ADAT KARO : NENGGET, ITANGKO/NGERAMPAS RAS PECAWIR BULUNGKEN

PMS DAIRI - Ibas sura-sura jelma nggeluh, maka sue ras kegeluhen kalak Karo adi jelma njabuken bana perayakenna ertuah bayak, sangap ras mejuah-juah. Ise sinikataken ertuah sangap, e jumpa matawari (anak dilaki) ras jumpa bulan (anak diberu). Sinikataken bayak enda la lit siganjang teruhen perukuren, kerina meriah ras sangkep teman nggeluh. Bayak namura, sada bukti maka ibas kalak Karo enda, adi enggo enterem kempu pendilo man bana "bayak" (arah Singalurlau ras Teruh Deleng), enda labo bayak erta entah "Sibayak", tapi ia enggo bayak jelma. Kerna sienda lenga bo tentu serta kerina jelma ibas kegeluhen enda. Perlebe maka sekalak jelma (bulangen ras ndehara) si enggo ndekah erjabu, enggo ka cukup nakan man pangan, rubia-rubia I mbal-mbal pe la gia melala tapi enggo lit, lenga jumpa tuah. 

Kerna pemere Dibata jumpa anak dilaki, anak diberu lenga seh kubas jabuna, entah lenga kin ia lit jumpa siapai pe, bagepe usur ka kepaten anak. Rikutken kesemalen kalak Karo maka sangkep nggeluhna kune lit kenca ibas sekalak jelma (jabu) jadi silanga seh bagi ukur, sangkep nggeluh labo sinik. Bali ia pihak kalimbubu entah pihak sembuyak, anak beru, idaramina nge usur dalan kuga maka kalak sierjabu enda seh sura-surana. Emaka ibas kegeluhen si adi, lit ikataken adi jelma lenga jumpa tuah perlu isengget, entah ibahan acara "nengget". 

Jadi nengget enda eme kalimbubu ras sembuyak simada jabu, bage pe anak beru siman senggetten kerina sangkep nggeluh enggo meteh kerina dahin enda. Janah rikutken kesemalen nggeluh ibas nengget, pihak kalimbubu ras temanna sedalanen enggo isuruhna anak beruna ersikap, lako nikapken pangan, gelah kari seh ibas jabu si man senggeten enggo kai pe lanai lit alangen. Bagepe isikapken uis arinteneng, uis kapal, tumba beru-beru, lau simalem-malem ras ose man sidilaki ras sidiberu.

Janah nengget enda, lit deba seh erkata gendang (tapi labo maba gendang man ikuten) sabab lit ka nge labo erkata gendang. Situhuna kal erti nengget ningen ijenda, eme ibas wari si enggo itentui pihak kalimbubu ras sangkep nggeluh siman senggeten enda reh ku jabu siman senggeten alu la ia betehen sitik pe. Isuruh sada-dua kalak perlebe ku rumah bagi kalak kirumah ku patoken entah kalimbubu, sembuyak entah anak beru, tapi si mehuli jabu biasa. Perlebe enda sekalak teman sindeherkal ras ia, labo jadi hubungen ras ia, janah la ia medaram 'uga maka reh jelma sienda'

Jadi sanga ercakap-cakap, rempet reh arah pudina jelma nggurjih' entah ngentur papan, deba icabin-cabinina lau meciho ibas gantang beru-beru, deba ibas mangkuk, janah adi lit kin ndai gendang enggo sikap deher-deher rumah e. Pengelako jelma singgurjih ndai pe ia engo me sengget, jenari reh ka jelma nocoi ia Biasana sinocoi enda biak turangkuna, sitatapen pe labo banci, apai ka adi ngerana-ngerana. Ijenda icocoi turangkuna me ia, nina "Jera tendindu, jumpa anak dilaki ras diberu, adi lang lanai kita rebu". Tupung icocoi enda adi lit kin ndai gendang enggo ipalu, ersurak-surak jelma ibas rumah. Seh kal ia senggetna "Kai kin ndai e, uga kin e ndai maka bagenda", ersurak jelma radu pe sora gendang erbolo-bolo.

Mintes reh sekalak tua-tua, "Labo kai pe ndai anakku, pejuah-juahken nge kami reh". (Biasana, adi nai ibas acara nengget enda, siman senggeten buen nge merawa, "Kai kin nge ndai lepak kami, uga kin maka bage". Emaka iterusken ranan, "Kerehen kami anakku gelah kam jumpa tuah pemere Dibata simbelin, jumpa matawari ras jumpa bulan kam".

Kenca dung ia isengget, isambari uisna, emaka iban me percakapen, nina: "Lanai bo kai pe man tangkelen anakku, nakan pe enggo sikap ibaba kami". Emaka rakat man kerina ras jabu siman senggeten enda. Jadi teridah ijenda maka geluh kalak Karo enda, adi kune lit dah sangkep nggeluh kekurangen ibas sembuyakna, maka nina man anak beruna "Uga nge siban kalimbubundu ah".

Emaka adi sinen ibas sada kesemalen kalak Karo kema "nengget enda, situhuna dahin enda encidahken kesadan perarihen maka sempa kerina kerma pengaloken pemere Dibata, eme matawari ras bulan sue pedah kalimbubu paksa erjabu ndube. Adi enggo seh akapna masana, lalap ka la jumpa, adi si nuria, kitik belinna nge la ietch, lang uga pa  reh nge kalimbubu nengget. Arah enda teridah lit pengarapen, mbera-mbera ibas erdejep pusuhna e, robah padanna, robah pengindona kejumpan tuah ia.

Ibas acara nengget enda perpulih kalimbubu wari pepagina, mintes arih sangkep nggeluh maka sue ras geluh kalak Karo maka bicara la gia lit siertunggu niakap patut pe igalari. Lang bicara gia la ibereken simulih sumpit kalimbubu, labo lit kuga nina kalimbubu ras sangkepna, tapi rikutken semal kalak Karo maka dat sangap, adi reh kalimbubu entah anak beru iban simulih sumpit (dasar simulih sumpit, eme: beras piher, sira, gula ras tualah).

Ibas ngikut sindai lit usur ikataken batu simalem (duit), kema buena iagak nge usur kerna perbahanen kalak sipehuliken kita, iagak pe maka la banci ia kutangen. Usur pe iban ibas bilangen 6 (enem), 11 (sepulusada), 21 (duapulusada) sue ras kesemalen kalak Karo. Janah ibas sie, maka kenca teridah perkuah ate Dibata, rikut kata padanna, jumpa tuah ia. Tentu iban ka me kerja mesur-mesuri, maba tinaruh mbentar ku jabuna. Adi tuah si pemena ibereken Dibata anak dilaki, maka enda pala-palai ka uga erbahansa maka lit ka kerja sikupudina si ilakoken ukut (bapa-nande), guna ndahi kalimbubu.

Reh me nande-bapa ku jabu kalimbubu, ningen "Tangiskal usur beberendu enda eda, beberendu e turang, termama-mama nina kuidah tupung ku sungkun simeteh wari, emaka embahken sitik nakan beberendu e". (Entah ningen pe "Reh kami tupung paksa ngelegi beras man nakan beberendu e". Ibas umpuen dahin ndahi kalimbubu enda me maka lit ka ibas kita Karo jadi "perjabun pecawir bulungken". Perban termama-mama entah terbibi-bibi si anak ndai usur, maka jadi cawir bulung.

Nai pe kalimbubu me menai reh maka ia jumpa tuah, terlebih adi anak dilaki ka, nina orang tua "sangap kalimbubu" e kal me atena. Erkiteken si e me idahi usur kalimbubu, ningen ndahisa "Termama-mamakal beberendu turang, beberendu eda, emaka embahken ka sitik nakanna". Adi enggo usur termama-mama, tentu rukur kalimbubu, kai nge ate turangkuna ras silihna, bage me atena. Adi reh kalimbubu embahken nakan beberena, maka nande si dilaki pe labo ka lupa mereken nakan permenna. Emaka lit ka nge usur kebiasan kalak Karo, adi kune beberena melawen erberas (torah ipenna), ilegi beras ku jabu kalimbubu.

Bage pe adi melawen ka erdalan, lalap la njingkang beberena, isuruhna ka kalimbubu naruhken tebu ku beberena jadi cikenna. Rikutken si enda me kerina, maka kalimbubu simupus enda, entah kalimbubu secara umum, usur kal ikataken bagi Dibata, isebut Dibata ni idah. Maka ikataken bage iakap maka tempa-tempa kalimbubu e simada toto maka seh kal kejuah-juahenna anak dilaki enda. Situhuna kal, gelah katana ula itogan, gelah kai sinibelaskenna ipake anak beruna, emaka ningen Dibata ni idah.

Tuhu adi sinen turi-turin kiniteken Karo, labo enggo isuruhDibata ras pe iberekenna hak man tinepana seri ras ia gerlarna, kita nge erbahansa bage, emaka lanai bo man belasenken "Kalimbubu e Dibata ni idah". Bage ka pe bicara anak diberu si tubuh kenca isengget e, tergangen ka sora nande anak enda melasken kata ku anak beruna. nina "Idah kena nge permen kena ah... kadih ngindetkal kap rusur, manai nge sijemput beraslah gia itaruhken kena man kanna"?. Mintes nina bibina: "Ue, eda, labo ate kami bage genca, tangko kami nge ate kami, maka ise lanai muatsa!" Pe Erkiteken sienda me maka lit ka nge "kerja itangko entah irampas" ningen e.

Ndigan ras katawari dahin enda iban, inen me usur keadaan si anak, bagepe umumna anak siman tangkon enda entah siman rampasen enda. Adi kitik-kitik denga ia, adi anak dilaki entah anak diberu usur "ngindet", emaka gelah pedas madan pinakit itangko me anak ndai, entah lit pe kalak ngatakensa "irampas". Adi anak dilaki sanga pepinemken usur maringgalahen, isuruh itangko mamana. Adi anak diberu, isuruh itangko bengkilana. Kenca itangke enda arah sangkep nggeluh ibahan hubungen maka ula sempat tersengget entah kidaram bapa nandena. Paksa itangko kentisik saja,reh me persuruhen ndai nungkun, "lja anakndu kadih?".

Nenna lanai ije, tentu sekalak jelma seh kal senggetna, sabab ndai kin pe seh kal nge ia teraanna tuah, enda enggo ka itangko ningen, emaka serko belin nge ia. Nina persuruhen: "Enggo anakku, pejuah-juahken nge kerina, i rumah edandu/berundu anakndu ndai". (Anak dilaki i rumah mamana, anak diberu i rumah bibina). Emaka ningen: "Enggo.... Enggo, ula ukur sangkut". Adi engo bage, adi kin ndai pepinemken denga anak ndai, maka ibaba me nande-bapana ku jabu kalimbubu/anak beru, tading ije 4 (empat) berngi. Rikut gerek-gereken maka iakap enggo salang sai 4 berngi arus nande-bapana tading i rumah kalimbubu/anak beru.

Adi kune anak ndai enggo perehken belinna, ije me jadina perjabun pecawir bulungken, gelah enggo lit singempoisa, lanai lit sinangkosa. Teridah man banta maka arah kebiasan-kebiasan Karo, si i mulai ibas nengget, itangko - irampas, idungi entah ipuncai ibas perjabun pecawir bulungken. Bagem kesemalen-kesemalen si adi enda rikut jadina pecawir bulungken ibas kalak Karo. Iban perjabun igalari utang rikut adat perjabun. Enggo ia erjabu tapi la ibaba ku jabu si dilaki, sura-sura pe gelah sehat-sehat ras mejuah-juah nggeluh.

Alu litna acara enda kerina, jadina perban lit kekurangen-kekurangen ibas jabu, tole pe age maka puas nggeluh, lit ka pe arah gerek-gereken, ija idarami usur dalan maka jadi kerja-kerja, gelah lit tetap hubungen si mehuli ras sangkep nggeluh, terutama ras kalimbubu. Ibas jelma sienggo cawir bulungken, ise lebe erjabu, ia rutang. Adi sidiberu leben ngengkar ibas nganting manukna ikataken "Enda nai enggo jelma kami" nina bibina, man sangkep singempoisa. Emaka ngaloi me anak beru tua bapa sierjabu, "Kam teman sembuyak sedalanen kalimbubu kami, ibas mbarenda pecawir bulungken me pejuah-juahken nge ndube ateta?". Enda pe gelah mejuah-juah pepagi permenta njabuken bana;

"Enggo me ieteh kalimbubu e ras permenta e, gelah seh ka pagi sura-sura impalna sitadingkenna, galarna pagi utangna". Sabab adi sidiberu lebe sereh utangna : bulang-bulang entah tengkuluk (barang siman pakenken anak perana sinitadingken). Bage ka pe adi sidilaki leben empo, rutang ka nge ia. Tupung kerja maba manuk, nina biak mama-mamina (singalo ulu emas), tupung isungkun kerna kesenangenna maka anak beruna (beberena) empo ku jabu sideban, nina: "Enda ndube enggo ia empo ku jabu kami!". Nina anak beru tua ngaloisa, "Tuhu, payo ia enggo erjabu ku jabundu, tapi ibas ialo-alo kam ia mbarenda, ma ertoto lampas mbelin-rate ngena jelma sienterem man beberendu e?".

Tanda beberendu e enggo ngikutken padanna, erjabu ia ku jabu sidebar galarna pagi utangna maka anakndu pe pagi seh ka sura-surana Utang sidilaki man impalna, eme barang-barang paken bagi gonje, tudung entah uis langge-langge, ragi barat banci saja. Em pe adi jelma Karo enda adi erjabu ia (anak dilaki) seh asa gundari metenget ia, ija usur ikataken: "Uga ngenda, ma kujenda nge ndai kalimbubu singlo ulu emas?". Ijabab "ku jenda". Adi kujenda "cuba dage sungkun ia, me entabeh ras meriah atena beberena erjabu ku jabu kalimbubu kami?".Enda lanai lupa-lupa anak beru ngeranaken si e, entah mawen lit utang idona-maka ije itungguna.

Em pe sabapna anak beru singerana tupung perjabun arus ia mesimet, ija ikataken: "Ope teridah kesenangen kalimbubu kami ras kami anak beruna, kalimbubu singalo ulu emas lebe sungkun kerna beberena atena muat beru ku jabu kalimbubu kami enda, uga sura-surana?". Maka isungkun pe enda, gelah teridah entah mawen nai enggo lit acara kerja pecawir bulungken ras sidebanna. Eme pe dasarna maka seh genduari isungkun sura-sura ras kesenangen kalimbubu simada dareh kune ate beberena erjabu ku jabu kalak, sabap ije hakna denga.

Bage ka me kerna tersereh, ope ikataken kalimbubu kesenangen atena anakna erjabu, labo ia metersa ngataken meriah ukurna, adi la ka kin isungkunna lebe ukur bibina. Maka bage iban, entah mawen enggo ndube iserehken anakna kujabu anak beru, entah lit ka janji-janji permenna erjabu ras anakna, ijenda hakna denga. Kerna kesenangen kalimbubu simada dareh (ulu emas), ras sirembah ku lau (bibi sidiberu), situhuna cukup erdasar. Ia ndube ngembahsa tupung pepitulauken, enggo itukurna perembah beberena/permenna, janah rikutken adat ia kin punana, emaka la banci lang isungkun me kesenangen ukurna lebe.

Di kune kesenangen ukurna enggo icidahkenna emaka banci sidilaki empo, ras si diberu sereh ku kalak. Bage me dage, kerna nengget, kegunan nengget ras aturennengget ndai ras irampas, bagepe pecawir bulungken seh ka ia enggo mbelin njabuken bana atena lit nge hubungenna kerina gelah mesimet kita adi kita ikut ngerungguken ranan kalimbubunta.

Sumber : Buku Ranan Adat , Pdt. Sada Kata Giinting Suka, M.Th