ADAT KARO : MEREKEN NAKAN SIMALEM-MALEM MAN ORANGTUA

PMS DAIRI - Teridah maka kenca orang tua cawir metua, usur ka sakit-sakit, ije me iban acarana mereken nakan simalem-malem man orang tua. Isina dahin enda, maka kesusurenna enggo pasrah, adi banci min mekuah ate Dibata ula sempat ipesui orang tua enda. Enda me inti dahin ku jabu orang tua, maba nakan simalem-malem. Labo gelah malem pinakit, labo ka gelah pedas berkat, tapi gelah ula suhsahina jelma sienterem, ia pe la rete mesui nggeluh. Ibas kerehen anak-anak ras kempu-kempu enda, ije orang tua enda 'erpadan', bagi pertubuh: ...

ise lebe ngidah wari terang, ia me lebe berkat. Totona: "Ula kal kucikenken anakku ras kempu-kempu ku e entah ente-ente/entah ku e". Arah si reh mereken nakan simalem-malem enda nge lit ranan, adi siman dahin enda gia la ia ngerana tapi isadarina nge maka adi maba nakan ningen e, enggo me ietehna maka arah totona, ikatakenna: 

"Enggo bujur kukataken man sinursurku e, anakku, kelangku, permenku, kempungku, enteku, entahku", (la gia ia berbelas maka ibas ukurna erpadan nge ia "ise lebe reh ku pertibi, e lah lebe berkat ku taneh kemulihen ku kesunduten). Dahin enda labo lit hubungenna ras nunggah-nunggahi lau meciho. Sabab adi nunggah-nunggahi lau meciho ibas kita Karo, e jadi kune lit permasalahen, perbahan siganjang teruken ibas rukur.

Emaka katawari saja pe ibas kita kalak Karo banci jadi, umpamana i rumah sakit : adi enggo mengkak-engkak jelma, biasa ibas kita Karo alu lit simbabaisa ranan: "Dibata kap menda simeteh si kutera pe, tambar enggo menda eak anakku, tunggahi lau meciho bapanta e, gelah uga gia perdalan bapanta, meciho perukuren, ula pusuhndu rembek-itambarken embek mandangi kami".

Em pe sabapna ibas jelma mupus adi ndekah ibas rawisen, lit terjadi purpursage alu nunggahi lau meciho. Kalak Karo kune terjadi kepiceten rukur, minter iban sada keputusen 'purpursage alu nunggahi lau meciho' enda. Ula min lit pusuh er-embek-embek di kune gia kari itadingkenna kita. Emaka biasa jelma adi mberat pinakitna, i rumah sakit, i rumah pe, e nari nge sieteh sada tambar simbelin "itunggahí lau meciho", jjem iban toto. Sabab adi megermet kita, tereteh nge íbas anakna e apai usur simurbitna.

Situhuna ibas paksa e hubungen darch enggo ngerana, radu ras pengakun simbages. Makna nunggahí lau meciho, eme purpursage. Ibas kalak Karo enda lit sada si mejile, eme purpursage. Purpur ningen e erbahansa si la mehuli si la erguna ibuang ras sage ningen e 'iperata', ikenditken (isagei). Bage ka pe dahin enda, labo ka ikataken mesur-mesuri kalak sienggo metua, sabap dahin mesur-mesuri enda ibahan man kalak (jabu) si sanga natang tuah (4 entah 7 bulan) danak-danak ibas ertin denga.

 
Kedungenna, maka ibas mereken nakan simalem-malem enda labo enda iteremken kal, bias kuh sangkep saja, pulung kalimbubu ras anak beru kerina. Pangan simalem-malem enda isulangken alu pergancihen kerina. Lit ka pe iwakili anak sintua saja nulangisa, ikut arah pudi kerina anak-anak, sabap latih kari iakap orangtua enda, emaka sekalak ka mewakili anak beru ras simewakili kalimbubu.
 
Rirang, rirang gumpari
La melus bunga sapa
Sirang, sirang gundari
Lalap menda la lupa

Sumber : Buku Ranan Adat , Pdt. Sada Kata Giinting Suka, M.Th