TANGGUNGEN SI EMPO RAS SI NEREH

PMS DAIRI - Kerja adat (erdemu bayu, petuturken, ngeranaken) Ibas kerja adat nereh empo, lit nge adangen pekepar. Arah si nereh eme : 1. Beras Pengalo-ngalo = Kerja Singuda = 5 tumba beras, Kerja Sintengah = 2 ayan beras, Kerja Sintua = 3 ayan beras. Iendesken tupung nganting manuk, guna idakan tupung mata kerja. 2. Amak dabuhen, buena : lit 5 lembar ( 3 amak cur, 2 amak beru-beru), lit 6 lembar ( 3 ..

amak cur, 3 amak beru-beru). Enda iendesken erpagi-pagi sanga mata kerja kenca ku rumah ingan kundulen/ingan mukul. Genduari lit ka iendesken raduken luah kalimbubu ibalutken  ku tilam ras bantal (sienda banci iarihken) lit ka ipeseh kenca anak beru ngerana.

3. Beras ras manuk pukulen : beras meciho = 1 tumba, tinaruh = 1 butir, manuk megersing = 1 ekor. Enda iendesken sinereh ku rumah ingan mukul, janah ia nasakkenca (banci ka itasakken anak beru ibas penuruhna). Banci  ka iendesken kenca anak beru ngerana (bahan-bahanna). 4. Uis adat penganten ras emas-emas isikapken mami si diberu, nampekensa man si dilaki, eme kalimbubu singalo ulu emas. 5. Amak runggu 2 amak mbentar (amak belang). 6. Nikapken pinggan pasu, risi beras, belo cawir, kuning (emas),  amak cur ras uis arinteneng / uis teba guna ersukat emas.

Tanggungen si dilaki / si empo : 1. Nikapken biaya pesta ras kelengkapenna. 2. Nikapken isi sumpit kalimbubu (simulih sumpit) eme belo ras kuhna, tualah ras gula. 3. Nikapken ingan pulung ras amak kundulen (adi kerja idarat kesain kalimbubu). 4. Nukur luah kalimbubu singalo bere-bere (enda perlu iukuri mbages, sabab mela nge kita adi luahta kalak nukursa).

Erpagi-pagi wari nangkih-nangkih matawari kenca dung man erpagi-pagi enggo pulung sangkep nggeluh, terutama kalimbubu sinangketken bulang-bulang  ras tudung guna ngosei. Ingan rose rikut perarihen banci i rumah kalimbubu, entah i jambur  (nen makna uis Karo). 

Kenca enggo dung rose berkat ku ingan pulung (jambur)  radu  ras kalimbubu - jujungna luahna. Ilebe-lebe jambur enggo sikap nimai pihak si empo  guna ngalo-ngalo, rikut landek laguna : palu me gendang, mejuah-juah mabai penganten ku pelaminen lit ngenda acara ilakoken.: perlu isikapken . Sangkep nggeluh rikut pengaturen anak beru kundul ku inganna. Biasana pihak si nereh arah bena kayu (ku julu) si empo arah ujung kayu (kenjahe).

Sumber  : Buku Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.