RANAN ADAT NGANTING MANUK

PMS DAIRI -  Ibas ngulihi tudung/nganting manuk siman pekenan lebe, eme sipemena lebe maka erdalin kampil si lima ku jabu pihak sinereh erkelangken anak beruna, bage pe enggo ka i peseh kampil si sada ku kalimbubu singalo ulu emas. Sipeduaken, nakan peradaten enggo iban,  silanglangna bengkauna manuk tasak telu, cipera manuk. Kerina pinggan pengadati. Perdalinen nakan pengadati, arah 

sinereh man : Sukut, Senina Kuranan, Anak Beru, Kalimbubu Singalo Bere-Bere, Puang Kalimbubu (Perninin), Perbibin ras Anak Beru. Cataten : Adi anak beru ngelebihsa arus nina "Kalimbubu Sitelu" ,   telu dalinen  eme Kalimbubu singalo bere-bere,  kalimbubu singalo perninin ras  anak beruna ka singalo perbibin. Adi ikataken kalimbubu sitelu dalinen, eme kalimbubu dareh, kalimbubu  simada binuang (simada dareh bapa)  ras kalimbubu simada kampah (simada  dareh nini bulang).

Arah si empo nakan pengadati seh kempak :

a. Sukut

b. Senina kuranan

c. Singalo ulu emas

d. Singalo perkempun.

e. Anak beru.

Kenca erdalan  nakan pengadati, emaka ipedalin  nakan sienterem. Dung man  ikimbangi amak i tengah, ilebuh anakk beru pekepar sipattut runggu, eme :

- anak beru tua

- anak beru cekuh baka

- anak beru minteri

- anak beru iangkip

Emaka ibahan me runggu adat ngulihi tudung, eme ;

Anak beru siempo : "Eak, kam arah kalimbubunta, apai nge teman kami ingan kami nehken ranan?"

Anak beru sinereh : "Aku...!"

Anak beru siempo : "Adi kam kin ingan kami nehken  ranan, kami ras kalimbubu kami arah enda enggo ersikap, sungkun dage kalimbubunta ras puang  kalimbubunta, kam gia me enggo me sikap kerina ?"

Anak beru sinereh : "E...nimai kamkentisik, enta orati kami kalimbubu kami"

Iorati anak beru me kalimbubu erkelang-kelangken senina kurananna :

"Kalimbubu kami kerina, mesimet pengeranandu. me enggo me kam pulung i je kerina, kalimbubunta singalo bere-bere, puang kalimbubu,singalo perninin ras temanndu sendalanen, singalo perbibin, kami anak berundu me enggo ije kerina ?"

Kenca itatap senina kuranan kepulungen enda, emaka nina : 

"Enggo kami pulung"

Ipeseh anak beru sinereh ranan kempak anak beru siempo :

"Eak, adi e kin sungkunendu kami, kalimbubu kami enda ras sangkepna enggo pulung, kai kin ndai atendu?"

Anak  beru siempo : "E... sura-sura kami ras kalimbubu kami enda, enggo  me lit. Lope ituriken kami sura-sura kami, enda kampil si lima, sehken man kalimbubunta, man-man belo kam siman belo, ngisap kam singisap"

(Kenca seh kampil ,,, dingen enggo ka iulihken)

 Anak beru sinereh : (janah nungkun) "Eak .... enda kuidah enggo erdalin kampil si lima, kai kin ndai sura-surandu sekali enda, maka kuidah reh kam tampak ras kalimbubundu e ras kam anak beru ku jabu kalimbubu kami enda?"

Kuidah erpudung batang parira

Baba ku juma si batang tebu

Adi enggo pulung kita bagenda

Kai dage sura-surandu

Anak  beru siempo : "Nimai kam kentisik"

(Isungkunna kalimbubuna) :

"E... enggo lit, erkite-kiteken ibas wari si enggo lepas,  berngi si enggo saib, diri kalimbubunta enggo ibaba kalimbubu kami kujabuna (adinai). Bagepe lope seh kelang kerjanta enda enggo kami mbarenda maba belo selambar. Jadi ngikutken cakap ibas maba belo selambar ndai, sekali enda me ate kami  ngorati kesenangen ukur sangkep nggeluh kalimbubu, em... sura--sura kami sipemena"

Anak beru sinereh : "Adi  e kin sungkun-sungkunndu,enta isehken kami man kalimbubu kami  e, nimai kam kentisik"

- Ngerana anak beru  kempak kalimbubu, nina : "Enda enggo kuidah  reh sungkun-sungkun  anak beru sinjabuken bana enda, eme permen kami anakndu, kam kerina uga nge ukurndu?"

- Ijenda gelah ula mulih-ulih sue ka  nge katana tupung maba belo selambar ndai, ija ipesehkenna ka nge ku anak beruna  mulihken, kenca teridah ukur anak beru, maka meriah ukurna, isehkenna me ku kalimbubu singalo bere-bere, bage pe puang kalimbubu  (perninin) singalo perbibin, sirembah ku  lau ras sidebanna kerina.

-  La ketadingen i sungkun keriahen ukur kalimbubu singalo ulu emas, jenari kenca teridah keriahen ukur enda kerina, emaka nina anak beru sinereh :

"Maka kami ras sangkep nggeluh kalimbubu kami enda, adi enggo meriah ukur singalo ulu emas, kami pe enggo meriah ukur kami, enggo banci kam empo"

Anak beru siempo :

"Ibas kalimbubu kami enda, enggo banci ipebengketndu ku jabu kalimbubunta, e ikataken kami bujur. Bage gia lit denga nger sura-sura kami terdauhen, seh me ate kami iorati ibas sekali enda kerna gantang tumba ibas kalimbubuna sukut sinereh"

Perban meruah batang lacina

Igelat-gelat buahna i Berastagi

Emaka adi meriah ukurta kerina

Ersinget-singet gantang tumba kerna si pepagi.

(Gantang tumba ertina gantang enda kari e sukat-sukat entah tumba, adi gantang = kitik, adi tumba = galang, entah kata sideban = belin - kitikna.).

Anak beru sinereh : "Eak... eme dage sungkun-sungkundu?"

Anak beru siempo : "Edi..."

Anakk beru Sinereh : "Eak...enda kuidah bagundari icakapken me kerna gantang tumba ibas kalimbubu kami, asa kai ngenda iban gantang tumba permen kami e enggo ku jabu kalakah ndai ?"

Ngaloi biak senina : "E labo bage kam anak beru kami kerina, sabab tep-tep njabuken bana kenca diri kami, impalndu, permendu, kempundu, kam nge kap metehsa gel-gel gantang tumba ibas kami, kam pe enggo e ietehndu"

Ngaloi anak beru : "E payo nge kami metehsa gantang tumba sipedalin, emaka gantang tumbandu lah lebe iban. Adi mejapahsa kari, adi jerungjungsa kami ngkrissa, adi mekelbuksa kami kari nambahisa, emaka  arihndulah persada"

Nina biak senina : "Di bage kin nindu, me kujenda nge ndai biak singalo ulu emas?" Adi ku jenda kin, suruh ia ku jabu kami enda, sebab ia me meteh gegeh  ras lahangna anak beru kami ndai."

- Berkat singalo ulu emas, 2 ntah 3 kalak ku jabu sinereh. Seh pe i jabu sinereh, nina : "Uga arihta bage me simehulina"  Labo  ia nggit erban, bicara gia ia ningen metehsa. Emaka biasa  ningen  "Adi  anak berunta kin siempo ah ndai  asakai kin ngenda ban tukur anakndu enda",  nina biak  senina.

Singalo ulu emas ngaloi : "E labo bage, arihkenlah ban kerina ijenda,  enggo me  ersada cakapta. Kerna gegeh anak berunta e seh nge gegehna,sabab adi la megegeh me labo ia empo".  (Labo ikataken bayak entah kalak lit).

Nina biak senina, 

"Eak, di kuga kari arihta ras seninanta e me enggo me iakpandu payo?"  

Nina singalo emas ngaloi : "Enggo payo"

Emaka erbelas ia bagi sienggo iteruh-teruhi ndai. Ijenda maka ikeparken anak beru sinereh me cakap ndai.

Anak beru sinereh :

"....Adi kerna gantang tumba kin atendu ndai, enggo menda lit cakap kalimbubu kami enda ndai, ersada cakap kami ras kalimbubu, janah rikut semalna asenda ... Rp........?

Anak beru siempo :

"Kerna belas-belas kam kalimbubu ibas belin kitikna gantang tumba ibas kalimbubu, enggo menda tengteng kal iakap kami ras kalimbubu kami. Tapi rikut muat sekula serasina sierjabu, kalimbubu kami enda  sekula kal nadingken utang man kalimbubu ibas pejabuken anak ipupus, emaka gantang tumba 'tukar gegeh kalimbubu' labo ikereti kami, saja ibas mata kerja pagi asenda Rp. .......... ipedalan kami, sitadingna e man perjumanken sierjabu, tapi bage gia kakun anak beru senina, ndigan kalimbubu perlu asa ula erpadan rempet enggo sikap kalimbubu, ikaui kami anak beru senina"

(Latar belakang kalak Karo, si nereh pe asa ikatakenna ikontani kitik nge ukurna, labo erdaya lembu, tapi ia lit kin nge lalap siman carinken)

Anak beru siempo (ngumputi ranan) "

"Adi bage kin enggo sue gantang tumba ibas kalimbubu sukut sinereh, emaka seh me ate kami gia lenga bo tuhu pulung kal singalo bere-bere, me ije nge ia ndai ?"

(ngaloi anak beru sinereh, nina : "Ije....)

Adi kin ia ije, cuba oratindu ia asa kai ngenda bere-bere pengela-ngelankenna tandana beberena erjabu, janah kerna rudang siman jilenkenna enggo sikap iban kalimbubu kami ras anak beruna sibar ........(sienda) ........... Kuteruh. Janah seh ngenda ku perninin ras perbibin.

(Ibas jaman kemajun enda kerna rudang siman jilenken kalimbubu enggo itanggung siempo, situhuna si enda arus nge isikapken kalimbubu singalo bere-bere)

Emaka ibas wilayah Sibayak Suka, Barusjahe enggo seh latihna iakap kalimbubu, sabab di kune siman jilenken kalimbubu tilam kuteruh, labo la banci lang  singalo bere-bere nambahi luah 'lemari' entah ingan medem. Adi adatna amak bantal saja, la banci  la itambahi 'lampu gas' entah barang sideban.

Hukum kalak orang Julu, mela la erbaba adi bere-berenta sereh ntah empo. Biasana e, kenca ituriken anak beru siempo siman ela-elanken, ras rudang si man jilenken, emaka mamana/mamina ndilo beberena, nungkun tah kai sura-surana ibas pangna ngelebuhken beberenta e, ertina pang kita rutang gelah sehsura-sura beberenta. Bage pe arus nge kita erpengagak gia  la iturikenna kerna sura-surana. (Megati kal genduari siempo ka mindo, ula kal ban siman jilenken enda, sabab i Jakarta  ia tading labo kari terbabasa. Enda tandana lanai ierti kai kin adat e, janah enggo meros pelaksananna)

Anak beru sinereh : 

Pesehna kata enda ku kalimbubu, jenari idahi sukut sinereh kalimbubu sitelu, sitelu dalinen guna nentui asakai siman ela-elanken. Kenca lit kesepakaten  ibas singalo bere-bere, jenari ku puang kalimbubu ras perbibin ngerangguti. Emaka ipesehna ku anak beru siempo, janah biasana lanai lit pertoganen.

"Eak...kerna gantang tumba ibas kalimbubunta enggo me lit kata ersada bagi sinituriken kami ndai, emaka kai dengan akap kam siman cakapenkenta?"

Anak beru siempo :

"Adi enggo dung ras kalimbubunta singalo bere-bere, singalo perninin, ras kalimbubu singalo perbibin, ibas kami  pisau entelap, manuk mbulan sindungi ranan kalimbubunta enda, ras sirembah kulau, sa kai ngenda, lit kin ngenda biasana, bagepe persadan ras kam anak beru?"

(Maka iban sirembah ku lau, ningetken ia ndube ngembahsa ku lau. Adi ibas sabe/persadan saja kari ibas sikarajangenna, e  anak beru tua nge kari erkata. Emaka budayanta eme  ngergaken ulih latih. Saja sipenting ula ganjangen sirembah ku lau asa persadan).

Anak beru sinereh :

" Kerna sungkun-sungkundu man kami anak beru, asenda ...... Rp......., siman elanken, janah lit ngenda persadan ras kalimbubundu. Alu bage, kai  dengan sura-surandu! Ibas mata kerja enda pagi, uga ngenda atendu kerna belin kitikna?"

Anak beru siempo , Kenca arih ia ras kalimbubuna, emaka nina :

"Kerja, kerja sintengah janah tenahken kerina sangkep nggeluh, kita pulung i jambur ... Warina ras jamna pe enggo itentui. Penganten rose lengkap eremas-emas, nande bapa roses lengkap, biak senina ras anak beru ertanda-tanda saja"

Kenca dung percakapen ranan adat ngembah manuk, emaka sijalapen anak beru pekepar, ras iban penindih pudun ras perlengiten. Penindih pudun ras uis mbiring seh man kalimbubu, ras perlengiten (pembiayaan) e ngadi ibas anak beru.

Sumber  : Buku Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.