TAKA GANTANG TUMBA KALIMBUBU

PMS DAIRI - Guna ersukat emas man kalimbubu, arus isikapken kampil si lima, amak mbentar guna si runggu, pingga pasu risi beras, belo gambir, buah mayang,, kuning gersing / dirham (emas) uis kapal rupa mbiring. Biasana 3 x minggani perdalinen gantang tumba ras kalimbubu, eme : Pinggan I ulu emas, pinggan II bena emas, pinggan III, unjuken sue perarihen pekepar ( perseninan / perkembaren la arah pinggan). Ibas nehken gantang tumba, terutama tukur, singalokenca biak nandena terdo ia kerina jenari ialoken nande simupus, e maka iendeskenna man cimbangna guna iembah.

Kenca dung anak beru ertembe-tembe, iban acara ngelegi beru. Ibas ngelegi beru, adi lit gendang anak beru  maba kampil berkat ku  jabu kalimbubu ngelegi penganten si diberu ku jabu si dilaki. Radu pihak si diberu sanga ertembe-tembe ras kalimbubu, pihak si dilaki ndahi kalimbubu singalo ulu emas, nehken keleng atena man kalimbubu, rikut pe tukur sinititipken pihak sidiberu - tandana maka menai ibas wari e ia enggo jadi senina sipengalon tukur.

Kerna gantang tumbu kalimbubu lit nge takana, eme :

1. Ulu Emas : Pertelu sekali ndarat  tulan man si mada dareh, Pertelu  sekali nari ndarat jukut man senina simada dareh, teruh daleng + singalor lau; adi arah kenjulu man kalimbubu bapa (binuang), Pertelu sekali nari, seh man kalimbubu, nini (kampah) sada nari man tua, sada nari man kalimbubu siperdemui (simada ose).

2. Rudang-Rudang : Pertelu sekali ndarat tulan man sukut sembuyak bapa si sereh, Pertelu sekali nari pedarat jukut man sembuyak tulan, Pertelu sekali nari, sada man sipemeren, sada man siparibanen, sada man sipengalon tukur.

3. Bere-Bere : Pertelu sekali  ndarat tulan man si mada dareh, Pertelu sekali nari ndarat jukut man tegun sembuyak (lit ka piga-piga kuta man kalimbubu bapa : binuang) ciken-ciken, Pertelu sekalii nari, sada  man turang nini, sada man turang sipemeren bapa, sada man sienterem.

4. Perkempun : Pertelu sekali ndarat tulan man simada dareh, Pertelu sekali nari pedarat jukut man sembuyak, Pertelu sekali nari, sada man turang nini, sada man turang  sipemeren bapa, sada man sienterem.

5. Anak Beru : Pertelu sekali ndarat tulan, man anak beru tua, Pertelu sekali nari, ndarat jukut man anak-anak beru cekuh buka / tutup, Pertelu sekali nari, sada man anak beru sienterem (taka si nibahan enda rikut semal Karo secara umum, tapi lit ka nge kebiasan rikut kuta perlu ipertimbangken ras ula ncedai ku sangkep nggeluh).

Sumber  : Buku Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.