ADAT KARO MEREKEN NAKAN SIMALEM-MALEM MAN ORANGTUA

PMS DAIRI - Teridah maka kenca orang tua cawir metua, usur ka sakit-sakit, ije me iban acarana mereken nakan simalem-malem man orangtua. Isina dahin enda, maka kesusurenna enggo pasrah, adi banci  min mekuah ate Dibata ula sempat ipesui orangtua enda. Enda me inti dahin ku jabu orangtua, maba nakan simalem-malem. Labo  gelah malem pinakit, labo ka gelah pedas berkat, tapi gelah ula suhsahina jelma sienterem, ia pe la rate mesui nggeluh.

Ibas kerehen anak-anak ras kempu-kempu enda, ije orangtua  enda "erpadan" bagi pertubuh : ise lebe ngidah wari terang, ia me lebe berkat. Totona : "Ula kal kucikenken anakku ras kempu-kempu ku e entah ente-ente/entah ku e" . Arah  si reh 

mereken  nakan  simalem-malem enda nge lit ranan, adi siman dahin enda gia la ia ngerana tappi  isadarina nge maka adi maba nakan ningen e, enggo me ietehna maka arah  totona ikatakenna : "Enggo bujur kukataken man sinursurku e, anakku, kelangku, permenku, kempungku, enteku, entahku",  (la gia ia berbelas maka ibas ukurna  erpadan nge ia "ise lebe reh ku pertibi, e lah lebe berkat ku taneh kemulihen ku kesunduten).

Dahin enda labo lir hubungenna ras nuunggah-nunggahi lau meciho.  Sabab adi nunggah-nunggahi lau meciho ibas kita Karo, e jadi kune lit permasalahen, perbahan  siganjang teruken ibas rukur. Emaka katawari saja pe ibas kita kalak Karo banci jadi, umpamana i rumah sakit : adi  enggo mengkak-engkak jelma, biasa ibas kita kalak Karo alu lit simbabaisa ranan : "Dibata kak menda simeteh si kutera pe, tambar enggo menda itambarken...eak anakku, tunggahi lau meciho bapanta e, gelah uga gia perdalan bapanta, meciho perukuren, ula pusuhndu rembek-embek nandangi kami" . Em pe sababna ibas jelma mupus adi ndekah ibas rawisen, lit terjadi purpursage alu nunggahi lau meciho. Kalak Karo kune terjadi kepicaten rukur, minter iban sada keputusen "purpursage" alu nunggahi lau meciho enda. Ula min pusuh er-embek-embek di kune gia kari itadingkenna kita.

Emaka biasa jelma adi mberat pinakitna, i rumah sakit, i rumah pe, e nari nge sieteh sada tambar simbelin "itunggahi lau meciho" ijem iban toto. Sabab adi megermet kita, tereteh nge ibas anakna e apai usur simurbbitna. Situhuna ibas paksa e hubungen dareh enggo ngerana, radu ras pengakun simbages. Makna nunggahi lau meciho, eme purpursage. Purpur ningen e erbahansa si la mehuli si la erguna ibuang ras sage ningen e "iperata" ikenditken (isagei).

Bage ka pe dahin enda, labo ka ikataken mesur-mesuri kalak sienggo metua, sabab dahin mesur-mesuri enda ibahan man kalak (jabu)  si sanga natang tuah  (4 entah 7 bulan) danak-danak ibas bertin denga.

Kedungenna, maka ibas mereken nakan simalem-malem enda labo enda iteremken kal, bias kuh sangkep saja, pulung kalimbubu ras anak beru kerina. Pangan simalem-malem enda isulangken alu pergancihen kerina. Lit ka pe ikawali anak sintua saja nulangisa, ikut arah pudi kerina anak-anak, sabab latih kari iakap orangtua  enda, emaka sekalak ka mewakili anak beru ras simewakili kalimbubu. 

Sumber  : Buku Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.