PMS DAIRI - Kenca enggo ilakoken acara pejuma-jumaken, seh rembang wari tiga, ibaba me danak-danak ndai ku tiga, sinigelari acara petiga-tigaken. Mulih tiga nari ibaba luah galuh. Galuh enda ielaken kerina man jelma sinijumpai, terutama teman sibarumahen. Piga-piga wari kenca mulih i tiga nari, emaka enggo banci ioah pernanden enda anak ndai kirumah-kirumah. Sabab adi lenga ibereken luah man kade-kade anak ndai lenga banci ibaba nandena ku kerja-kerja entah ndahi teman.
Ibas wari iembahna anakna kirumah-kirumah maka tiap-tiap rumah sinangkihina, kemberahen penghulu rumah pe ( adi rumah adat) arus metenget kerna kewajibenna, eme minter iperkuankenna nande danak-danak enda, nina : " O kadih, anakndu enda lenga kal pernah ku rumah enda, gelah lampas mbelin enda nakan anakndu ena " Bage me pe kerina siidahi, kewajibenna mereken beras man pangan, kerna bue sitikna la soal gia sada ngkerauk ngenca. Adi la lit ingan beras enda ipunjut ibas perembag danak-danak enda.
Enda me kearusen kalak Karo, utamg-ido nggeluh, maka adi lenga lit turah beras danak-danak, kewajiben kade-kade tetap mereken beras man nakanna, kerna sitik buena la persoalen.
Emaka acara kirumah-kirumah enda seh turah ipen danak-danak enda (enggo reh berasna). Engkai maka bage, sebab ipen ikataken : beras, enggo turah ipen, ikataken enggo reh berasna. Ertina maka adi enggo turah beras, lanai pe ibereken kade-kade beras ia enggo banci galang.
Sumber : Buku Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.
Tidak ada komentar:
Posting Komentar
Mohon Tinggalkan Pesan