PMS DAIRI - 1. Amak Dabuhen. Terang kenca wari tupung mata kerja, erpagi-pagi lampas nande si diberu itaruhken bibina ku jabu si dilaki (kundulen si empo), guna ngendesken amak dabuhen, buena 5 lembar amak mbaru. Itengah-tengah jabu si dilaki enggo nimai piga-piga pernanden ngalo-ngalo kerehenna. Seh i rumah iendesken me amak dabuhen enda, rikut katana :
"O anakku, temen nandena / turang mamina, iendesken kami menda amak dabuhen ibas pemenan jabundu. Sangap kam erjabu kedabuhen tuah ras sangap kam ras impalndu e, ertima kita maka jumpa pagin matawari ras bulan dingen merih pagi manuk niasuhenndu, mbuah page nisuanndu, mejuah-juah anakku"
Kenca ialokenna amak dabuhen enda "Enggo ialoken kam amak dabuhen guna menai jabu kami, kam pe mama / mami, bapa nande mejuah-juah kam nggeluh, kedabuhen kesangapen kam ibas Dibata, cawir metua jadii pengurun kami, janah banci ingan sumpit kami ngadi"
Dung pengendesen amak dabuhen enda, ersikap guna erbahan kerja erdemu bayu, ndungi adat perjabun i jambur. (Lit amak dabuhen enda buena 5 lembar, eme gunana jadi kamar (ampang-ampang) ibas rumah adat Karo. Adi natap kita kubas rumah adat, jabuna, labo lit teridah kamarna. Emaka amak dabuhen enda me iban kari jadi kire-kire ras amak tayangen ambah-ambah amak adat sinipeseh singalo bere-bere / singalo perninin / singalo ulu emas, tupung mata kerja.
2. Ertembe-tembe Nggalari Utang Adat.
Erpagi-pagi ibas nangkih-nangkih matawari paksa pengului ( pukul 09.00 - 11.00 ), enggo me pulung sangkep nggeluh pekepar i jambur. Ibenai me alu acara man erpagi-pagi, jenari maka rose . Ibas rose enda silabanci la i je, eme kalimbubu singalo ulu emas guna nampeken bulang-bulang man bere-berena ras kalimbubu singalo bere-bere gelah itampekenna tudung ku beberena si diberu si diberu. Sinjabuken bana rose lengkap ras emas-emasna, bapa nande rose lengkap, bagepe sangkep nggeluh ertanda-tanda.
Kenca dung rose, iaturken me runggu adat pedalan tembe-tembe ikimbangken me 2 lembar amak mbentar (sada arah pihak si empo janah sada nari arah pihak si nereh). Ibas pedalin tembe-tembe labanci la ije kuh sangkep (senina, kalimbubu ras anak beru), bagepe penghulu guna nangani / sikaku ranan ras nangani pedalinen tembe-tembe ku kalimbubu eme tukar gegeh diri kalimbubu (biasa sinigelari tukur) ras siman elanken ku kalimbubu si telu, telu dalinen : singalo bere-bere, perninin ras perbibin, man sirembah ku lau bagepe persadan ras anak beru (entah igelari ka perkembaren / sabe)
Menai runggu adat ertembe-tembe, kampil si lima la banci la ipeseh ku jabu si nereh, ras sada kampil ku kalimbubu singalo ulu emas. Kenca mullih kampil silima ibas jabu sinereh nari, ras kampil arah kalimbubu singalo ulu emas, emaka ertembe-tembe banci ibenaken. Isikapken anak beru sinereh pinggan pasu risi beras, belo cawir, gambir tembako, kuning gersing ras deraham (emas) ilapisi alu uis kapal rupa mbiring guna ingan ersukat emas. Biasana 3 kali minggani me pedalan gantang tumba ras kalimbubu eme : Pinggan pemena = ulu emas, Pinggan peduaken = bena emas, Pinggan peteluken = unjuken sue perarihen pekepar.
Jenari kerna inget-inget man penghulu, rudang-rudang ras simecur lanai ipeseh arah pinggan, bias ipedalin alu tan saja. Kenca igalari kerna utang adat, penindih pudun ras perlingetten iulihken anak beru sinereh kempak siempo. Dung ertembe-tembe ras kalimbubu ilegi "beru" ku jabu kalimbubu, itaruhken bibi ras mamina ku jabu sidilaki (siempo).
Seh ijabu sidilaki, ibaba bapa-nande siempo radu ras sangkepna nggeluh ngadap kalimbubu singalo ulu emas, nggalari utang adat "ulu emas man kalimbubu", selaku tanda maka enggo nangtang bayang-bayang si ilegi ndube ku jabu kalimbubu tupung kitik denga, ras nehken tukur ibas sukut sinereh nari, tandana ia enggo sipengalon tukur ku jabu si empo.
3. Ranan Adat / Nehken Pedah-Pedah Ibas Perjabun.
Ibas acara ngerana guna mereken telah-telah, biasana arah siempo me lebe, jenari iumputi pihak sinereh seh dung. Singerana arah si empo, eme : 1. Sukut sipeempoken 2. Senina, senina siparibanen, sipengalon, sipemeren 4. Anak beru.
Ranan Adat si ipeseh Sukut :
- Ranan ngataken bujur man sembuyakna, erkiteken bekas tenahna enggo reh kerina.
- Man Kalimbubu, ikataken bujur erkiteken keriahen ukur, gia bereberena enggo erjabu ku bas merga sideban entah ku jabu sideban.
- Man anak beru ikataken bujur ibas kelatihen.
- Man Klaimbubu simbaru iperdemui, ikataken maka enggo erjabu beberendu ras permain, enggo ialoken kam anak beruna, enggo ipebengket kam jadi anak berundu kam kalimbubu, em pepagi siman ajar-ajarendu.
- Bagepe sekaligus ngataken kata bujur ras ngendesken ku sinereh gelah tole ietehna mbaba-babaisa.
- Man sierjabu, berupa pesan ngenca maka kai kata kalimbubu ikut ken kam kerina.
Ranan adat sinipeseh biak senina :
(Perlebe ngerana : Senina ku ranan, jenari sipemeren, siparibanen entah adi lit sipengalon)
Isi ranan senina si kuranan :
- Secara umum banci denga iandunna / irealisasina pengataken bujur nandangi sangkep nggeluh sipeempoken enda.
Petuah-tuah arus mbue iberekenna man sierjabu ras man sukut (bapa-nande).
-Sipenting ikataken uga orat erjabu idlini sierjabu.
- Man orangtua sierjabu arus ibereken kata persinget maka urusi jabu anak si enggo erjabu (ula monopoli), ija kekurangen ijelah maka itutupi.
Isi ranan senina sipemeren/siparibanen :
- Man biak seninana lanai bo lit kai pe katana.
- Man kalimbubu ia ngataken bujur, khususna singalo ulu emas ras singalo binuang. Gia beberena enggo erjabu ku jabu si deban, anakndulah pepagi akapndu lalap.
- Ia me ngendesken maka si ibuat si empo ndai, iakap singalo ulu emas anakna min akapna.
Isi ranan sipengalon :
- Adi senina sipengalon cukup ia mereken petuah-petuah man si erjabu.
- Arus ka ia tersinget maka petuah-petuah itujuken khusus ku sierjabu, maka ambah-ambah keleng atena jabuna, arus maka anak beru seri kerina idah, bali bebere entah kela.
- (Erkiteken anakta sereh nge maka kita jadi sipengalonna, emaka ranan pe tertuju khusus man sierjabu saja, penekanen maka seri idah kerina anak beru).
Isi ranan adat kalimbubu singalo ulu emas :
- Ngataken meriah ukurna, janah ngaloken erdua tan diberu siempoi beberena. Ialokenna maka e me jadi anak ipupusna.
- Erpengendes man sukut si nereh, maka bebere darehlah akapna pagin beberena enda, ula iakap kam ia kela (sabab adi kela lit denga bangke-bangkena).
-Ikataken langsung man sierjabu, eme : "O ame, kami enggo me seri iakap kami ras seninandu anak ipupus kerina kami". Kam beberena : "tutus ate erjabu, kune lit perjentiken ula mis kam ku mamandu ngerana, kai kesalahen ame enda man kamilah lebe turiken, gelah iurupi kami"
Isi ranan puang kalimbubu :
Irealisasina cakap anak beruna ndai, "Adi la ka dung ibas mamandu e, di kune lit perjentikendu, ku kami pe patut isehken kam, sabab adi la dung ibas mamandu e, anak beru kami, lenga tentu kami pe banci ipesikap kami" (Puang kalimbubu sifatna mutus ranan ngenca, patut entah lang, tengteng ras lang).
Isi ranan anak beru :
- Ia erpengaku, mindo maka ola lit tama-tama ukur gia lit kekurangen ras sifatna ngangkatken kiniulin kalimbubuna. Sumpamana, ningen "cukup ngenda ibereken" (gia sekali la cukup) . Mindo Maaf ija kekurangan ibas pengelakoken kerja.
- Ngangkatken kalimbubu, dingen kai pe cukup nge. Ban kurang beluhna nge anak beru ngaturkensa.
-Man kalimbubunaa : enda me kami anank berundu, asa ukur kami lit di la gia kami bagi ukurndu, em kami siman ajarendu"
- Man si erjabu, jadi tekanen ranan maka adi enggo erjabu meherga ibas jabu sabab "kam menda ingan sumpit kami ngadi (ingan nuri-nuri). Bapandu enggo metua, kam sambar gancih bapandu jadi ingan kami nuri-nuri, kami enterem erbagena, emaka terbeluh kam "
(Anak beru ibas rananna labanci ngido, labanci nuriken kekurangen kalimbubu, sabab kalak Karo enda labo nggit mabai bilacan ku datas uruk. Emaka sikurang payona ibuniken (ingan sumpit penusunen).
Kenca dung sukut ngerana, iterusken sukut sinereh ranan adatna. Singerana eme : 1. Sukut, sembuyak. 2. Senina, sipemeren, siparibanen, sipengalon.3. Kalimbubu sitelu, telu dalinen : singalo bere-bere. singalo perninin ras perbibin. 4. Anak beru.
Isi ranan adat sukut sinereh :
- Pengataken bujur.
- Ngarap ia man beberena, rasa bapa nande, maka alokenlah anakna enda ibas kekurangenna.
- Tole arapenna, maka ibas kelabeluhen anakna, kam sicimbangen kerina, kam turang kami simetuana, baba-babaindu ia, uga maka payo ibas jabundu.
- Ijenda pe ikataken maka kalak siserehkenna enda pe kalak lenga beluh rukur (teridah arah pengerana meteruk rukur ia, bicara pe beluh anakna enda).
- Bagepe isehken kata man anak beruna : "Enda , enggo gia permendu, kempundu erjabu, enterem denga ka nge anak kami, emaka ula kari ibas kelawesen permenndu erjabu, maka urak ka kekelengenndu"
- Man kalimbubu, ikataken kekurangan ibas ngalo-ngalo pengkimbangken amak, mereken perisapen.
Isi ranan adat senina sikuranan :
- Isehken kata petuah man si erjabu.
- Iandunna cakap sembuyakna man anak beruna ndai.
- Katana seh ku kalimbubu singalo ulu emas, maka ipebengketnalah kubas jabuna diri sembuyakna (anakna) uga kin ia gelgel melasken kata nandangi anak ipupusna, bagekalah penehkenna ranan nandangi beru sienggo ipejabui beberena.
Isi ranan adat sipemeren, siparibanen ras sipengalon.
- Nagataken lebih kurangna kai pe lanai lit sirigana.
- Man singalo bere-bere, perninin, perbbibin arus seh cakapna ikatakenna : : "tah ija gia kesalahen kami ras sembuyak kami ras sukut e, labo erkiteken kinikarusen, sibar-sibar bage kin kenca kinibeluhen ibaba kami kerina , emaka adi lit gia akapndu sikurang labo beberendu sipejabuken ngenca kekurangen tapi kami pe ikut nge simada"
-Man si erjabu, petuah-petuah.
Isi ranan adat kalimbubu sitelu, telu dalanen :
Kenca seh ranan enda kempak singalo bere-bere, maka ranan enda sehka ku kalimbubu singalo kampah (bebere nini bulang sierjabu = tua), jenari singalo binuang (bebere bapa), emaka kusingalo bere-bere.
Inti ranan adat kalimbubu tua simada kampah (simada dareh ninibulang) ras singalo binuang (dareh bapa).
- Bujur man sembuyakna erkiteken iergakenna ia.
- Bujur man anak beruna, sabab itandaina denga ras itenahkenna ia
- Isehkenna arapenna/petuahna man sierjabu (ranan gendek-gendek saja).
Inti ranan adat singalo bere-bere :
Pengataken bujur kal lanai bo lit, emaka mintes nge ia langsung mereken petuah-petuah man sierjabu, ras hakna ngataken tah kai sura-surana ras uga akapna payo ku jabu sinidahi beberena sabab beberena e enggo tersereh ku jabu kalak.
Sumpamana : "ame enda megani kal ibas jabu kami, jadi eme pagi man ameh-amehendu kerina, gelah min kiniganninna e enggo tading ibas kami , gelah tampil pagi ia ercimbang ras ersimetua"
Inti ranan adat puang kalimbubu (perninin)
- Ngatakensa maka adi enggo erjabu arus itutusi.
- Mereken ajar la nai bo ia beluh, saja arapenna maka sinjabuken bana iarapkenna tutuslah ibas erjabu.
- Singerana enda nini-nini (perninin) emaka ketutusen nggeluh nge ia perlu teridah ibas jabu simbaru.
- Megegeh erdahin gelah reh pagi ia tergelehkensa manuk, terberekenna pangan entabeh.
Inti ranan adat perbibin.
- Kenca ia mereken petuah-petuah, iapitna kata sukut sinereh bage pe lit pemindonna man singalo bere-bere ras singalo perninin, emaka gia lit kekurangen ras kelepaken sembuyakna man tegun kalimbubu singalo bere-bere ras singalo perninin, ia pe ikut nge simada kelepaken.
-Ipeindokenna man sierjabu, maka ula terjeng sukut sinereh ngenca ietehna kalimbubuna, tapi min singalo perbibin pe uga kekelengenna iberekenna man sukut sinereh bage ka nge kekelengenna man singalo perbibin, sabab seri nge ia ibas jabuna e.
- Ula kekelengendu terjeng bapa nandendu, tapi pe ku kami perbibin, gegehi encari ras erdahin gelah banci pepagi idahna pengkelengina.
Mereken luah :
- Perlebe iendesken lampu entah kudin (apai pe banci).
Kata Lampu : maka terang ibas jabuna, ula lit erbuni-buni.
Kata Kudin : (i isi beras) , arus metenget maka tetap lit isina gia temue, ula perbahan la lit beras maka la perdakani.
Kata Cerek : Labo cakap kerna nakan pangan ngenca si man ukurenken, tapi lau perpinemen pe ula sempat erkeri-kerin ibas kam. Emaka mejingkat kam banci kari lau pe la terbereken man kade-kade . Sabab teran lau meciho e me sigulutna nggeluh i doni enda.
Kata Amak Tayangen :
Ibas kita nggeluh sue ras kita enggo ngelatihken bana, amak tayangen banci ngaloken nipi mehuli, "tayang tendi , gelah tetap dat kejuah-juahen" (Rikut penggejapen kalak Karo, adi la tayang tendi tupung kita la erdahin reh nari nge penakit ras perubaten).
Kata mangkuk (arah kenjullu labo lit) antusenna ibas kalak Karo perburihen ngatakensa arus ersada cakap ras siteken. Adi sada mangkuk perburihen pe kita enggo pang ras kalak si la tandai berarti tek/siteken maka dorek. Adi enggo erjabu siteken maka banci ibas jabu.
Kata manuk (ibereken perninin jadi perindungen, ras sinibereken singalo bere-bere jadi pukulenna tupung acara mukul)
- Metenget ibas kegeluhen (tupung ndarami ingan tinaruhen)
- Tahan ibas kiniseran (tupung medemken).
- Ngingetkensa maka manuk- enda merih.
- La perajang bana sisa keleng atena anakna.
- Pengidah manuk nandangi anakna la erndobah, (bagi manuk siindung-indung, la ia merangap, janah mbaru pulah manuk enda ibas sunun nari, idah indungna gaya uga pe la itagutna, gelah anakna e kerina ikut man, bagepe kusideban me itagutina alu ersora ia).
- Di reh kebiaren cabinina nge kerina anakna, labo ngenen rupa entah kin mbiring, mbulan ras cabur bintang.
Kenca dung belas-belas ranan adat kalimbubu sitelu, telu dalanen, emaka luah enda iendesken kempak siempo, ialo-alo anak beru,. Anak beru siempo iendeskenna simulih sumpit, isi gula ras tualah, alu kata jumpa pagi sientebu ras melam ibas kegeluhen enda.
Inti ranan adat sirembeh ku lau / anak beru / anak beru minteri.
- Lako ngaturken sukut sinereh sibar bage ngenca ia ngasup , dingen mindo maaf ibas kekurangen ku sangkep si nereh.
- Man bapa-nande si empo, maka kebiasaan-kebiasan permenna ikatakenna kalak megani , "bagem baba-babaindu ia, uga payo ibas jabunta, kam senina kami siempoken, bagem pagi babai permenta e" (kata mindo)
- Man permenna arus ikataken, maka tadingken kesemalen ibas jabundu ku jabu bengkilandu, janah pelajari uga maka payo jabu sidahi kam.
Ibereken kata pesinget, eme di kune pagi lit akap siempo pandangen sidiberu, ban kata pesinget man bana, ula mintes kumamandu, cukup ku kami ras bibindu-bapandu. (Pemere ibas anak beru nari man sierjabu enda sekin, gelah banci siempo ndai enda ngataken maka bere-bere e "piso entelap kalimbubu" . Di kune la ibereken sekin, nina pepagi "la lit sekinku" . Erkiteken sie maka tangtang erjabu e mintes ibereken sekin/pisau gelah kune lit kerja arah sinereh enggo sikap ia.
Dung acara ngerana kira-kira wari linge, emaka rakat me kerina man ciger. Ope ipedalin pinggan sienterem, iendesken me pinggan pengandati man sangkep nggeluh pekepar. Kerna buena nakan pengadati enda sue ras perarihen runggu, adi adatna kal sepulusa ngenca.
Sumber : Buku Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.
Tidak ada komentar:
Posting Komentar
Mohon Tinggalkan Pesan