, La ise pe la tama kurangna = Ikataken man kalak si bali nge ia ije bali nge lahang ibas sada-sada dahin. Idahina kalak la tama ngaruh, la pe idahina labo ukur kalak singgah... 

6. Ngayak metua sarudung la rembah. Sora sarudung bagi sora kalak roah. = Ikataken kempak singuda-nguda si lalap la tersereh enggo pe meteras entah pe pernanden si lalap la kedabuhen anak. 7. Bagi sarune buntu, dosa pekena maka reh cedana = Kerna sada-sada dahin si reh murdena akin ate ipesikap. 

8. Beluh-beluh mahat sukul sekin, adi la ermbalo labo nteguh = Andingenna, kuga beluhna pe sesekalak encari, adi lenga ia njabuken bana, pencarin la banci leket. La banci tangkel kinibayak. 9. Bagi seluk kisada, lalit si nulbasisa = Ngataken guru mehantu. Pernanden si la banci ertuah pe banci ibahanna kedabuhen tuah salu kinigurunna. 

10. La tertuai senggajah = (senggajah = kudin taneh si enggo metua). 11. Bagi batang sengseng, baun geluh-geluhna asang pate-patena = Batang sengseng mbau. Kenca mate urak bauna perbahan reh kerahna. 

12. Bagi serpu, telapen ikurna, isangna pe rising. Serpu bagi cibet, galangen asang cibet. = Ikataken man kalak si lebih kengna. Enggo pe ietehna bana salah ikengina denga. 13. Sigih-sigih bagi perdalan sige Tempas sige bagi gayo. Kitiken asang gayo. Perdalanna la kulebe tapi kusamping = Ngataken perdalan la mehuli, la tetap. 

14. Rimpes bagi tapin sige Ingan sige la bas lau galang tapi bas lau si rencah. = Ngataken iluh rimpes. 15. Bagi si ersigi, serapen beras, bening ras betah = Pedah galah beluh nerap-nerapken ukur. Umpamana sanga rukur susah, ula e saja rusur I peganjang. Adi ayo si macen saja rusur icedahken idandan tangkelen sebut, merkuanken kita pe kalak mbiar. Entah pe adi la ate erkai pe taren nginget-nginget si enggo melebur. Lampas kita majep. 

16. Kai sinanggel sininggel, bapa penggual, nande perdewal-dewal, nakan cukup (perdewal-dewal = perdiwel-diwel = guru sibaso). 17. Sider bagi rumah singgamanik. = Rumah adat biasana ngala kahe kolu. Perbahan singgamanik usur nai kepesengen, ikalih anak kuta pengala rumahna. Ngataken percibal sider. Pe biasa ipake ngataken si la mehuli, ketalun entah kegagelen. 

18. Ate muat sitek piah melitek = Ikataken man kalak si jumpa kerugin mbelin perbahan malar-malar untuk sitik. Lit ndung-ndungenna: Ate sitek piah melitek - Cuba erpasang nambahi utang. - Ate ise denga la lesek - Daging ise denga la kertang. (sitek = sitik) 

19. Bagi sue-sue, ernakanken angin. = Daging sue-sue mekerah, la erdareh, tempa-tempa angin nakanna. lIkataken man kalak si nganngur, inganna pe la erturin. Sumber : Buku Mutiara Hijau Budaya Karo. Penerbit  Balai Adat Budaya Karo (Sastra Klasik, Seni & Adat, Serta Pemerintahannya). 2012. Penyunting : Drs. Sarjani Tarigan, MSP. Foto : Grup FB Zona KalakKaro