PMS DAIRI - DILAKI. BULANG-BULANG BEKA BULUH, Gambaren anak raja, singasup mereken pertimbangen si bujur ras ukur pinter (garis-garis mbentar) ngataken si benar mempertahanken hak (garis-garis megara) ibas mperjuangken kepentingen umum alu la mbedaken cibal nggeluh. UIS BEKA BULUH. Sinitamaken i bas bara, ngataken maka wari enda berubah menda ali-ali jadi cengkok-cengkok, gambaren pasu-pasu Dibata singarak-ngarak kegeluhen, nemani langkah-langkah nggeluh tetap sehat, mejuah-juah ras ukur kalak jahat la reh kubas dirinta labo mara reh ibas kegeluhen enda.
IBEREKEN GONJE, "Uis gatip jongkiten" rupana mbiring maka simakesa ietehna njaga pantang kemali ibas geluh enda. Ijagana maka ula sangkep nggeluh jumpa kemalun. ISANGKETKEN KAMPUH KADANG-KADANGEN, ertina gelah erpengakui ia man sangkep nggeluh (senina, anak beru, kalimbubu) sada min pengarapenna ibas merga silima, e maka arus me ia ertempi, erkanting, erjujung, la siganjang teruken ibas kegeluhen enda.
PISO, perlambang maka ia ras sembuyakna e banci jadi piso entelap kalimbubu man perkentasenken kalimbubu si la erpilih. CIKEN, mereken kengasupen ibas kegeluhen enda seh kubas ujungna cawir metua, jadi tua-tua geluh, tua-tua tebu reh tuana reh tebuna.
SIDIBERU. Ipasangken me TUDUNG rupana mbiring, bentuk segi tiga, antusenna, kerina sangep nggeluh kalak Karo eme kalimbubu, senina ras anak beru, seri min idah arus sierga-ergan ipehaga pekepar maka banci ras, la lit siganjang teruken ibas nggeluh enda. Tapi megenggeng nggeluh gelah jumpa kemalamen ate.
Ibereken GONJE isebut uis pengalkal. Bage me gelah pernanden e ngalkallah ia rusur rukur taka la mbera beka, itek-tek la mbera retap alu kata sideban arus ia paguh rukur, ibas sibujur, tole maka beluh min ia pagi njaga pantang mereha ibas geluh enda.
Ipakeken KADANG-KADANGNA, e me langge-langge ragi barat. Antusenna kalak erjile-jile beluh nampilken bana ras sangkepna nggeluh. Antusenna Ragi (lako tandang guna) ija si la ernanam banci ernanam bagi siniarapken. Barat maka kerina dahin dung ipetik seh mejile, maka banci ndatken upah. Tole maka pernanden e erjile-jile beluh nampilken bana ras sangkep nggeluh.
KAMPIL. Nuduhken dingen ncidahken beluh mehamat nandangi sangkep nggeluh ras jelma sienterem. Jadi kampil perlebe kalimbubu ibas kecibal nggeluh. Dung ibereken merga/beru, bebere emaka i junjungi kemberahen me beras piher, alu bilangen "(sepulusa)" alu pengertin :
(1) Sada, pagi perukurenndu duana (2) Dua, ula sipenduan ukur ras sangkep nggeluhndu (3) Telu, teldus me pagi sila bagi ukurta (4) Empat, selpat banga kelesa, selpat liah-liah (5) Lima, ertima pagi tendi i rumah. (6) Enem, gelem pagi ulihndu latih ras anak-anakndu e (7) Pitu, pitut pagi babah kalak ngerana sinierbahansa pecah perang sirongkak-rangkik ku jabundu.(8) Waluh, erpengaruh pepagi geluhndu ku kawes ku kemuhen sider kebertengna. (9) Siwah, wahken nipi gulut, wahken nipi jahat gelah nilah pagi si la mehuli (10) Sepuluh, nuluh perbahanen kalak entah man manusia ntah man begu (11) Sepulusada, dienggo salang sai dalin simbelin, ersada perukurenndu ersada pepagi cakapndu itengah-tengah jabundu ras sangkepndu nggeluh.
Mejuah-juah nina, janah ngamburken beras meciho man jelma sienterem.
Sumber : Buku Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.
Foto di ambil dari id.pinterest.com
Tidak ada komentar:
Posting Komentar
Mohon Tinggalkan Pesan