NGERANA RAS NEHKEN LUAH ADAT

PMS DAIRI - Ibahan genduari enggo pegancihen, eme : Perlebe arah siempo : Sukut, ngalo-ngalo sembuyak / senina kerina, Kalimbubu singalo ulu emas ras puang kalimbubu. Pihak si nereh : Sukut, ngalo-ngalo biak senina, Kalimbubu sitelu, telu sendalinen = Singalo bere-bere, Singalo perninin ras Singalo perbibin. Ibas ia nehken kata, luah enggo ibabana, jenari kenca dung ia ngerana iendeskenna luahna e man beberena, ialoken anak beru si empo.

Luahna eme : lampu, kudin pedakanen, belanga, pinggan perpangan (2), cerek, cangkir / gelas (2), mangkuk perburihen, beras meciho 2 tumba, amak tayangen (2), bantal (2) manuk asuhen (1). Luah siman jilenken kalimbubu : tilam (2), bantal (2), ras sidebanna bagi sura-sura. Luah singalo perkempun : Beras 1 tumba, mangkuk mbentar isi beras + tinaruh (1), amak tayangen (1) + bantal, manuk asuhen (1). Luah singalo perbibin : Beras 1 tumba, mangkuk mbentar risi beras + tinaruh manuk (1), amak cur la erbantal.

Ibas mereken luah, lit adatna guna kegeluhen jabu simbaru, emaka kenca iendesken luah adat ras luah siman jilenken, bereken beru si empo simulih sumpit kalimbubu isina eme : tualah 3 buah, gula 3 tepek, belo ras kuhna (3) pedi, itama ku pernakan mbentar sada garun (itekuk),  enda iendesken man : kalimbubu singalo bere-bere, puang kalimbubu, singalo perbibin. (Janah banci ka pe itambahi guna isehken man kalimbubu singalo ulu emas), 

Gamber - tembako. 

Ibas dahin-dahin Karo la banci tading gamber tembako ras perisapen, guna ibagiken anak beru pekepar tersitik-sitik man kerina sipulung. Sekali menaken pulung sekali nari kenca elah man (2x).

Sumber  : Buku Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.