PEPITULAYOKEN (MABA ANAK KU LAU) - ANAK TUBUH

PMS DAIRI - Kenca tubuh danak-danak enda, emaka iban me kerja kitik-kitik eme sinigelari  "pitulayoken".  Jadi pitulayoken  enda banci ikataken secara umum "pitu" ningen  enda me kenca  pitu wari tubuh, layoken ertina ibaba ku lau. Ibas pepitulayoken enda ndai enggo  terjadi  permasalahen jelma enda ndai, eme adi anak dilaki -mamina ngembahsa ku lau (sebab anak enda me pagi jadi anak beru / ampu ), adi anak diberu bibina ngembahsa (sabab  tupung erjabu pagi danak-danak enda, bibina me jadi sirembah ku lau).

Ibas maba danak-danak ku lau,  de nai maka anak dilaki  entah anak diberu, adi kita kalak megermet  sieteh  nge dilaki  entah diberu siniembah ku lau enda, arah pundangna. Anak dilaki ras anak diberu adi ibaba ku lau luahna ku lau igelari pundang. 

Pundang enda isina abu dapur, lapung-lapung, uis nipiyuh, rara api, ageng, jerango, kuning gersing, belo cawir, belo basah, belo baja manik, belo siwah sepulusa, bagepe gantang beru-beru ingan erpangir.

Adi anak dilaki pundangna  pake upih (lak-lak batang mayang) janah adi anak diberu pundangna pake bulung sukat. Engkai maka bage, tentu adi ndauh kita rukur maka sembung pisau ibas kalak Karo iban ibas upih nari, emaka ikataken me anak dilaki pisau entelap  mamana. Maka sukat ka ibahan ingan pundang sidiberu, anak sidiberu igelari usur bagi sukat entah pe lipur teruh lingling lalit pandangen, ise ngidahsa ngataken mberu jelma kerina.

Enggo tangkas siidah ibas kalak Karo maka anak dilaki enda perlu rukur gelah banci tama erguna man sangkep nggeluh, banci man perkentasenken sebage pisau, janah anak diberu, apai pe kita ngikut sigundari ibas geluhta perlu ipelayah-ipelipur jadi jile-jile.

Bage me maka dahin enda ibahan erpagi-pagig, ibas nangkih-nangkih matawari, gelah nangkih tuah ras kinibayaken. Mabai dalin eme sekalak sienggo metua simeteh uga perdalin orat ibas pepitulayoken (entah guru), niarakken orangtua siercikenken beski alu njemak purih tonggal, sirembah ku lau, kalak simbaba perlengkapen pepitulayoken enda.

Menai kin ibas tingkah-tingkahen rumah, tingkahen dalan ku lau serpang dalin icibalken pundang, abu dapur, belo cawir, belo baja manik gelah singguluti sidang belah ola nggege. Ibas sembah-sembahen kuta deher tapin, icibalken ka pundang, jerango, ageng, kuning gersing, belo siwah sepulusa, mindo persentabin man Beru Dayang singian tapin.

Kerna pundang enda me persentabin sue ras  kiniteken si adi, maka ula lit ambaten-ambaten tah pe adangen-adangen itengah perdalinen, janah biasana pundang enda sipemena itama ibas tingkah-tingkahen rumah, tingkah-tingkahen dalin ku lau, emaka serpang, si jelas seh ku pengadi-ngadin tapin.

Engkai maka ibahan bagenda ? Sabab rikutken kiniteken  Karo si  la idah lit dua erbage, sipemena eme Beru Dayang, sipeduaken Sidang Belah. Beru Dayang enda asa dekah lit gelarna la pernah nakiti  jelma  ras erbahan pinakit. Sidang belah asa gelarna lit, la pernah pejoreken.

Emaka ibas kerja pitulayoken enda, paksa itamaken pundang ningen : " O kam Beru Dayang kerabangen, endam ku lau turang mamina / turang bibina ibaba, pesailah kerina gegeh si la mehuli, Sidang belah ula ia bere kam bengket  gelah tetap mejuah-juah, bage pe pagi mentas  arah karabangen tingkah-tingkahen enda  gelah ula pagi ia tertuktuk ".

Kerna Beru Dayang enda, secara umum : - adi ibas kerabangen igelari "peluar pekarangken", - adi ibas tangke redan igelari "tingkah-tingkahen", - ibas kendit simbelang - siringan  ibas uruk-uruk igelari  beru dayang "pio-pio" (gelah ija kendit mbelang enda denggo tersengget - terbulawan siibabana kujuma maka beru  dayang  pio-pio  me ndiloisa); - adi  ibas kelbung simbages, kerangen rimbun raya igelari beru dayang "ligen-ligen". Maka igelari  beru dayang ibas kiniteken kalak Karo e tandana kuasa si la idah nampati, janah ipegejabken ia nampati. Janah adi igelari sidang belah ndai , sila idah  pendahinna eme nehken kesusahen tah pe kinisuin ngenca.

Mperidi  danak-danak enda mamina/bibina sirembahsa ku lau ndai me. Kenca bage dung ridi isurungi ras embusna embut-embutna  (simedate ibas takal) erkiteken sie maka usur  pe ikataken kalimbubu simupus takal piher.

Kenca dung dahin pitulayoken enda, mulih me kerina ku rumah.Seh i rumah, enda acara adi nai rikutken kiniteken, tapi arus nge man. Sipemena bengkau silabanci lang, eme : "cipera kuling-kuling jabut, sigelgelkin pe enggo lit ibas para tuhur - iolah-olahken. De kalak muri bengkau nurung mbiring (sabab rikut pengakap kalak Karo maka nurung mbiring enda nggeluh ibas lau maler, eme simegegehna ras sientabehna) alu pengarapen ia pagin jadi kalak megegeh ras  termulia. Dungna isambari alu nurung belang mata, masin nanamna rikut toto maka pagin anak si tubuh enda masin kata nibelasna. Janah bengkau sidebanna banci ka pe rikut ngasup lit ibas orangtua.

Kenca dung man lanai bo lit acara ngerana seyakatan toto sebab makna pitulayoken enda teridah ibas peridiken i lau ras pundang. Kerna rara, uis male-male sinipiuh (pundang), rikut kiniteken Karo maka kerina sidang belah ras temnanna sada dalanen mbiar kerina ngenen api rara - abu dapur. Pundang enda gunana narang, si la bagi ukurta.

Anak  si kitik denga ermain guli

Page i sabah ulakal i ruah

Pesailah kerina gegeh si la mehuli

Gelah kammi tetap mejuah-juah

Sumber  : 1. Buku Adat Karo Sirulo - Tuntunan Praktis Adat Istiadat Karo Jjilid 1, Penulis Malek Ukur Ginting, Tahun 2008.  2. Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.