ADAT KARO : NAMAKEN TULAN-TULAN KU SEMIN

PMS DAIRI -  Jelma si mate cawir metua, ikuburken me ia rikut adat cawir metua (nurun-nurun), adi noria ibahan kerjana imbal-mbal, erlige-lige, Bage pe adi mate nadingken tegun lolo (lenga erjabu anak ipupus kerina) ikuburken ka me ia rikutken adat "sapu-sapu iluh", Janah tole adi mate ia tupung anak perana / singuda-nguda / danak-danak ikuburken me ja rikutken adat kematen "mengga-mengga", Bage me kenca enggo ndekah ia ikuburken/itamaken, ersura-sura me sangkep nggeluh erbahan inganna terulin. Dahin enda banci igelari 'namaken tulan-tulan ku semin' entah 'ngampeken tulan-tulan ku geriten' ...

Adi ikataken namaken tulan-tulan, tentu inganna seh bara ngenca simeganjangna, tapi adi ngampeken tulan-tulan, inganna ganjangen asa bara jelma (biasa ikataken ingan enda geriten). Ibas kerja namaken tulan-tulan ku semin, maka ibahan me runggu adat, guna ndatken wari mehuli dingen nentuken curak kerja (erkata gendang tah la ergendang), Adi enggo ikataken namaken tulan-tulan ku semin, enda

tergolong kerja 'lanai mambur iluh', tapi ikataken kerja mehuli. Adi enggo kerja mehuli tentu bali ras acara cawir metua, sukutna enggo me banci rose (gia ndube matena nadingken tegun lolo/singuda-nguda/anak perana), Ibas ngurkuri tulan-tulan, ikurkuri ku juma, arus ikut kalimbubu simada dareh.

Emaka adi kita kin kalimbubu símada darch, arus metenget, janah asa ngasupta pe inget-inget ija anak berunta ikuburken. Sabap seh i juma, sue ras kesemalen kalak Karo, "Kam kalimbubu kami 'sukut' enggo kam ije? Kam kalimbubu kami simada dareh enggo me kam ije kerina?. Adi enggo ije emaka nina anak beru: "Labo ate kami nuruh kam kalimbubu, tapi gelah meter kari dat berku-berku anak berundu enda, cangkul!! Ija kin kuburen anak berundu ndai? Cangkulken dage!!". Seh kal beratna ngelaksanakenca di kune la sieteh ija ingan kuburen anak berunta. Emaka bicara gia lanai inget, adi enggo ipuduni, inget-inget, adi la eteh sungkuni anak beru ope si e.

Iban kalimbubu simada dareh me totona, nina: "Ula ngeliwer, mekuah atendu anak ipupusndu ras kami kerina, kam anak beru kami sinikurkur, mislah kari jumpa silatihndu e berkundu ndai anak beru kami, impal!!". Je maka icangkulkenna 4 (empat) kali. Minter me erpenggejap anak beru sukut enda, nina "Enggo cangkulndu 4 x selpat me kari si la bagi ukurta, enta... kalimbubu, kami ndungisa". Adi la ka ikataken man kalimbubu, mintes ka icangkul anak beru, janah kalimbubu simada dareh la isuruh nangkulsa, emaka banci ka turah keguluten.

Enggo kari dat berku ndai, adi ikataken "ija kam simada dareh aloken berku enda!". Banci saja jabapna "La kapen enda" nina ka. "Lang nindu e nge!", nina anak beru. Jabap kalimbubu "Ja nge e, sabap aku mbarenda metehsa", nina ka. Em sabapna maka jadi kearusen ibas kalak Karo tang-tang nangkul e, labanci lang 4 kali lebe icangkulkenna maka iterusken anak beru. Kenca dat tulan-tulan, enggo iidah, emaka nina anak beru "Sikap kam kalimbubu, aloken berku-berku anak berundu ndai". Jadi

sada kewajiben ka adi kita ndube ngembahsa ku lau, kita ndube saksina ia reh ku pertibi e guna ngidah wari terang, emaka berku-berkuna pe kita ka me kalimbubu simada dareh ngalokensa alu erdua tan.

(Cataten: Nai-nai kal adi kalak mate lit karatenna serpi sada, ras tanna sikawes-kemuhen tersada serpi jadi perpatungna ibas perdalinenna. Perban lit siman ayaken serpi pirak, emaka anak beru pe ergiah-giah ngurkursa, sabap man bana me kari serpi ndai, jadi upah. Adi gundari lanai lit serpi enda ndai ibas babah kalak mate, emaka megati ka siidah nina kalimbubu "nen buni-buni kalimbubu kena ndai". Tupung e iamburkenna duit receh Rp. 100,- jadi gancih serpi pirak ndube.

Tuhu adi nai 3 serpi pirak seh kal belinna, sabap upah ngemo pe sada wari pe sada tali ngenca. Piah dungna adi gundari siidah, lanai bo anak beru ngurkursa, tapi enggo ipejawaken,  ipetebaken entah ipupahken. Engkai maka bage?, rukur kita kalak Karo. Kenca ialoken kalimbubu simada dareh berku-berku anak beruna, ibabana ku ingan pulung ingan kundul. Jenari berku-berku e ibereken ka man anak beru sipatut erdahin guna murihisa. Dung iburihi, emaka iuras alu lau penguras ras lau kuning gersing. Itama ku kotak, ibaba ku rumah entah ku jambur ingan pulung.

Nai adi jelma itama ku semin, lit amakna, lit mangkukna ibas semen ndai, jadi luahna ku jabu simbaru. Si enda kerina bicara la pe lit labo isagali. Adi gundari lanai bo iban adum si e, sabap labo niakap perlu. Bicara leben pe itama ku semin entah ibaba ku rumah, acara namaken tulan-tulan enda iban bagi jelma ibas mate cawir metua. Kuga ndube nguburkensa kalak cawir metua bage kang iban acara, gia ia sekali mate anak perana, entah nadingken tegun lolo.

Adi tulan-tulan enggo pindah ku ingan simbaru, enda acarana lanai acara ngambur-ngamburken iluh, tapi tangis tawa janah enggo tergolong kerja mehuli (cawir metua gia tupung mate nguda denga ia). Teridah arah dahin enda maka perubahen acara jadi acara cawir metua labo lit hubungenna ras kiniteken sidekah tapi enda pelin-pelin kekelengen ras teragak ukur.

Adi ikataken nadingken tegun lolo, penguburenna uga pa pe lalit kalak sinuntut, bicara umbut saja pe pangan, guna penggalarutang, janah utang man kalimbubu "sapu-sapu iluh" dingen la pe mbaru uisna la jadi soal. Tapi adi igelari ia ndube mate nadingken tegun lolo, di enggo ban seminna simbaru, enda lanai banci ate-ate, arus iikuti aturen adat. Sue ras kalak Karo, kerna maneh-maneh enda ras morah-morah, iana bagi kalak man, labo perburihen tubuhna ndube jadi perburihen asa sendah.

Bage me pe utang adat, gia ras morah-morah tupung sanga enggo igalari maneh-maneh penguburen, di kune iban ka ingan simbaru (ngangkat tulan-tulan) igalari denga ka nge utang adatna enda. Gelarna lanai utang adat tapi sienda igelari "belo kinapur si enggo mate". Engkai maka bage? Sabab adi anakna pe ndudurken perisapen nge nandangi sangkep nggeluh terlebih man kalimbubu, tentu si mate pe seh ka nge belo kinapurna.

Enda salah sada alat komunikasi encidahken kinihamaten ibas geluh kalak Karo, ija kalak silenga sitandai pe ikapuri nge belo. Jadi kalak Karo ibas nehken maneh-maneh entah morah-morah pe bagi kalak man. Piga kali ia man ase ka lit perburihenna. Ibas si mate-mate pe, piga kali lit kerjana, ase nge ipedalin utang adatna. Ibas perdalinen mane-maneh ras morah-morah ibas kalak Karo adi iangkat tulan-tulan itama ku semin, gia mbarenda enggo igalari utang adat tupung mate, ibas ia erbahan kerja mengket semen ningen e, ia pe iergaken janah kalimbubu pe iergaken alu nggalari utang adat.

Ijenda perlu kal anak beru beluh ngerana, sabap di maneh-maneh ningen e banci nina kalimbubu simada dareh "Kami mbarenda enggo ialoken kami". Bagepe di morah-morah ningen "Enggo ialoken kami nina puang kalimbubu". Emaka nina anak beru sukut enda "Ija anak berundu mengket rumah limbaru kalimbubu kami, gia ndube utang adatna enggo sai man kalimbubu, tapi bage pe erdalin nge usur belo kinapur anak berundu e, emaka ibas wari sendah erdalin ka me belo kinapurna nandangi kam kalimbubu ras puang kalimbubu kerina.

Uga ndube ia ibas nggeluh, ibas ia lawes kubas ingan simbaru enda pe bage ka ngenda ipedalin". Kenca pulung kerina kalimbubu ras puang kalimbubu, bicara gendang ndai enggo dung gendang sukut, emaka pelandek me kerina kalimbubu ras puang kalimbubu. Adi arah kenjulu erkata gendang kin ndai, e sanga landek e me ibereken belo kinapurna ndai. Sada nari ngenca ije ikataken kalimbubu "Ibas bage ukurndu mehuli, engo me ialoken kami.

Bage gia me labo kami ngenca kalimbubundu ergaken kam? Jelma ertakal la ernahe pe labo banci muit, ernahe la ertakal la dorek rukur, kami gia enggo ipehaga kam kalimbubundu ras puang kalimbubundu, pisau entelap, manuk mblan ndu e, me inget kam nge belo kinapur kalimbubundu nandangi anak beruna?". Je cirem anak beru arah pudi ah..." Inget puangta kepeken kita, bage nin sapih-sapih ia.

Em pe ningen usur, ibas kalak Karo lalit iperajang sisa ido e. Adi ia enggo iagaken selaku kalimbubu, ergakenna ka anak beru anak beruna e eme anak beru minterina. Adi erdalin belo kinapur man kalimbubu, berupa uis entah bulang-bulang, man anak beru pe aruska ngenda erdalin eme: adi dilaki sekin ras santikna, janah adi diberu kampil ras tuktukna. Ibas nehken belo kinapur man kalimbubu ras puang kalimbubu,

ikataken: "Ibas wari si sendah sue kata tenah kami ma bandu kalimbubu ras puang kalimbubu, bage pe ras sangkep nggeluh kerina, e maka kalimbubu kami, em kap anak berundu sidilaki/sidiberu enggo piga-piga tahun ia iakap anakna ras kami anak beruna medem denga.

Sekali enda ia enggo ipekeke, itama sendah ku inganna simbaru em kap itama ku semin. Maka ibas sie kalimbubu, ersurasura me kerina anak berundu, em sambar gancih mama ras mami sidilaki sidiberu, lako nehken belo kinapur orang tua kami, nandangi kam kalimbubu ras puang kalimbubu. Ija kari sehna sienda, ibas belo kinapur orangtua kami enda, belo kinapur mama ras mami, lit nge kari siman ogen-ogenndu ras temanndu sendalinen, eme batuna batu simalem, gelah ieteh kam kari arih-arih kalimbubu, sabap enda me belo kinapur orang tua kami enda isehken kami ku kam kerina kalimbubu ras temanndu sada dalanen.

Sura-sura kami tampeken kami ku barandu kam kalimbubu ras puang, alu arapen ija kari sampe belo kinapur mama ras mami ku barandu, tampe dolat aging singal babahndu ngajarken beluh kurang anak berundu, em kalimbubu kami ras kami anak beru minterindu".

Emaka iterusken anak beru ngerana: "Me enggo banci itamaken kami?". Jenari itampeken uis ndai. Ibas nampekensa maka arah kenjulu ije pe teridah maka labo iperajang sisa ibas kalak Karo, emaka nina man kalimbubu: "Uga enda mama nandangi temanndu sedalinen, kam nge ngelakenca ku bara sembuyakndu e entah kami anak beru minterindu?".

Nina kalimbbu, “E kamlah, gelah seri penampeken kerina kami kalimbubundu". Jenari itamaken. Kenca dung maka iulihken ka ku ingan uis (simada dareh). Je menurut cakap adatna "Enggo ndai tampe ku barandu belo kinapur orangtua kami si dilaki ras sidiberu, eggo tampe sinal babahndu ngajarken gegeh kurang anak berundu e ras kami anak beru minterindu. Cuba dage sarsarken belo kinapur mama ras mami, gelah ije kari narsarna singalah daging, gelah mejuah-juah kam kalimbubu, mejuah-juah anak berundu e ras kami anak beru minterindu".

Emaka, kenca dung isarsarken, iogena batu simallemna, tapi lanai bo banci ia mindo tambah bagi biasana. Kenca bage, adi kalak metia kin ia, emaka erlebuh me ia nandangi pertendin si mate, nina: "O Bengkila/Impal/Bibi/Turang, sekali enda kuidah kam mengket rumah simbaru i taneh kemulihen, teridah me kesempan arih kesadan cakap anakndu sidilaki ras sidiberu.

E labo bage anak beru kami. ngarak-ngarak nge pertendindu i taneh kemulihen i taneh kesunduten nari, ngajari, nuturi me kam ku penggejapen anakndu gelah tetap ia bagi gelang sada tariken, timah sada penuangen, gelah ula papak teridah kami la beluh kalimbubundu, ula pagi juru kallimbubu darehndu". Jenari iterusken kalimbubu ngerana: "Kam pe bage me anakku, bapa mamana, kempu nini bulangna, kinihamatenndu enggo me ialoken kami, malem ate kami kalimbubu ras puangndu.

Dage sekali nari ipindoken kami kerina, gelang sada tariken kam, timah sada penuangen, berkisen bunga baban ku tiga kam, mejile nina kalak kenjahe, merim nina sikenjulu, lalit pandangen nina kepultaken, kesunduten, gelah teridah kami pagi beluh kalimbubundu, sangap kami nehken toto".

Mejuah-juah.

Suma siwah nggara sepuluh

Labo tertatap sibulung ndap-ndap

Sanga perliah ula perpusuh

Ola merangap tupung ersangap

Ntabeh gule taruk ni jambe

Tama selambar bulung sere

Pertemue kita erkade-kade

Janah melumbar kita mere

Sumber : Buku Ranan Adat , Pdt. Sada Kata Giinting Suka, M.Th