ADAT KARO MENGKET RUMAH LIMBARU

PMS DAIRI - Adi i panteki jabu, lit ka sura-sura terdauhen guna majekken rumah limbaru guna ingan tading keluarga (sudah ras senang), ingan  berlindung sang alas udan ras mbergeh, ingan pekesahken kencandung erdahin, ingan pulung arih-arih (sangkep nggeluh), ingan kesilang (sangkep nggeluh). Ibas mbangunsa lanai bo iarihken kal ras sangkep nggeluh bagi zaman erbahan rumah adat Karo, tapi cukup  simada jabu arih-arih. Jenari ope tukang  erdahin, ibahan acara peletaken  bati pemena rumah ingan tadiing ibabai pemimpin agama. Kenca dung peletaken batu pemena, iterusi pembangunenna iaturken tukang ras simada rumah. Ibas peletaken batu  sipemena end ape arus nge ikut ije ngeletaken batu ibas sukut, kalimbubu ras anak beru.

Rikut kebiasan sidekah ibas zaman sigenduari pe ilakoken dengan eme ngampeken tekang / kuda-kuda rumah, nai anak kuta idilo lako nampati penangkihsa, jadi serayan. Iban man ras-ras, man pander as serayan ipedalin nakan adat. Genduari pande / tukang  cukup ibere man (tapi erkiteken tukang perlu kejuah-juahen ibas nerusi pembangunen enda ipindoken gelah isangketken galuh ras lit ka ipasangna bendera) jenari acara selanjutna mengket rumah.

A.   Mengket Rumah.

1.    Nentuken Wari Mengket Rumah.

Lebe arih simada rumah. Ndigan iban kerja mengketsa. Adi nai ope itentuken mata dahin enda isungkun lebe guru sibeluh niktik wari. Wari mata kerja mengket rumah ibas kalak Karo biasana iban ibas wari “nggara sepuluh, beras pati sepuluh, ras cukera duapuluh” sebab ibas wari enda, wari pamungkas. Pengarapen gelah kerina jin-jin kayu mbungkar, laws nadingken rumah. Ibas nentuken wari enda, enggo ikut pe anak beru senina adi genduari, cukup simada jabu arih-arih ras Runggun Gereja jenari dilo sangkep nggeluh guna ncakapken ras ngaturken terdauhen.

2.    Bentuk Kerja.

Ibas mengket rumah lit 3  bentuk kerja siman pilihen, eme : 

a. Sumalin Jabu. Siikut naruhken ibas sumalin jabu enda eme teman sirumahen / teman perpulungen ntah teman sideher rumah bagepe ikut nge sangkep nggeluh. Ibas mengketsa la lit iban runggu anak beru, senina ras kalimbubu. Adi gundari cukup arih ras Runggun Gereja/PJJ. Dung acara kebaktin jenari man ras-ras, mulih temue kujabuna.

b.  Mengket Dapur. Kerja mengket dapur enda enggo iban runggu ras biak senina, anak beru ras kalimbubu. Tapi ijenda kalimbubu simannjekken daliken lenga lit  utangna. Sinaruhkensa enggo kuh sangkep nggeluh (tapi ibatasi denga). Dung acara mengket rumah / man, iban ka ngerana-ngerana, jenari mulih ku jabu masing-masing (suari lanai lit acara).

c.  Mengket Rumah. Persiapan acara mengket rumah enda arus nge ibenai alu runggu sangkap nggeluh : senina, anak beru ras kalimbubu (ilakokenn piga-piga kali). Ibas mengektsa  itenahken kerina kade-kade, janah kalimbubu enggo erdahin utang adatna. Simada rumah pe roses lengkap eremas-emas. Lit gendang, igulati landek janah nehken ranan litka nge la ibanna gendang, tapi ganti acara landek ibas acara ngerana. 

1.  Persikapen. Secara umum adi enggo dat wari mengket rumah enda iban me perdiikapen  kerna : Terjeng ja kade-kade si man tenahenken, Pembagin dahin ngatai (ngelaken surat undangen) Klaimbubu la banci la idahi langsung, Kerna ose ngiak ja si rose, Kalimbubu simaba ose she kata man bana, Pupus kalimbubu si man tudungen osena, Nakan ras bengkau ibas mata kerja, Kerna luah kalimbubu simajek daliken ras kalimbubu sierkimbang, Sinikapken nakan dem ras bengkauna, Radu ras anak beru, anak rumah ikut narsarken lambe sekelewet rumah, Sierbahan lape-lape I kesain rumah / tratak (adi gundari), Ibas rumah simbaru, ibas berngi pepagina mengket rumah ibas sumah simbaru lit kegiaten, eme :

Isurueh simeteh gerek-rekeken medem I rumah simbaru (pernipikensa). Tapi lit ka deba anak beru saja ije suruh medem – Enda lanai bo perlu iban gundari. Lampas enggo isangketken uis arinteneng arah dinding (e pe labo pada nari). Kalimbubu sierkimbang ia lebe ngkimbangken  amak ibas jabu simbaru, siman kundulen simada rumah (enda perlu dengan, gelah  pagi-pagi lampas tupung buka kunci ibas Pemimpin Agama enggo sikap kerina). Anak beru enggo ngkimbangken amak belang ibas jabu simbaru. 

2.   Waktuna Berkat. 

Genduari rumah enggo me rumah sisada-sisada (sabab rumah siwaluh jabu lanai bo lit), maka simada rumah me lebe, senina / sembuyakna, kalimbubu, emaka anak beru ras teman meriah. Kenca iban pertoton  berkat, Pandita ras Pertua sierbahan liturgi, radu ia ras si mada rumah. Kenca waktuna berkat rikutken keriahen ukur ras sada arih. Adi nai antara pukul 04.00 – 06.00 (ope kabang laneng). Genduari adi ibas kota ije melala kenderan, usur iagekken lenga mbue kendaraan mentas gelah ula ngolangi rombongan berkat (biasanya pukul 06.00) 

3.   Siman Baban Berkat. 

Adi nai berkat I rumah sidekah nari lit man baban, eme : a. Indung batu ras anakna (ijujung kalimbubu sidiberu). b. Nakan dem ras  bengkauna (ibaba anak beru). c. Cerek dem lau inemen (ibaba anak beru). d. Gendang-gendang ingan uis (apaipe banci mabasa). e. Busan ingan beras (apai pe banci mabasa). f. Amak tayangen  (apai pe banci mabasa). g. Kandi-kandi  ingan tengguli (ikadang anak perana). h. Gundur itempi alu uis arinteneng (itempi singuda-nguda). i.  Tebu icikenken (ibaba anak perana). j. Rudang-rudang simelias gelar (ibaba anak beru sidiberu). 

Adi genduari lanai bo piga iban bage, sabab enterem nge kalak ope ia pindah (mengket) rumah e, leben ibabana kuje barang-barangna. 

4.   Mengket Rumah Simbaru. 

a.  Nai ibas mengket rumah adat, iban tepung tawar sienggo isikapken anak beru, iputarken ku perdempaken jelma si kurumah. Jenari muat ku rumah niarusken ndedeh lak-lak galuh sitabar, besi mersik ras batang kempawa (antusenna : gelah mobar ukur sijahat, mersik tendi, tawa-tawa I rumah). Seh I rumah iban ralep-alep 4 kal, jenari kenca kundul ielaken nakan dem.

b.  Adi genduari, ope pintun rumah italangi, emaka Pendeta ntah Pertua / Diaken  erbahan acara muka pintu, janah iterusken alu kebaktin (liturgi Mengket Rumah Simbaru).

c.  Dung kebaktin, ipindo gelah kalimbubu simajek daliken, mpegara api kompor / gas (lanai bo batu ipajekken ras ipegara api).

d. Iban acara man. Ope sie enggo ielaken anak beru beras duhumen. Beras duhumen enda eme beras pulut enggo ireme icampur ras gula gara / tenggulli   ras tualah gelat-gelat. Lit ka deba cimpa gulame, cimpa lepat, cimpa unung-unung, cimpa matah, tebu igelat-gelat, galuh ras sidebanna. 

Antusenna pangan enda eme :

·   Lit pengarapen rikut kiniteken, bagi entebu ras melam nanamna cimpa ras tualah ndai bage ka me pengarapen kegeluhen kalak singiani rumah.

·   Kalak  Karo erpengakap  maka  nanam   entebu   ras  melam, eme nanam simehuli ras payo.

e.    Man Nakan Dem.

Kenca enggo man beras duhumen ras cimpa, je ielaken perpangan, lako ras-ras man nakan, si ibaba I rumah sidekah nari. Nakan dem enda itambahi alu nakan ras gulen sideban (jadi pengukati). Gulen radumken nakan dem enda ibahan kalak eme nurung cibakut (eitu) lawiren / nurung emas. Nurung i gule bage manuk luah kalimbubu simajekken daliken enggo itasakken (sangkep). 

Erti nakan dem enda eme :

- Nakan dem (la iuraki ibas kudin mbaru) melambangken pengarapen dem rejeki tah pe kabayaken. Maka ikataken nakan dem, gia uga galang-kitikna kudin arus asa muatenna i dakan. Erti  nakan  dem enda gelah maka bage ka pagi  denggo si mada rumah enda nambahlah pagi rejekina ras dem ukur sinibereken Dibata.

- Nurung tah kurung end ape lambing pengarapen. Kurung tendi I rumah  (sehar-sehat), janah kurung metinggel nandangi musuh-musuh.

- Manuk isangkapi (luah kalimbubu ndai) melambangken kuh si mehuli ialaken si mada jabu, persadan teridah ibas jabu (ula lit kesirangen = tetap kuh).

SIMABA LUAH.

Ibas lakon mengekt rumah mbaru enda, erdalan me adatna, janah simaba luah eme :

1.    Kalimbubu simada dareh bapa ntah kalimbubu si iperdemui ninibulang.

ia me kalimbubu bena-bena si bias ape ikataken binuang, kalimbubu simajekk daliken. Ia pesikap ose sidilaki si mada rumah, Majekken daliken kenca enggo bengketi ku rumah mbaru. Ikut pe naruh kalimbubu tua ras sierkimbang. Pegara api dapur (kenca daliken ipajekken)

Luahna. Daliken siman pajekkenken, manuk megersing (sada), beras meciho 1 tumba itama ibas pernakan mbentar, tinaruh manuk 1, gula tualah ras galuh, amak tayangen.

Ibas kita Karo, kalimbubu enda me ikataken kalimbubu si rutang ido (ertina, utangna lit, idona pe lit). Utangna bagi siarah datas. Emaka idona, ibas paksa mulih kari ia, arus nge ibereken simulih sumpit ras kepal (bengkau).

Ise simulih sumpit, eme beras, duit, sira, tualah ras gula. Ibas acara mengket rumah, kerna simulih sumpit arus nge iagak, maka  iakap ia labanci kutangen, arus pe ilebihi asa erga sinibabana. Engkai maka bage ? Lit nge turi-turina, ija tupung ibereken simulih sumpit enda, iogena kerna isi batu simalem ndai sinipeseh bana.

Kenca ietehna  isi batu simalem ndai, uga pe labo banci kerina ibabana mulih, itadingkenna nge sada bagin. Nina merekensa : “”Enggo pajek rumah  kena enda, enggo lit batu simaalem ndai menai rumah simbaru enda, gelah kam bayak namura, merih manuk niasuh, mbuah page nisuan gelah mejuah-juah ras malem ate kena ngianken rumah enda”.

Dalinna maka iergaken kal kalimbubu simada binuang enda tupung paksa mengket rumah, perban ia enggo agak ndauh ras simada rumah, terlebih adi bapana, lanai I rumah. Adi kalimbubu simupus turang nande si dilaki, ras kalimbubu sierkimbang – bapa si diberu, katawari pe la ia jangin-janginen reh ku rumah. Emaka ibas mengket  rumah teluna kalimbubu enda jadi sada kundulen seri akapna perdeherna. Em pe  sababna maka kalak Karo ibahana kalimbubu simada binuang, kalimbubu sirutang-ido tupung mengket rumah.

2.    Kalimbubu Sierkimbang.

Ia pesikap ose si diberu simada rumah, Ngkimbangken amak sipemena ingan kundul  simada jabu. Luahna : beras meciho tare pernakan mbentar, tinaruh manuk 1, manuk beru-beru, gula, tualah, galuh, amak tayangen, alat-alat dapur (bali ras luah sanga erdemu bayu). 

3.    Anak Beru.

Luah anak beru la tentuken jenisna, tapi banci ibanna bagi riah ukurna kerina. Ibas mengket rumah, adi banci  iusahaken amak tayangen ras sidebanna sue ras ngasup lit. 

B.   ACARA LANDEK / NGERANA. 

Ibas garis besarna uruten perlandek ibas gendang adat iaturken perlandek :

1.    Sukut.

2.  Sembuyak.

Inti ranan adatna eme : kata bujur, kata persentabin, mindo maaf ibas ija lebih kurangna pengalo-ngalo, pendudurken isap, pengkimbangken anak.

3.  Biak senina. Senina sipemern, siparibanen, sipengalon, sendalanen.

Inti ranan adatna, eme : kata persiinget man si mada ranah maka ula iakap bekas beluh, tapi beluhilah alu kata bekas pemere Dibata. Arapena : gelah rumah e jadi rumah kurung manic banci ingan arih.

4.  Pande / Pengulu / Teman Sada Kesain / Sada Perpulungen.

Inti ranan adatna, eme :

Pande : ngerana ia mindo maaf erkiteken kekurangen erdahin, entah mawen la bagi ukur. Maka labo ikurangina bage kin ngenca pemetehna.

Penghulu : ngatakensa uga kerna ta-tak, upah pande entah enggo dung entah lenga. Ranan enda jadi ranan pengapit ibas penghulu nari, nina : sekali nari penghulu nungkun, kam pande, kai denga lit tagih-tagihndu lenga erkedungen? Rask am si mada jabu, kai dengan si lenga lit siibanken pande menurut percakapendu? 

Kenca ikataken salang sai, emaka isungkun denga ka “lit mbarenda belitndu, adi lit kin nangtang menda belit erkiteken enggo sai tak-takndu pekepar” 

5.  Teman sada kesain / perpulungen.

Simada jabu gelah ertuah, sangap bayak mejuah-juah gelah teridah tole kesangapen  e, maka tole ka ibahanna rumahna, suruhka pande enda ndahikensa. 

Anak Beru ras Anak Beru Minteri, Singukuri, Sipejoreken. 

Isi ranan adat sipesehna : Ngaloken kekurangen ibas kepulungen enda, nehken arapen man simada rumah, maka sue ras geluh merga silima bancilahrumah enda jadi ingan sumpit ngadi, anak beru dingen jadiingan pengadin. Jadilah rumah enda jadi “Rumah Sendi Gading” 

Nehken kata man pander as penghulu ibas kekurangen kalimbubuna erbahan rumah enda. 

KALIMBUBU. 

(Adi taneh pertapaken rumah e,  punana kalimbubu, maka kalimbubu taneh me lebe ngerana). Isi ranan adat sipesehna : 

a.  Kalimbubu Bena-Bena (simajek daliken).

Isi Ranan adat sipesehna, eme : Ngataken kerna kerehen ras daliken sipajekkenna ras luah sinibabana, gia lit kekurangen ula tama ukur. Telah-telahna gelah daliken sienggo ipajekken pagi rebi ipegara api. Ula iban mekisat, maka ula pajek gara api Perdakani dapur enda, ula lalit beras siman dakanenna, 

b.  Kalimbubu Simupus (Simada Dareh).

Tupung ngerana radu pe ibabana luahna amak tayangen. Isi ranan adat siipesehna, eme : Ikatakenna erti amak tayangen maka ibas rumah simbaru pe ndatken nipi mehuli, tetap tayang tendi ni rumah, gelah bugis-bugis kam kerina ras ipupusndu.

c.  Kalimbubu Sierkimbang (Iperdemui).

Tupung ngerana radu pe ibabana luahna amak tayangen itambahi alu jile-jile sideban. Isi ranan adat siipesehna, eme : Tetap dat rejeki si simper, ola erndobahen sangkep nggeluh si banci reh ku jabu enda. 

d.  Puang Kalimbubu.

Isi ranan adatna, eme : Ia me puang Kalimbubu siberhak  ngataken radu  ras kalimbubu maka rumah enda jadilah min “Rumah Silindung Bulan”  Jadi ingan erberngi, beluh ngergaken jelma sienterem,  sierga-ergan, sada perarihen ibas rumah enda. Jadilah rumah ingann persinggah-singgahen ingan ngergaken jelma ras nehken kekelengen. 

NGELEPASI NAKAN LADA 

Kenca enggo elah man iban runggu anak beru , senina ras kalimbubu. Ibas runggu enda, pihak kalimbubu nungkun man sukut erkelangken anak beru, eme ngorati kerna tak-tak ibas majekken rumah si mbaru she ku mengketsa. Nungkun kalimbubu : lit dengan ngenda utang si lenga tembe ntah lang, bagepe upah tukang  ras beras pukulenna, enggo sikap kerina ntah kuga ? 

Penungkunen kalimbubu, ikeparken anak beru man sukut janah arih-arih ka ia ras sembuyakna. Ioratina simada jabu lit denga si lenga jore  ntah kuga. Adi kune lit denga ipeseh arah anak beru guna ikeparken ku kalimbubu. Kenca she ku kalimbubu, ibanna me arih kuga maka jore. Biasana anak beru mere usulen uga simehulina. Lit ka iras-rasken gelah dem, deba iban ka rikut taka adat eme : Sukut / sembuyak : 2/3, anak beru : 1/3 na. Janah kalimbubu pe mere asa ukurna meriah. Adi mbelin denga utang, simada jabu terutang man kade-kade, alu la erbunga. 

BERAS PUKULEN PANDE. 

Kenca  enggo dung runggu ngelepasi nakan lada (ngorati kerna kini kerin, ras mereken penampat), je maka ikerisi me upah tukang, ibere beras pukulen ras ikutenna, eme : Beras meciho itama ibas pernakan mbentar 1 garun, Manuk Megara 1. Gula ras tualah, amak tayangen 1. Adi upah tukang enggo deris sangkep nggeluh enggo banci mulih , ras niisiken sumpitna alu beras mecihho, gula tualah man cimpanna kenca she I kuta. Kade-kade ibas kuta, pulung denga I rumah (piga-piga berngi nari).

Sumber  : Buku Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.