MUKUL (MECAH-MECAH TINARUH MBENTAR)

PMS DAIRI -  Kalimbubu enggo mereken manuk pukulenna, jenari  ipesikap  anak beru siempo. Rakat man , maka sierjabu me lebe  isuruh mukul. Adi nai ibas rumah adat Karo "rumah siwaluh jabu" labo lit kamar-kamarna, emaka ibas jabu nge  ilaksanaken acara mukul  enda . Genduari enggo ka biasa  iban kalak ibas kamar. Sienda labo  soal, gelah ula ibas jambur. Ibas acara mukul enda, lit piga-piga singikutkensa, gelah ola mela, 

silang-langna 3 (telu) kalak arah diberu  eme : bibina, si biak  nandena, sibiak mamina ras arah sidilaki 3 (telu) kalak ka, eme biak bibi, nande ras mami.

Maka sidiberu saja  ibas tak-tak mukul enda, erkiteken  nakan pukulen enda ipepukul seh piher kal dingen iela-elaken man sinaruh, emaka perbapan labo terpansa. Emaka niakap gia pernanden kerina sinaruh  enggo me banci iakap mewakili sangkep nggeluh. Bagepe gelah ula mela sierjabu  enda adi perbulangen ras ndehara ije, emaka iakap enggo bias sidiberu saja.

Turi-turina, emaka kenca isuruh man simukul enda alu sada sura-sura, emaka sinaruh ( 6 kalak)  ndai iaturken bibi siempo man nakan, pukulen ndai si enggo ni isi alu sitik-sitik  bengkau, alu kata "Endi, dahupken nakan pukulen enda, perjabunna pagi ula nggit sirang (emaka pecekna  kal seh piher nakan, bengkau ras tinaruh  manuk)".

Mukul enda labo persumpahen, sabab nakan  pukulen  pe gelarna manuk sangkepi. Sangkepi ertina la lit kekurangen  kai pe (kuh) jadi maka ipanna pe sindai "kuh" gelah ula lit  kekurangen iban Dibata. Manuk isangkepi ipan sierjabu, gelah min ia pe la lit kekurangen, sabab mmanuk si ipanna enda ndai pe igeleh ija maka kerina siterpake sada pe labo banci kurang (kuh).

Kenca dung mukul, bagepe man ras sienterem iban me percakapen. Anak beru siempo mabai cakap nehken man anak beru sinereh, nina :  "Kami siarah pudi enggo elah man, kai kin akapndu siman cakapenta?"

Ngalo anak beru sinereh :

"Kami pe man cakapenken kal lanai bo ieteh kami, saja ma seh nge  ndai manuk pukulen sini bereken kalimbubu kami?" Adi seh, uga ndai perpate manuk, lit ngenda siman perkenan kalimbubu kami, entah salang sai dalan simbelin?"

Ijabab anak beru siempo :

"Kerina salang sai!"

Jenari maka adi lit ate acara ngerana-ngerana enggo banci iteruskan. Biasana acara arah siempo, kalimbubu singalo ulu  emas  banci nehken sura-surana, berupa penjayon, entah mereken  amak selambar ras sidebanna. Kenca dung arah siempo, seh me kubas acara  suari ndube, janah tep-tep ngerana ibereken  penukur sekin ras beras tare pernakan. 

Sumber  : Buku Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.