ASAL USUL KERJA TAHUN

PMS DAIRI - Kalak Karo teremen nge tading i kuta, kegeluhenna buen ngarapken ulih juma nari. Page la banci la isuan (adi banci 2 kali setahun) sabab arah page me manusia mbelin. Kalak Karo mehamat kal nandangi page, emaka menai isuanken seh peranin lit nge tata cara keagamaan ilakoken. Ibas hubungen page lit usur tersena  gelar  "Beru Dayang" si mere benih page ndube, jenari maka iendeskenna ku Kalimbubu 

lako ngendeskensa usur ku Anak Beru adi  mulai merdang. Uliih kehamaten enda tergejab man jelma, daulat ras kehagan kalak Karo teridah ibas "belinna lumbung pagena". (Adi mbuah page, man beras usang la erngadi-ngadi, enda me erti bayak = nggelari page rikut keadaanna, pelain-lain belas-belasna nandangi "Beru Dayang jile-jile", bagi tersena arah teruh enda.

Beru Dayang rugun-ugun page ibas lebengen. Beru Dayang Buninken, benih page enggo ienahken ibas tanah ras enggo isebu (itutupi). Beru Dayang Melembing, benih page enggo turah  bagi lembiing potongenna. Beru Dayang Meduk-eduk, benih enggo erbulung erlayuk. Beru Dayang Rumencat, benih page ndube enggo beltek. Beru Dayang Perinte-rinte, Perdolan-dolan, benih page enggo metua, enggo megersing. Benih Dayang Pegun-gun/Pegungun, page nandangi isapoken/itama ku keben.

Sue ras pedah Beru Dayang Jile-jile, maka ibas waktu sienggo itetapken ibas tep-tep tahun, iban me Kerja Tahun, guna nghamati page. Jadi ibas hubungenna page me iban kerja tahun. Maka litna kerja tahun enda, adi kata sinuria, e me kerja nghamati page alu erbahan gendang. Adi ihamati page, tandana mehamatkal man kalimbubu, melias ersenina ras metami man anak beru si mere benih tupung merdang (sue pesan Beru Dayang = nen turi-turin si arah teruh enda).

Ije me jumpa ayo meciho pekepar, jadi ingan purpusage, ngadi rendem, ije me ngamburken cirem, cidahken ate jadi erkalimbubu, ersenina ras eranak beru. Ibas kerja tahun e me ni iket mulihi perkade-kaden, jumpa sangkep nggeluh, jumpa ate ngena, meriah surak i palu gendang erbolo-bolo.

Pelaksanaan dahin enda, ilakoken alu erbage-bage cara, sue ras tujun ibas anak kuta singelaksanakensa, bagi gelar si arah teruh enda. 1. Merdang Merdem (Rebu Merdang) ilakoken jadi persiapen merdang. 2. Nimpa Bunga Benih (Ngambur-ngamburi) ilakoken tupung page enggo erlayuk, enggo ersusun kulpah. 3. Mahpah, ilaksanaken kenca dung peranin, entah menjelang peranin = page enggo megersing. 4. Ngerires, meriah ukur enggo dung peranin.

Bentuk kerja sue ras keadan sada  kuta, i Karo labo seri, lit deba ipebelin kal, lit ka biasa saja, anak kuta saja alu  la nenahken sangkep nggeluh i kuta dauh nari. Contoh : Kerja Tahun Ngerires i Batu Karang, ipebelin kal. Kerja Tahun Merdang Merdem arah Singalor Lau, iban tupung HUT Kemerdekaan, ipebelin kal. Kerja Tahun Mahpah arah wilayah Suka, ipebelin kal, adi Kerja Tahun Rebu Merdang cukup anak kuta saja,.

Ibas kita erbahan kerja tahun enda, lit sura-sura mbelin kerna kegeluhen maka reh sikapna nge pagi geluh nibaba, geluh anak kuta, geluh ras sangkepta kerina. Guna ndahinken dahin  kerja tahun  enda lit ibahan tahap-tahapenna, eme : a. Persiapen : Mbersihken kuta (gotong royong) mbersihken  kesain jambur, tapin, pendawan / perkuburen ras rumah. Ndurung ku paya, lau belin nangkap nurung. Kikurung ku juma (orangtua), anak singuda ndarami bulung singkut ku kerangen.

b. Motong / Mantem. Secara gotongroyong mantem piga-piga lembu / kerbau / babi, ras buena tep-tep jabu sue ras kade-kade ni tenahken. c. Metana (wari man-man) d. Nimpa-nimpa e. Guro-guro Aron. Ijem anak perana singuda-nguda ncidahken beluhna, subuk  tutur sapa, erlajar erlagu mehuli, beluhna metik, beluhna landek, metik uis Karo jadi pakenna, terlebih ndarami teman ngeluh (bbiasana kernca kerja tahun e iban me kerja erdemu bayu).

TURI-TURIN KERJA TAHUN

Nai-nai kal, paksa jelma manusia lenga man page, man nakanna buah kayu tasak me jadi panganna. Em  man pangan  jelma, gelah  ola ia mate lumben. Jadi jelma ibas paksa si e, nggeluh ibas  kerangen . Emaka dahinna erdalan-dalan ndalani kerangen simbelang ndarami panganna. Paksa si e jelma manusia beluh kal nangkih-nangkih. Inganna pe miser-miser usur. Ija lit buah kayu tasak man panngan ije ia ringan ngayaksa keri buah kayu e. Emaka rusur jadi perubaten, si palun, sibunuhen kerna buah kayu tasak e. Siman pangan si man perubaten jelma manunsia.

Emaka nina Dibata man Beru Dayang Jile-Jile, sibagi kelang-kelangna nandangi jelma manusia. "O Beru Dayang Jile-Jile nusur kam ku Pertibi. Dahi jelma manusia. Baba benih  page. Ajari jelma manusia man page, gelah e man panganna pagi rebi. Gelah ola nari ia rubati  erkiteken buah kayu  e. Gelah ola nari ia miser ingan rusur. Keri kenca buah kayu ibas inganna, latih akapna kidaram, ku ingan si lit buah kayu tasak" 

Nembah si Beru Dayang, tanna si kawes  ras si kemuhen rikut jari-jarina sepuluh, ikut mungkuk takalna, nina : "Kai suruhen Dibata kudalanken, nandangi jelma manusia"

Kenca ia seh i pertibi enda, erkiteken dolat ras pengguntur si Beru Dayang Jile-Jile si enggo ibereken Dibata, si jadi kelang-kelang Dibata nandangi jelma manusia, e maka pulung me kerina jelma manusia, ikenjahe ras kenjulu nari, i matawari pultak ras i matawari ben nari.

Kenca pulung lanai lit sitading-tading jelma manusia ndai, reh nina si Beru Dayang Jile-Jile , "O kam kerina jelma manusia, gundari kubereken benih page man bandu gelah isuanndu, gelah page enda pagi si jadi nakan man panganndu. Gelah ola nari  kam ringan itengah-tengah kerangen rimbun raya ndarami buah kayu ras panganndu, janah kuajari kam kerina manusia mansa page enda"

Kenca e, maka iajari si Beru Dayang Jile-Jile jelma manusia kerina nuan page. Janah kuga, adi enggo ia turah, pesaisa gelah mehuli peturahna page. Bagepe seh nutusa gelah jadi beras, janah kuga nanggersa. Seh kal jilena kerina page isuan jelma manusia, bekas pengajari si Beru Dayang Jile-Jile simpar ka kerina buahna. Kenca bage maka mulih si Beru Dayang Jile-Jile. 

Kenca piga-piga tahun, enggo piga-piga kali nuan page, janah  enggo mbue kal page, enggo rusang-usang. Keben ras sapo page ingan page enggo kegalangen kerina ija pa pe. Erkiteken mbuahna rusur page, maka jelma manusia lanai mbiar kurang nakanna. Erkiteken si e, maka  kerina jelma, ia iakapna si jorena ras simehantuna. Dungna jelma siamuken, si musuhen la erngadi-ngadi page  ibas keben entah  ibas sapo page, keri kerina iamburi ras  itutungi erkiteken perubaten. Aturen rubati entah ermusuh, maka lanai isuan page. Benih silit gel-gel pe enggo lanai lit, entah enggo itutu man nakan.

Kenca keri kerina page, emaka jelma manusia enggo ka lehen. Melala jelma enggo lumawang kesahna erkiteken rubati. Luka-luka  pe lanai terbeligai. Ije maka nusur ka me si Beru Dayang Jile-Jile erkiteken enggo ieteh maka jelma manbusia enggo lumben. Iberekenna ka page man nakan ras  man suanen, janah nina  mereken pedah : "Ola  kam rubat-rubat, sabab erkiteken perubatenndu maka keri  kerina pagendu, janah melala kam  mate, luka-luka, ras muas melehe iakapndu merina, erkiteken lanai lit nakanndu, erkiteken enggo  keri  iamburi musuhndu  page  entah itutungina. Em erbahan  mesera kegeluhenndu"

Kerina  jelma ngaku ras erpengue ibas pedah si Beru Dayang Jile-Jile. Tapi enggo kenca mbue ka page, minter ka iakap  jelma  ia simehantuna. Emaka jadi ka simusuhen la erngadi-ngadi. Rubat  la erngadi-ngadi seh enggo medanggel ka kerina jelma manusia. Melala ka jelma maten, luka-luka ras sidebanna erkiteken rubat ras  simusuhen. Erkiteken sie maka keri nakan, emaka enggo ka ku kerangen kidaram buah kayu si  banci ipan gelah ola mate lumben.

Ije maka nusur ka me si Beru Dayang Jile-Jile maba page man pangan ras man benih. Maka enda me petelukaliken  si Beru Dayang Jile-Jile ku pertibi enda maba page man pangan ras man benih  suanen jelma manusia. Megi berita maka enggo ka reh si Beru Dayang Jile-Jile ku pertibi enda, emaka minter ka jelma manusia rehen kerina. Kerina ibereken si Beru Dayang Jile-Jile page man pangan jelma ras man suanenna, ije iberekenna ka me pedah, janah bagenda me pedah-pedahna : "Enda me petelu kaliken aku reh ku pertibi enda maba page man bandu jelma manusia. Janah sekali enda nari e aku reh ku pertibi enda. Emaka enda me pedah kubereken man bandu jelma manusia. Petinggel-tinggel kam. Adi merdang kam pepagi, entah ngampeken  page  ku sapo page, gelah itengtengi kam warina, wari cukera entah budaha entah aditia"

Ibas jumandu adi kam merdang suan gelah pagi jaba, ritik gara, taruk ras cingkeru. Adi merdang kam kenca sienda, pindo gelah pagi benih page man kalimbubu, gelah mbuah page isuan kam. Sabab kalimbubu kap simadu takalndu piher, ia me simereken  rejeki  simereken  tuah sangap man bandu. Mehamat  erkalimbubu.

Benih jaba pagi pindo ibas anak beru nari. Suan pagi arah tepi juma kelewet  juma. Sabab anak beru kap singkeleweti jabundu ibas kegeluhen enda, gelah reh gia  sincedai atena, ia kap si bagi bide. Bagepe jaba e me kap, di kune reh pagi kerbo, entah lembu, entah kambing, jaba me jadi bide, ia me leben ipan rubia-rubia. Jaba e me pagi jadi ampang-ampang page, gelah ola  lapat page ni embus angin . Em antusenna maa pindo pagi benih jaba man anak beru.

Benih ritik gara pindo man biak senina nari, jenari suanlah i tengah juma. Sabab ritik gara njagai gelah ola page mbulak iembus angin si meter. Bagem senina, mbelin pengkebetna erbahan jabu ola rubat. Benih taruk jambe pindo man puang kalimbubu. Sabab taruk pe pesawen warenna ibas page, jadi rembus angin, page labanci merimpeng. Bagem ibas jabu puang  kalimbubu, ngepkep  anak beru ras anak beru minterina gelah ola rubat, janah adi rubat maka idamekenna.

Bage pe benih cingkeru pindo man anak beru minteri, suan merak-rak, ratur i tengah juma, gelah metunggung juma. Bagepe anak beru minteri, pertunggungken  puang kalimbubu.  Page ihamati alu erbahan gendang aron, janah bahan kerja tahun.  Adi ihamati kam page, tandana kam mehamat man kalimbubu, senina ras anak berundu. Iabs paksa rani, tenahken kerina kade-kade simereken benih, gelah ras kerina ngenanamisa buah page juma e. Adi mbuah page katakenlah ermengah ate man Beru Dayang Jile-Jile gelah isehkenna pagi man Dibata. Janah adi kurang perbuahna, pindolah perkuah atena. 

Kenca dung pedah Beru Dayang Jile-Jile lawes ia nadingken pertibi enda, eme pedalanna i Karo page igelari Beru Dayang. Sue ras pedah Beru Dayang, maka ibas paksa-paksa sienggo itetapken ibas tep-tep tahun iban me Kerja Tahun guna nghamati page.

BENTUK BENTUK KERJA TAHUN 

1.  Rebu Merdang entah Merdang Merdem

Kerja Tahun Rebu Merdang enda ibahan ope benih page ierdangken ku juma. Kerina jelma sienterem si kin  perjuma-juma enggo ietehna lako pesikapp  jumana  gelah enggo mesai, sabab nai paksa merdang labo perihpih, 1 bulan ngenca paksana. Wari kerja tahun enda iidah bintang pemerdangen ernala i langit. Jenari maka iarihken ndigan warina, janah biasana 7 wari ope merdang enggo ibahan kerja tahun  rebu merdang enda. Ibas kerja tahun rebu merdang enda, kidekah 4 (empat) wari anak kuta  la banci ku juma. 

Kerina dahin  itadingken, arus  tading i rumah kerina. Pepagina kenca  mata kerja rebu merdang enda, anak beru tua kuta merdang ku juma ngerdangken benih si enggo ipindona man kalimbubu (kemberahen kuta). Paksa merdang enda, la banci ise pe ku juma, janah kai pe la banci ku rumah i juma nari. Kerina tading  i rumah, sabab paksa e ikataken sanga  "ngerebuken taneh".  Biasana (kerina anak kuta megi). Tupung enda la lit ise pe singerana-ngerana   ibas rumah, kem kerina, alu pengarapen ras toto "gelah mbuah page, la lit rubia-rubia singgasgasi" .

Ibas paksa ngerebuken tanah enda, asuh-asuhen la banci ipeluar ku juma, la banci muat gagaten, uis pe ibas lantaren la banci ikerahken, la banci lit sora ngelebuhken manuk adi ate ibere man (kurnah...), ras ndilo babi (nduah-nduah....), i tengah kesain. Kune lit kalak singelanggar aturen enda itaban barang-barangna ras jelmana icelceli alu pangan sehh besur kal, jenari itemtem kudukna seh mutah. Utang nebusi tabanen enda nggalar sira batu sada ngkibul (+/- 1/2 kg).

Kebiasaan kalak Karo, ope ierdangken benih, benih enggo itamaken ibas ingan "perbenihen" . Ibas ingan enda lit ije isuan sinuan-sinuan si melias gelar entah pe bulung simalem-malem. Bulung-bulung  simelias gelar enda, eme batang  galuh sitabar, tabar-tabarr, kalinjuhang, ambat tuah, sangke sempilet, bunga-bunga, besi-besi, kapal-kapal ras selantam. Ibas perbenihen ndai itama "belo cawir" iamparken i datas benih sienggo iserbuh ras iresan bulung-bulung simelias  gelar ndai, itama tare sumpit.

Tupung enda me ibahan pertoton, alu belas-belas "O Beru Dayang Pegun-gun, ierapken me kam sendah, gelah kam erbuah meramis erlipat  ganda, janah ibas wari mehuli pagi ipepulung ka me kam, lako man pangan ibas kerja-kerja si mehuli, ras pebelinken anak ipupus" . Kenca bage isemburi benih-benih ndai 4 (empat) kali.

Deherken perbenihen ndai nggo isikapken 11 lebengen, jenari ienahken benih page ndai rikut toto "O Beru Dayang  buninken, ibas wari simehuli enda ibuniken me kam, jenari ku legi ka kam pagi, mbuah kal kamm pagi, guna banci erbahan kerja mehuli dingen pegeluh-geluhken anak nipupus"  Ngenahken si 11 lebengen enda igelari "ngenahken gokna". Sue kesemalen ras kiniteken pe, maka singenahken benih enda pertubuhna min ertendiken "ulu lau". Sabab tubuh ertendiken ulu lau ngasup pekenaken  jelma sienterem, tambar ngisah, tambar muas, terakap pusuh sienterem ibahanna, ras ngasup mere tapi gelah ula nisungsang e banci megembur.

Rikut ka pe kesemalen Karo benih page ndai labanci igugut, sabab banci peturah dungil ras peturah sinanggel i tengah-tengah jabu. Bagepe ibas-iba benih enda labanci itutu jadi nakan, tapi pagin enda kenca benih enda turah bulungna erlayuk itutu jadi cimpa ipan tupung 'kerja tahun nimpa bunga benih".  Kenca dung page enda ienahken rikut roka siniban, adi ilebengi isebu alu  ngerintak sebu-sebu  ibas batang ersam, bage pe adi la ilebengi entah ienahken saja, isebu alu nahe.

2. Nimpa Bunga Benih (Ngambur-Ngambur).

Benih sinisuanken ndai kenca enggo turah igelari "Beru Dayang Melembing". Bagepe kenca bulungna erlayuk ikataken "Beru Dayang Meduk-eduk". Kenca dung ipesai juma si page na enggo bulungna erlayuk, ibahan  ka me kerja tahun sinigelari "Nimpa Bunga Benih",  entah "Ngambur-ngamburi". Biasana dahin enda ibahan paksa umur  page rumur sada bulan kudas. Kerja Tahun Nimpa Bunga Benih enda ibahan ngalo-ngalo page si enggo turah.

Rikut  kiniteken Karo siadi kerja tahun nimpa bunga benih enda ibahan guna ngataken bujur man Beru Dayang ras mindo pasu-pasu tole maka benih sienggo turah enda pe lit pagi ulihna. Emaka rikut  kata  "nimpa bunga benih", ije itutu me benih si lit denga tading i rumah, jadi cimpa. Bag sienggo isingetken arah lebe, iba-iba benih la banci itutu jadi nakan, tapi arus iban jadi cimpa guna ipanken ras-ras simereken benih (Kalimbubu, Puang Kalimbubu, Senina, Anak Beru ras Anak Beru Minteri).

Lit ka pe kuta kalak Karo, kerja tahun nimpa bunga benih enda la ibahanna. Tupung page sanga beltek beru-beru ibahan kerja  "ngerires". Ibas kerja "ngerires" enda adi ia kalak metiia ras muri, sada wari ope mata kerja, ibahanna me kerja "mere-mere page" i juma / sabah/ Ija radu ras nutung rires, lit sada bohan galang risi nurung biring sienggo imarui (4 berngi) si ibaluti alu nakan megersing radumken lacina, sira, acem. Tupung man kerina sipulung arus ipanna nuurung biring enda radumken rires ras inemenna pola si lit raruna.

Bageme maka kenca dung man kerina, bohan galang si risiken takal nurung  ras tulanna la retap, ibaluti alu bulung-bulung simelias gelar ibaba me kelewet juma / sabah. Tupung erdalan engkelewen juma, ipalui bohan-bohan ndai. Kenca serser juma idalani, emaka bohan ndai isangketken i tengah jumaibas ingan bululng-bulung simelias gelar ndai isuanken ingan perbenihen ndube. Je maka iban pertoton, nina "O Beru Dayang Rumencet, nggo kam kuidah mberu kall. erlayuk dingen mehuli kal kam. Mbue kal page ulih juma enda, erganda-ganda pagin kam guna ibaba ku rumah, jadi pulungen kerja-kerja simehuli, pebelin-belinken anak nipupus".

Kenca dung acara enda ibaba me rires ku rumah, guna ipanken ras sangkep nggeluh, terlebih kalimbubu me lebe man kensa.

3. Kerja Tahun Mahpah.

Kerja tahun mahpah ibas kalak Karo, eme kerja simbelinna kal ibahan. Kerja tahun enda encidahken ulih latih bekas perkuah ate Dibata, ija benih sienggo isuanken ndube enggo erbuah, enggo danci ipanken sangkep nggeluh, perban enggo dun peranin. Ope ilakoken kerja tahun mahpah enda, lit me wari "mutik page" ku juma. Mutik page ibas kalak Karo, eme ibas page megersing, Kerina wari mutik ibas kalak karo igelari ibas cakap si adi "tupung tiga bereten", entah pe wari Rabu ninta gundari. 

Erpagi-pagi lampas ope perik-perik terbegi sorana, berkat me kemberahen ku juma. Ibabana sumpit, risi beras sada gantang ras  tinaruh manuk, bagepe "belo sinumbul" (belo + buah mayang bentukna bagi sompel-sompel kuran), ras "belo sinumsum" ) belo + buah mayang, i lipat tangkena ku darat).

Seh i juma, sumpit ndai ibaba ku tengah juma, iamparken gakgak deherken si mutik, jenari iawin page 11 keruhi.  Tupung  iawin keruhi page ndai iban me toto "O Beru Dayang Perinte-rinte, enggo kuidah kam mbaru kal megersing, kuputikken kal me kam, kubaba me kam sendah ku rumah, lah pepagi seh paksana erguna pagi sinisuan kami, jadi kerja-kerja simehuli, ras pebelin-belin anak nipupus" 

Dungg pertoton, iputikken me page ndai 5-6 keruhi  sirembang ngala kempak si mutik, jenari ipersada ras bunga sanggar, ni  iket salu padang teguh, emaka isemburii, itama ku sumpit ibaba ku rumah.

Seh i rumah ibuat 11 (sepulusada) engkebuah page, ikuliti manjar-anjar, jenari ipersada ras beras sada gantang ndai. Ijenda adi  kalak megermet, maka teridah man bana arah gerek-gereken uga pagi perbuah page na. Adi kune ambah buena asa kerisen, tanda mbuah page peranin. Kune pas-pas  saja asa kerisen tandana bias-bias ipan me peranin, jenari adi kurang asa kerisen, tanda reh me sinanggel, turah pe ate mesui pepagi wari enda.

Ulih page siniputikken ndai, labo iambekken tapi iban inganna ibas langit-langit jabu, isilipken ganjangan asa takal. Emaka adi pernanden / perbapan si metia, nai tereteh nge piga kali ia enggo nuan page. Kenca acara mutik page enda, piga-piga wari nari  iperani me page ndai. Pungun page si ruhina ndai labo ikut isabi, tapi tading ije. Pungun page enda iiket alu padang teguh, ertina maka kerina ulih page ndai enteguh me pagi perukuren  man page enda.

Pungo page si ilukutken kenca piga-piga wari  i erik me. Kenca  ierik, ipaspasi, emaka iangin ras ijemur, emaka itama page ndai kubas keben entah sapo page. Nuduhken keriahen ukur tanda enggo dung peranin, sue kata tenah Beru Dayang Jile Jile ndube itenahken me kerina kade-kade (kalimbubu, puang kalimbubu, senina, anak beru, anak beru minteri) gelah ras kerina ngenanamisa buah page ndai. Ibahan kerja tahun  mahpah, alu erbahan gendang aron.

Ibas kerja tahun mahpah enda, iban me pahpah (page i tangger, isauk, jenari itutu, ipiari) jenari itama gula ras tualah.  Endam me tandanan nggeluh enda enggo jumpa si meketket, melam ras entebu. Itangger nakan beras page mbaru, rikut adumna  bengkau  babi / manuk / lembu / kerbo. Meriah ukur, ersurak-surak tupung ipalu gendang aron singuda-nguda - anak perana ncidahken kengasupen na lit, raduken perkolong-kolong rende-rende tande ku terang warina.

Tentuna pe jabu simbaru ipanteki ndai meriahkel pusuhna, enggo banci iras-ras kenna ulih latihna ku juma ras sangekepna nggeluh.

Sumber  : Buku Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.