ADAT KARO : MEREKEN BULANG-BULANG RAS TUDUNG MAN ORANG TUA RAS NGGALARI UTANG ADAT MAN KALIMBUBU

PMS DAIRI - Ibas sada perbapan-pernanden lit denga si dilaki ras si diberu, erkiteken sangap ia mupusken anak dilaki ras anak diberu, janah enggo ka dung perjabun anak si dilaki ras si diberu, bage pe enggo ka enterem kempu, meteh mehuli ka kerina si anak, permain ras kela pe erpengagak, kempu si enggo erjabu pe meteh mehuli ka, ije ibahan me perarihen guna mereken ose, bulang-bulang ras tudung man orang tua. Jadina dahin enda, kenca sue percakapen anak si dilaki ras anak si diberu (ndehara ras perbulangenna). Idahina me orang tuana (sempa ia), nina "O Bapa, nande, o bibi, bengkila, mama-mami, bugis-bugis kami kerina ras kempundu, maka ate kami min isambari kami anak ipupusndu sidilaki ras sidiberu ras kempundu e uisndu, gia la mehuli, bulang-bulang bapa ras tudung nande ...".

Di lit kenca cakap si bage ibas anak ipupus nari, e situhuna bicara la gia mintes ilakoken, orang tua enda ciremkal pusuhna duana, meriah ukurna teridah, megah akapna perban enggo ialokenna bekasna latih gia alu rencana denga. Emaka nina orang tua enda, "Sibar ja kal nge sura-surandu Bage pe kam anakku si diberu ras kela kami, sibar ja ka sura-surandu? Sibar uis kami kal nge ngenca isambarindu?".

Rukur anak si dilaki ras si diberu, emaka nina: "Di ate kami sibar bage me, tapi uga nindu?".

Nina tole orang tua, "Di enggo pala bage sura-surandu, sangap ipepulung-pulung kami, adi bage kin sura-surandu kap kalimbubunta kerina, kami pe kap lit nge bekas kami encari sipepulanglah kalimbubunta ras puang kalimbubunta. Kami pe ibereken kami ka ate kami utang adat kami man puang kalimubunta, gelah ija pepagi la payona ibas kam ras silihndu e ras permain tupung aku berkat denggo, gelah sanga kuidah-kaidah denga lebe, kami pe orang tuandu sidilaki ras sidiberu ibas sura-surandu nambari bulang-bulang na tudung nandendu, bereken kami ka ate kami utang ada kami man kalimbubu.”

Emaka ibas sura-sura anak nambari ose, bulang-bulang ras tudung orang tua, mintes jadi ije 2 kerja, eme: ariken ka nggalari utang adat "maneh-maneh', ras "morah-morah man kallimbubu mas puang kalimbubu. Sabab ukuren ibas kita Karo (adat kenjulu), ibas igalari maneh-maneh ras morah-morah banci idalanken adi enggo erjabu kerina anak si dilaki ras si diberu, bage pe enterem kempu, banci isehken aminna pe megegeh denga.

Cuma ibas si e reh ka nina orang tua, "bage gia ningkami orangtuandu akapndu gia kerina me lit nge perpayona?". Adi lit kin, emaka jadi ibas runggu idilo kerina kuh sangkep. Siterpentingkal maka ibas runggu enda, kalimbubu singalo maneh-maneh ras singalo morah-morah la banci la ije

Ibas orang tua enda kari di enggo itentuken warina, maka adi terjadi sura-sura anak mereken bulang-bulang mas tudung nande bagepe si orangtua itumpak-tumpak anakna dilaki ras diberu nggalari utang adat man kalimbubu ras puang kalimbubu, sipemena lebe idalanken eme kema utang anak man orangtua nambari bulang-bulang ras tudung, jenari makana nggalari utang adat.

Ibas ia nambari ose orang tua, emaka anak-anak perlebe arus maka ia mindo kata persentabin man kallimbubu si mada darah ras puang kalimbubu dareh, nina "Enda mama, mami, ersur-sura kumi beberenda si dilaki ras si diberu maka isambari kami menda uisna, bulang-bulang ras tudungna. Enda nungkun kami mama ibas sura-sara kami e bicara kami beberendu  ras anakndu bage pe beberendu si diberu ras sidilaki bas kami tampak kerina uga ngenda nindu  mama, mami ibas wari si sendah?" Adi bengket kin sura-sura kami, gelah itama kami, di lang cinder kam mama ras mami, gelah sipetunggungken bapa ras nande!".

Nina kalimbubu ngaloisa, si arah bapa ras si arah nande, "Malem ate kami kata persentabinndu anakku, kam namakensa, kami natap-natap, gelah itatap kami uga pertunggungna bapandu-nandendu ibas kam mereken sura-surandu e kam bebere kami si dilaki ras si diberu".

Adi enggo bage nina kalimbubu, enggo lit hak anak mbulangi bapa ras nudungi nandena.

Ibas mereken bulang/tudung orang tua ndai, secara umum iwakili anak si dilaki, anak si diberu ras perbulangenna jadi singayuken ranan. Tupung ngendesken labo ia gedang ngerana, saja nina: "O Bapa, enda nande, kami anakndu si dilaki ras si diberu permendu ras kelandu e, ersura-sura nambari uisndu kam orang tua kami, gelah gia sambar perukuren ijenda nari ku pudi, sambar reh ulina lah. Emaka iampeken kami me bulang-bulangndu bapa tudungndu nande, gelah min ibas sura-sura kami ndube e, tampe rejeki, tampe dolat daging kulandu, kami pe tampe kejuah-juahen ras rejeki kami radu ras kempundu e".

Teridah maka arah itampeken uis enda, lit pengarapen maka Dibata ngampeken rejeki, ngampeken kejuah-juahen, tampe dolat daging singal babah.

Kenca itampeken anak-anak bulang man bapa, tudung man nande ngerana me si pihak orangtua, "Anakku kam kerina dilaki diberu, bage pe permain ras kela entah bebere kami, ras kempu sienggo erjabu ras si lenga erjabu, malem kal ate kami, malem ate tendi kami, ngaloken kerehenndu. Kami pe ertoto me ku Dibata gelah kam kerina serasilah ibas pendahinndu, gelang sada tariken, timah sada penuangen kam ras silihndu-turangndu, ula sipanjang-punjuten anakndu pe kerina bagi siisurakenkam pengkebetna ibabo pertibi enda gelah arah pengkebet kempu, anakndu dilaki diberu pe lalit sirogana ibas pusuhndu. Em ningkami anakku.. Mejuah-juah Bujur”

Ranan orang tua situhuna labo perlu gedang, di enggo reh nambari uis orang tua, isi rananna:

Ertoto orang tua gelah sada perarihen anak

Totoken gelah dat kejuah-juahen

Totoken maka jumpa rejeki

Totoken ersada cakap, singal babah, masin ranan ni belas.

Kenca dung anak-anak mereken ose, tudung nandena ras bulang bapana, emaka mintes tedis anak beru, janahna ngerana, nina : "Ambah-ambah enggo idah kam kerina mama, sura-sura beberendu nandngi orang tua si dilaki ras si diberu, enda sura-sura manuk -mbulanndu - piso entelapndu, kalimbubukami si dilaki ras sidiberu,

enda tole lit denga ka sura-sura kalimbubu kami enda nehken utang adatna ibas ia megegeh denga nandangi kam kalimbubu ras puang kalimbubu".

Biasana pe adi enggo bage nina anak beru, lanai bo lit togan-togan kalimbubu ibas sura-sura nggalari utang adat enda. Kin pe enggo me teridah man kalimbubu maka sangap anak beruna nggeluh, jumpa tuah anak dilaki ras diberu, bage pe kempu-kempu enggo ka enterem.

Kerja sibagenda simejilena idalanken kenca lanai lit iakap sitading, enggo pulung kerina kalimbubu ras puang kalimbubu. Emaka biasa nge iban kenca enggo elah man. Kenca pulung kerina, ngambahi ranan anak beru, sukut ras sangkepna pe ngerana, la pe kari ngerana kalimbubu siiberken utang adat enda ndai. Saja adi nggeluh denga jelma ibas ia nggalari utang adatna siman kalimbubu, uis labanci ikirah-kirahken, arus ibas lipaten ia, la banci isarsarken pe.

Batu simalemna pe labo banci ipunjut, tapi itama ibas lipaten uis. Dahin enda dahin erjile-jile, emaka banci nge kalimbubu ras puang kalimbubu mindo tambah batu simalemna. Alu kata gendek ngerana orang tua entah ikataken arah anak beruna kerna sura-surana, nina : "Enda me uis si ingan tangkel dunut kami, seh ken kami me man bandu kalimbubu kami, bage pe isehken kami man puang kalimbubu dareh, sabap kap igalari maneh-maneh ras morah-morah man kalimbubu. Uis enda dalin-dalin nge ngenca kalimbubu, maneh-maneh sikata tuhu eme kap beberendu si dilaki ras si diberu sambar gancih kami man kuda dalanndu, man pergentasenndu, manuk mbulanndu kam kalimbubu Tapi bage gia erkiteken kami pe beluh ndube ngelit-ngelitken bana mbuah ndube page nisuan, merih manuk niasuh, lit kari siman oge-ogenndu batu simalem, ban kari arihndu ras sembuyak seninandu kerina, adi kurang kari kalimbubu ula kam biar-biaren".

(Adi nai, situhuna kal batu simalem enda, asa tukur sada jelma. Tukur jelma tupung e secara umum simeganjangna Rp. 60,- Rp. 60,-- enda nai adi itukurken lembu, dat nge 4 (empat) lembu pergereta alu duit enda. Genduari uga ...!! Perlu iukuri mbages-mbages).

Jadi adi enggo si uen, ialoken anak beru simada dareh enda ndai me uis ndai bage pe ras batu simalem-malemna. Labo maka mintes iogena, tapi ermomo ia lebe, nina: "Kam teman kalimbubu kami sendalenen, labo ndobah kalimbubu bena-bena, kalimbubu tua, kalimbubu siperdemui, enda enggo kuidah reh sembuyak kami anak berundu, teman kami sendalanen ku kalimbubu kami enda, mari si nen entah kai kin kari ndia isi uis enda ndai?".

Kerina perbahanen anak beru enda ndai encidahken maka la persekalaken geluh kalak Karo, la sada punana. Emaka nina kalimbubu, "Adi kam anak beru kami, enggo me ras kami ije, talangi!".

Jenari maka italangi, ibuka me, janah ikataken bilangen duit batu simalem ndai. Nina anak beru, "Iberekenna empat puluh enem, uga nindu kam kalimbubu kerina?". Nina kalimbubu ngaloi, "Kami sierkakalah sungkun". Ijenda adi rikut biasana kalimbubu simajek daliken me isungkun lebe, sabap ia me kaka. Nina ka "Uga nindu kam sembuyak kami, endam kuidah itama anak berunta empat puluh enem rupia buena, uga siakap?". Jabap simajek daliken "Megegeh kap anak berunta e, nai-nai nari, begiken Dibata nge totonta, sangap ia encari, anak pe kerina sangap nge encari, tambah nindu!".

Emaka ngerana anak beru "Batu simalem ndai, enggo me toge kalimbubunta, lenga bias, tambahi nina kalimbubunta!". Adi bage nina, maka arus ka itambahi. Ikataken anak beru maka enggo itambahi dingen idemi seh enem puluh rupiah. Nina anak beru "Enda enggo isehkenna enem puluh, uga nindu?". E ngerana denga ka kalimbubu, "Duit enda la erbias-bias, tah bias tah kutera, bicara enggo pe itambahi lenga bias".

(Ibas lenga bias nina e, lanai bo duit tangkelen kalimbubu e, tapi jelma. Emaka idarami ka, entah kempu silenga empo). Emaka ibereken perisapen, nina anak beru "To anakku, dahi ninibulangndu, mamandu, impalndu, aku tambahna ndai si la bias ndai nindu!". Nina anak beru "Ena tambahna ndai". Jabab kalimbubu "Enggo ate kami malem, enda maka enggo bias".

Ibas kalak Karo rikutken geluhna ras adatna labo teridah pusuhna dingen labo ieteh ia merangap, emaka enggo pe cukup iakapna, lenga bias nina, gelah reh jelma. Sabap adi duit enda, reh pagi atena reh kang, tapi adi jelma sienggo ibereken e, enggo ipanjari, emaka nina: "Emaka enggo bias".

Arah Karo kenjulu, man kalimbubu dareh igelari 'maneh-maneh' man puang kalimbubu dareh, igelari 'morah-morah'. Emaka biasa ibas jelma mereken maneh-maneh usur isehken uis selambar ingan tangkel dunut bapa/nande, mama/mami. Uis sada lembar e kite-kite me ngenca, tapi singikut maneh-maneh nandangi kalimbubu ras sembuyakna, eme enterem kempu-kempu, enterem anak-anak jadi sambar gancih bapa/nande, jadi kuda dalin, piso entelap, terakap pusuh peraten metedeh. Sabap erti maneh-maneh e, eme kiniergan bapa sini endesken ku kalimbubu. Dalin ngenca uis, tapi anak-anak e kerina jadi barang-barang simeherga. Maneh-maneh situhu-tuhu eme sinitadingkenna, siniendesken man kalimbubu.

Bagepe man puang kalimbubu igelari morah-morah'. Ertina ibas morahna ate erkiteken lawes orang tua (adi enggo mate) morahna ate erkiteken enggo lanjut usia, emaka anak-anak e pagi jadi morah-morah, mbera sangap puang kalimbubu ngajarken beberena, terakap pusuh morah pagi anak-anak e sambar gancih bapa/nande. Uis sada lambar kite-kite morah puang kalimbubu ngenca, anak-anak me situhuna teragah pusuh morah puang kalimbubu kerina.

Adi tupung nggeluh denga igalari utang adat, sue ras kesemalen kalak Karo ibas kalimbubu ngerana ngaloi cakap anak beruna, arus nina: "Kami pe ersura-sura ngenda tetap mereken nakan, beras si sada tuldak man anak beru kami, orang tuandu, gelah kam pe kerina ibas pencarinndu, buat-buatenndu salih jadi dua, dua salih - empat, empat salih jadi waluh, gelah beluh kam pagi erngaruh kering, erganda-gandalah pagi rejekindu".

(Utang kalimbubu silang-langna, nakan siman pangan tupung dahin enda. Duit labo lit ibahan. Biasa ka pe ibahan kalak uis icabinken).

Rikut kesemalen maka adi lit dahin sibagenda rupana, la banci lang ijujungi beras piher entah beras meciho. Adi kalak metia dingen muri, gia enda igelari man nakan pangan, tapi tupung ngendeskensa alu ijujungken beras piher gelarna man singgalar utang ndai. Sabap tep-tep kalimbubu mereken nakan ku anak beru, arus pe ijujungken ku takal. Rikut kesemalen adi pernanden njujungken beras piher, arus alu bilangen sepulusa (11), alu pengertin:

(1) Sada, pagi perukurenndu kerina

(2) Dua, ula sipenduan ukur ras sangkep nggeluh

(3) Telu, teldus me pagi sila bagi ukurta

(4) Empat, selpat banga kelesa, selpat liah-liah

(5) Lima, ertima pagi tendi ni rumah, cawir kam metua

(6) Enem, gelem ulihndu latih ras anakndu e bage pe kempu-kempu kerina

(7) Pitu, pitut pagi babah kalak ngerana sierbahansa pecah perang sirongkak-rangkik ku jabundu

(8) Waluh, erpengaruh pepagi geluhndu ku kawes ku kemuben, sider kubertengna

(9) Siwah, wahken nipi gulut, wahken nipi jahat gelah nilah pepagi si la mehuli

(10) Sepuluh, nuluh perbahanen kalak entah man manusia ntah man begu

(11) Sepulusa, dienggo salang sai dalin simbelin, ersada tendi ku rumah, ersada perukuren, ersada pepagi cakapta kerina.

Mejuah-juah, mejuah-juah, mejuah-juah, nina: janahna ngamburken beras meciho man jelma sienterem.

Ntebu tuhu rambe ni baba

Baba luah ku Namorih

Nggedang ate nande ras bapa

Adi anak ersada arih

Cataten:

(Adi enggo i galari utang adatna man Kalimbubu sanga ia nggeluh, kune reh pagi paksana orangtua lawes ndahi Dibata, nggalari utang adat enda lanai iban. Adi lit kin kalak mindo ka, alu kata "Tep-tep man arus nge erburih", nina, e enggo lanai pas, enggo teridah kerangapen nggeluh).

Sumber : Buku Ranan Adat , Pdt. Sada Kata Giinting Suka, M.Th