RANAN ADAT MABA BELO SELAMBAR

PMS DAIRI - Kenca pulung ije kuh sangkep, emaka reh nina kalimbubu (orangtua sidiberu) kempak anak beruna, nina :  "Eak, adi enggo reh kalak enda ndai, orati kam  tah kai  kin sura-surana "  . Ibas ngorati sura-surana, kampil e ipedalin  sidilaki. Kampil enda lit telu, eme : sada man kalimbubu (sukut sinereh), sada man kalimbubu singalo bere-bere ras puang kalimbubu, sada man anak beru. Tole ibas menaken percakapen pe, utang nungkun arah  anak beru sinereh. 

Anak Beru Sidiberu : "Eak, bagenda kin enggo pulung, enggo kuidah erdaliin kampilndu sitelu, kai nge sura-surandu ras kalimbubundu enda nangdangi jabu kalimbubu enda?" 

Enda megatel tuhu sibuah kelto

Gatelen adi kena katadu

Kai nge sura-surandu anak beru siempo

Maka kam reh ras sangkep ngeluhndu

Anak Beru Sidilaki : "E bagenda kam anak beru kalimbubu, erkite-kiteken diri kalimbubunta enggo ibaba kalimbubu kami - em sendalanenndu, ku jabuna, maka sura-sura kami ngorati kalimbubunta ras kam anak beru, bage pe puang kalimbubunta si lit sada dua, gelah min perdalinen kalimbubu kami enda ras diri kalimbubunta  banci sicakapken mehuli-mehuli. Emaka sipemen isungkkun kami me riah ukur kalimbubu bagepe puang kalimbubunta ras kam kerina anak beru "

Enda kusuan sibatang jambu

Melala buahna man baban kutiga

Ersura-sura permen kami erjabu

Lako nungkuni keriahen ukur kalimbubunta.

Anak Beru Sidiberu : "E nimai kam kentisik enta peseh kami  ranan enda " (Je maka anak beru sidiberu peseh ranan ku kalimbubu) . "Eak, kam kalimbubu, enda enggo kuidah kalak  enda maba belo selambar, atena empo enda nina, tutus nge atena min. Kam kuga nge sura-surandu kerna perdalin  permen kami, em anakndu"

Kenca  ipeseh anak beru sidiberu  ranan man kalimbubuna, emaka nina "E nimai kam sitik, enta kami arih " ,  Singalo ranan enda labo ia langsung tapi biakk seninana, senina kuranan. Ialoina me ranan enda : "Kerna keriahen ukur, nindu e labo bage, kam  anak beru  kami  me kap metehsa, janah permakanendu me kap permenndu e kerina, kam anak beru. Uga kin ngenda sura-surandu, kam lebe arih gelah iban kami ka cakap kami "

Jenari  arih me anak beru, reh nina :

Anak Beru Sinereh : "Kita kerina anak beru kalimbubu enda nake, enda me ranan kalimbubunta, la teridah rananna kerna permenta njabuken bana, uga nge arihta" 

Ijenda, gia senang ate teridah labo ate entabeh, situhunakal tujuanna i jenda ngergaken sierjabu enda. Reh  nina ngaloi ibas sekalak pernanden sibiak anak beru (sirembah kulau) ibas jabu kalimbubu e, nina "

"Ue, kerna meriah ukur nim.... la kal  ukurku meriah, kami arah enda kerna bibina la meriah ukur kami. Sabab mbarenda pe piga-piga bulan si enggo lepas, ku dahi kalimbubunta enda ku rumah enda, ningkku : anak mu e me pagi jadi singumbanku, jadi sierdakan kami ras silihmu ras turangkundu eda, bage mbarenda ningku ku rumah enda. Sitik nari kaka, enta kusekolahken permendu e, nina. Dalin ngelukkenca  kepe atena, emaka la ateku meriah "

Emaka ijenda ipeturah-turah ukur, minter me sidikalki-sidiberu si erjabu ndai  ipedeher ku bibina ndai, sipemena ije lebe ngerana  eme siempo, Nina pengeranana :

"Aku bibi ras bapa kam,  pelupunglah sura-sura ras permendu,  beligailah aku bibi ras  bapa kam jadi anak ipupusndu, senina ras biak turangku. Janah ajari  pepagi aku, mbera-mbera sangap kam bibi ras bapa ngasup pepagi aku jadi kuda dalan kalimbubunta ibas pemaba-mabaindu kerina" 

Jenari maka isambung sidiberu (sisereh) nina : 

"Bibi ras bengkila kam, tuhu labo lit kai pe pandangenku bibi/bengkila, impalku sidilaki ras sidiberu, tapi enggo me kap e perpadananen nggeluh bibi, emaka ula kal alang-alangi kam suran-surangku ras anakndu. Ueken! Gelah min sura-sura kami, adi kerna pepagi impalku sidilaki atena muat beru kujabu kalimbubu e, enterem denga kal seninangku bibi, ras ka kita pagi nganeng-nganeng seninangku e, gelah kal jadi sungumbandu"

Emaka  Nina Bibina : 

"Enggo anakku, duana kam, terlebih kam anakku sidilaki, malem ate kami ras bapandu anakku, erpengaku kal kam jadi anak ipupus kami, ambah-ambah turangndu ras seninandu itengah-tengah jabu. Emaka enggo me kam banci tumbuk ras impalndu e anakku kami pe ikut nge peempo kam"

Jenari ngerana sibibi ku anak beru tua nina "

" Kami kerina temanndu sendalanen bibina bengkilana, agindu kerina, enggo res persiapen ras kampil permenta e, e enggo senang ate kami pe enggo ikut peempoken tongat enda"

Anak beru sidiberu, ipesehna rananna man kalimbubuna, nina :

"Sungkung-dungkundu  ndai kalimbubu, kerna keriahen ukur anakndu erjabu atena, kami enggo meriah kerina ukur kami, uga gia adi enggo bage perpadanaen anakndu, kami enggo me ikut-ikut kami perdalanen anakndu e"

Je maka tole nari ngerana ka pihak sukut sinereh enda :

"Enggo gia senang ukurndu, nimai lenga ukur kami teridah emaka oratindu anak-beru siempo enda ndai, eme kalimbubu singalo ulu emas, gia ia la pulung kal, ma ikut nge ia reh ku jenda?"

Anak Beru Sinereh, nungkkun :

"Eak, .... kerna keriahen ukur kalimbubu kami  kin ndai  sungkunenndu ras kami kerina, kerna kalimbubundu atena  empo, ku jabu kalimbubu kami, singalo ulu emas  me ikut  ngenda ndai?"

Anak beru siempo, 

"Eak, ... kam kalimbubu kami kerina, me ikut nge ndai ras  ikataken nge kalimbubu, puang kalimbubu kami singalo ulu emas? Adi ikataken kin, me  kam nge  ngoratisa entah kami, emaka cubaken sungkun kalimbubunta e kerna beberena/impalna erjabu ku jabu  sembuyak sepengalonna kari. Ia uga nge sura-surana, me meriah ukurna empo beberena e ?"

Mberatkel situhuna keadaan enda, tapi labo enggon pernah lit singalo ulu emas ngataken la meriah  adi enggo ia reh ibas dahin  enda. Tapi ibas sienda terinem lau meciho  nge singalo ulu emas  e,  ngerana ia, nina :

"Kerna perdalin bebere kami e, kerna keriahen  ukur  nindu, banci ngenda teridah , tapi  ame e pagi  ma terperjat  beru ibaba ibas merga kami nge denggo ia, adi enggo ibas  jabu  kami ?"

Je maka isungkun me sidiberu e, ngasup kin ia adi terperjak  mega singalo ulu emas jadi beru singalo ulu emas nge pepagi  e,  janah lebih pe pagi pendahinna. Adi bage kami pe enggo senangkal ukur kami, nina singalo ulu emas kerna beberena empo. Jenari ngaloi kalimbubu (arah sidiberu), nina :

Anak beru sidiberu :

"E kalimbubu kami enda pe ras kami anak beru, bagepe ras singalo bere-bere sada dua, meriah ras senang ukur kami kerina, emaka enggo banci kalimbubundu  empo ku jabu  kalimbubu enda"

Jenari iterusken cakap kerna muduni, ndigan warina nganting manuk entah ngulihi tudung. Maka arah julu ikataken ngulihi tudung sebab ranan simedanak enggo icampuri sangkep nggeluh, entah kadena gia lit secara kenyataan enggo banci ibabana ku jabu inganna sereh. Tudung  me erga kiniergan diberu kalak Karo, ras bulang-bulang me kiniergan diberu kalak Karo, ras bulang-bulang me kiniergan dilaki ibas kalak Karo.

Janah bentuk tudung sinipakeken kalak Karo lit 3 sukina, telu nandaken sangkep si telu merunggukensa, eme anak beru, senina ras kalimbubu enggo ikut ertanggungjawab ibas dahin enda, emaka ikataken ngulihi tudung. Isi ranan sienggo ibenai ndube ibas maba belo selambar gelah ipuduni tupung ngulihi tudung.

Ijenda dahin esinget-singet entah erkusik-kusik,tapi labo jadi pedoman kal, maka ibas kerna gegeh pihak sipeempoken enggo ije isena-senaken tapi labo jadi ikuten.

Sumber  : Buku Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.