PEJUMA-JUMAKEN - ANAK TUBUH

PMS DAIRI - Kerna dahin enda rikut nge itatap gegeh nandena, biasana empat wari kenca pintulayoken ndai, ertina wari sisepuluhken. Secara umum kenca sepulusada wari tubuh ibaba me ia perjuma-jumaken, sue ras acara pitulayoken ndai. Bicara gia anak enda ioah nandena, la banci laikut mamina / bibina sabab ia me kari erbahan toto i juma. Ibas perjuma-jumaken enda , seh i juma ikimbangken me amak ibuat taneh sempukul, empak-empak kayu, ranggas buluh. Kenca siemaka ipelangkem me danak-danak enda, 

tanna narus kubas si telu ndai. Ijenda maka inen me geraken siapai lebe terhadap danak-danak enda, sebagai tanda kegeluhenna. Adi terdadapsa taneh sempukul  ndai, adi anak dilaki mis ije ertoto mamina "Taneh sempukul terhadap  turang mamina, maka jadilah pepagi ia perjuma nderip".

Adi empak-empak kayu ijemakna, "jadilah pepagi turang mamina pande rumah " Adi ranggas buluh, "jadilah turang mamina enda pepagi beluh ngembari  jelma sienterem, la tual timbangen itatangna" Jelas ijenda maka kegeluhen kalak karo, 3 erbagi ngenca, eme : perjuma nderip, pande namura, jadi sinjemak ranan. Bage ka adii anak diberu, bibina me ertoto. Kune terjemak taneh, "jadilah permen bibina perjuma nderip "   adi rempak-rempak, ''jadilah permen bibina pertenun si la lolo, si erkedungen"  adi terjemak ranggas buluh, "jadilah permen bibina beluh njemak ranan sienterem"

Seh ku juma, muat mulih ku rumah, ibuat "padang teguh"  luah eme kurung bilangenna seh pitu. Kegunanna, padang teguh ndai iban pudunna sembelah ibas tanna pekepar, nahena pekepar ras ibas kerahungna. Rikut kiniteken si adi maka jema siibaba ku juma enda ndai, nteguh pe padang teguh enda, teguhen pepagi pusuh peratenna, ula kena mara, ula kena  kai oe ibas niar-niar kendit simbelang, pamah si gedang , uruk meganjang.

Kurung, rikutken kinibeluhen kalak Karo sidekah, maka kurung enda me sada pertanda gia kitik terdeheri labo, merawa ia njagai sikerajangenna (emaka lit kata ula padit kurung adi kena piseren tan banci mate). Gia ganjangen turena asang inganna tunduh ia labo  ibas abu tunduh, kurung enda kai pe ipanna labo ia nggit mansa idarat, ku rumahna nge ibabana.

Sumber  : Buku Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.