"Enda mama, mami. impal nina turangku, ersura-sara kami beherendu impalndu sidilaki-sidiberu maka isambari kani menda uis ras tudung nande. Enda nungkan kami mama, mami ibas sura-sura kami, enggo kap kami tampak kerina uga ngenda nindu mama-mami bas wari si sendah enda? Adi bengket sura-sura kami, gelah cinder kam kari mama ras mami gelah sipetunggung nande beru Karo enda?”
laloi Kalimbubu: "Kerma sura-surandu nehken kehamaten man nandendu, malem kul ate kami enggo ipersentabindu kami, lakoken anakku, gelah itatap kami uga pertunggungna nandendu e ibas kam nehken sura-surandu e kam bebere kami sidilaki-sidiberu.
Anak Beru: "Adi enggo meriah ukur kalimbubunta ras puangta ibas sura-surandu e kalimbubu, peseh dage kehamatenndu nandangi turangku".
Anak Sidilaki, sekalak mewakilisa: "O, Nande, kami anakndu sidilaki-sidiberu, permenndu-kelandu ersura-sura nambari uisndu gelah sambar perukuren jenda nari ku pudi, sambar reh ulinalah".
Baju iendesken permain, jenari kampuh/gonje iendesken anak si diberu (kata-katana banci itambahi).
Anak Beru: "Enggo kap ipeseh kam kalimbubu kami baju turangku, gonje ipeseh permen/impal kami sidiberu kerina, tudungna ras langge-langgena kam me nampekenca Kalimbubu".
Idilo Kalimbubu simada dareh ras puang kalimbubu dareh janah itampekenna nina: "Emaka itampeken kami me tudungndu (bibi/turang) tampelah rejeki, tampe dolat dagingndu, kami pe tampe ka kejuah-juahen ras rejeki kami ras permen/kempu-kempundu e".
Jenari itampeken Puang kalimbubu ka uis langge-langge, sinikataken biasa uis pengalkal, janah nina: "Ngalkal lah kam usur rukur bibi/turang, itaka pagi la mbera beka, itektek she menetna la mbera retap, bagem bibi, paguhlah kam rukur ibas bujur ngepkep anak/kempu sienterem enda, Dibata masu-masu geluhta kerina". (mulih ku inganna).
Kenca dung itampeken tudung ras langge-langge, ngerana orangtua (nande), nina :
"Anakku, kam kerina sidilaki ras sidiberu, bage pe permain ras kela entah bebere kami, ras kempu kerina si enggo erjabu – si lenga erjabu, malem kal ateku anakku, malem kal ate tendingku ngaloken kerehenndu, totonku ku Dibata gelah kam kerina sirasilah ibas pendahinndu, gelang sada tariken, timah sada penuangen kam ras silih-turangndu e. Ola sipanjang – punjuten anakku. Bagepe bagi si isuraken kam pengkebet kempu-kempulentah e pagi ibas geluhna ibabo pertibi enda, luahndu sidilaki-sidiberu pe lalit sirogana ibs pusuhndu, enda me katangku, bujur, mejuah-juah".
Kenca anak-anak dung mereken ose, tudung ras langge-langge man nande, emaka minter tedis Anak Beru, janahna ngerana : "Ambah-ambah enggo idah kam kerina kalimbubu terus ku puang kalimbubu, kerna sura-sura beberendu nandangi orang tua, ibas wari mehuli sendah, radu pe ras nangkih-nangkihna matawari enda, kerina anak-anakndu nina turangku, subuk sidilaki bage pe sidiberu radu ras kempunndu, ente-entahndu rikut pe kalimbubunta, sembuyakndu kerina, ras anak berundu, ngendesken ciken ras tuktuk man bandu erkiteken kam enggo metua".
Tedis kempu sidilaki ras kempu sidiberu :Kempu sidilaki njemak ciken Kempu sidiberu njemak kampil/tuktuk.
Tupung ngendeskensa, nina : "Ibereken kami ciken enda Nini Karo man bandu, ciken enda nigelari kami ciken pangguh, maka paguhlah kam ngepkep kami, ula kal pagi la megegeh tendindu nerusi kegeluhen enda, kai pe sinursurndu enteguh ras paguh tendi kami ras kerina sangkepta nggeluh".
- iendesken ciken ras tuktuk –
Ngerana orangtua, nina: "Ibas iberekenndu cikenku anakku, maka ciken endalah ciken ku nggeluh, ula kal aku pagi enteku enterem, ercikenken anak ipupusku kempungku pantang rebu ndube padanku anakku, emaka mekuah ate Dibata anakku, bugis-bugis kam kerina, bagi ciken tebu enalah, reh tuana reh tebuna babandu nggeluh epagi kerina".
Anak Beru: "Tole nari lit denga ka nge ate kampu-kempu enda si man berenkenna man Nini Karona, kai kin e, enda kempu-kempu reh maba luah tebu perlanja galuh (ban laguna, odak-odak ras salihken kari ku mejuah-juah). "Keleweti Nini Karo kena e, gelah malem atena nggeluh".
Kenca ngadi landek nina kempu: "Eaak, Nini Karo Tudung, adi enggo lit cikenndu, ciken pangguh kam pekena kami kerina, gelah bagi ciken tebu enda, reh tebuna pagi, baban Bapa kami e, Bengkila kami e, ras kerinana, kam pe reh cawirna metua, gelah ula pagi bagi tebu tengah kesain kami kempundu, Karo, galang terbuntang-buntang, galang terawir-awir".
Anak Beru: "Enggo ipeseh kempu-kempu katana, ras arapenna man Nini Karona, malem kal atena pe nggeluh, sangap kap ia, melala pencarin enggo icariken ambah si e lit nge sura-sura turangku man anak sidilaki ras anak sidiberu bage pe kempu-kempu si enterem".
Nina Nini Karo : "Ibas kam enggo nehken kekelengen ras kehamaten man bangku o anakku, kubahan ka ateku ngena-ngena ateku man bandu, mari reh kam kerina, lebe anakku sidilaki ras permain kerina jenari anakku sidiberu ras kela (beberengku) kerina".
Sada-sadai iban kata janah ngendeskensa (uis kapal man anak sidilaki/permain, uis beka buluh man anak sidiberu/kela). Man kempu-kempu i-ambur-ambur duit.
Ngerana Orangtua, nina: "Kam kerina ibas kiniulin ngergaken aku, kam pe kerina ankku sidilaki ras sidiberu, kela-permain, bagepe kempu-kempu ras entah. Man bandu kempu kami ula gutul, tutus ate nggeluh, kam anakku seri nge kam sidilaki ras sidiberu, ula sipanjang punjuten, ula pagi cidahken kalimbubunta la beluh, ula cidahken aku nandendu enggo metua, la beluh ncibalken ranan, tapi cidahken pepagi perarihen persadan perukurenndu lako man jile-jile nandangi sangkep nggeluh kerina.
Kam kempu-kempungku reh kam ndai mbaba tebu perlanja galuh, kam pe bage kalah min pagi, ula bagi tebu tengah kesain, gedang terawir-awir, galang terbuntang-buntang, tapi bagi tebu datas uruklah kam pepagi, reh tuana reh tebuna babandu nggeluh, dingen bagi galuh berneh-berneh lah kam pagi anakku, ikeleweti anakna pagi indungna, la mbera bengkayaten, la mbera bengkeruten em totonku man bandu kerina".
Kenca dung acara mereken uis, nampeken tudung ras langge-langge, dingen mereken ciken ras tuktuk, ipalu gendang sekali, ope si e nina Anak Beru:
"Ambah-ambah enggo idah kami kerina kalimbubu, puang kalimbubu, sura-sura beberendu nandangi orang tua, nande itengah-tengah jabu, enda sura-sura manuk mbulanndu – piso entelapndu, kalimbubu kami sidilaki ras sidiberu, enda tole lit denga ka sura-sura kalimbubu kami (Turangku beru Karo) nehken utang adatna ibas ia megegeh denga nandangi kam kalimbubu ras puang kalimbubu.
Nina ndai turangku beru Karo man kami ras beberendu, di enggo bage sura-surandu erbahan simehuli man bangku, sangapkap kalimbubunta kerina, aku pe anakku lit kal nge bekas ku encari ras silihndu/bapandu ndube, utang adat man kalimbubu ras puang kalimbubu dareh kami, gelah ija pepagi la payona ibas kam turangku ras permenndu e tupung aku berkat denggo, gelah sanga kuidah denga, tupung kam nambari uisku kubereken ka ateku utang adat man kalimbubu". Ma meriah me ukurndu ngalokenca, kam kalimbubu ras puang kalimbubu ....?"
(Timai lebe jabab kalimbubu ras puang kalimbubu).
"Adi meriah kin, sipaluken sekali gendang perpulungen radu ras si e mari kam perkolong-kolong kami babai kami ibas sura-sura kalimbubu kami".--- palu gendang---
Kenca dung gendang, kundul kerina kalimbubu, puang kalimbubu,jenari reh anak sidilaki-sidiberu ras orangtua maba uis maneh-maneh ras morah-morah (uis ilipat-jenari itama batu raja, biasana asa erga tukur ras man bebere ibas paksa perjabun), alu pembabai anak beru nina:
"Enda me uis tangkel dunut turangku enda, isehken kami menda man bandu kalimbubu kami, bagepe man puang kalimbubu dareh, sabap adi enggo sai utang nggeluh, sura-sura turangku nggalari maneh-maneh ras morah-morah man kalimbubu. Bagepe la kap ketadingen uis ate keleng man kalimbubu ras puang kalimbubu dareh silih ndube sienggo leben nadingken kita. Uis enda dalin-dalin nge ngenca kalimbubu, maneh-maneh sikata tuhu emekap beberendu sidilaki ras sidiberu sambar gancih silih ras turangku man kuda dalanndu, man pengentasenndu manuk bulan ndu kam kalimbubu.
Tapi bage gia erkiteken turangku enda pe beluh ngelitken bana, mbuah ndube page nisuanna, merih manuk niasuhna, emaka lit kari si man oge-ogenndu batu simalem, ban kari arihndu ras sembuyak seninandu, adi kurang kari kalimbubu ula kam biar-biaren". (biasana ipindona tambah emaka terahir bereken jelma). Kenca dung pertaktaken ras kalimbubu, nina kalimbubu :
"Adi enggo ipeseh kam sura-surandu nggalari utang adat, maneh-maneh ras morah-morah man kami kalimbubundu, kami pe ersura-sura ngenda tetap mereken nakan, beras sada tuldak man bibinguda, nandendu, gelah kam pe kerina ras pencarinndu buat-buat enda salih jadi dua, dua salih empat, empat salih jadi waluh gelah beluh kam pagi erpengaruh kerina, erganda-gandalah pagi rejekeindu".
(Utang kalimbubu ras puang eme duit sitik ras adi lit uis mbiring icabinken).
Emaka ijujungina beras piher/beras meciho alu bulangen sepulusa (11) nina :
(1) Sada, pagi perukurenndu kerina kesusuren turang kami
(2) Dua, ula ras sangkep nggeluh
(3) Telu, teldus me pagi sila bagi ukurta
(4) Empat, selpat banga kelesa, selpat liah-liah
(5) Lima, ertima pepagi rejeki, cawir kam metua
(6) Enem, gelem pagi ulihndu latih ras anakndu e bage pe kempu-kempu kerina
(7) Pitu, pitut pagi babah kalak ngerana sierbahansa pecah perang sirongkak-rangkik ku jabundu
(8) Waluh, erpengaruh pepagi geluhndu ku kawes ku kemuhen, sider kubertengna
(9) Siwah, wahken pagi nipi gulut, nipi jahat, nilah pepagi si la mehuli
(10) Sepuluh, nuluh pepagi perbahanen kalak si la mehuli
(11) Sepulusa, dienggo salang sai dahin enda, ersada ukurta, ersada pagi cakapta
(amburken beras man anak-anak).
Sumber : Buku Ranan Adat , Pdt. Sada Kata Giinting Suka, M.Th
Tidak ada komentar:
Posting Komentar
Mohon Tinggalkan Pesan