Adi genduari enggo ipersada kerehenna. Ibas kerehen maba manuk mbur enda ibas wilayah adat Karo lit gelarna sipelain-lain, eme: Mesur-mesuri babah, Mbaba tinaruh mbentar, Ndungi bicara kalimbubu, Nggetuk bulung itung ras Cekuh gambar. Gia gelarna pelain-lain tapi tujunna seri eme mereken gegeh, mere semangat, ras mere ketetapen ukur man jabu sinatang tuah, enda me bentuk konseling tradisional.
KERNA GELAR :
1. MESUR-MESURI. Lit hubungenna kubas acra -acara ras tera-tera. Adi nggeluh labo la banci la lit sura-sura si mehuli. Tapi adi la ipeseh jadi tera-tera, piah seh ku morah-morah ras menek-menek. Adi nggeluh lit nge usur si kurang, emaka ibas anak enggo natang tuah terutang ukur kalimbubu mesuri babah anakna ras kelana, maka ula lit sangkut-sangkut pusuh terlebih kerna sangkut ukur kerna pangan, emaka ibaba kalimbubu erbage-bage pangan si entabeh ras entebu, gelah enggo besur babah, salang sai dalin si mbelin.
2. MBABA TINARUH MBENTAR. Ningen e adi lit man nehenen ibas kundulen tinaruh kerna uga perdalin nggeluh ku wari si reh, man lam-lamen tah enggo salang sai. Ndube sanga ia erjabu lit tinaruh mbenta i baba kalimbubu ras puang kalimbubu, emaka i tangger ras iog. Genduari ngataken pusuh bersih, pusuh piher ku kalimbubu, teridah arah bulang-bulang beka buluh/cengkok-cengkok si ipakeken si dilaki tupung dahin enda ilakoken. Ertina ibas natang tuah si dilaki labanci lang ituduhkenna atena keleng, ukurna mehuli ku kalimbubu si enggo ndube masu-masu geluh perjabunna, "jumpa bulan ras jumpa matawari" (anak diberu ras anak dilaki). Nai jelma la pang nerusi geluh enda adi lenga ioge si meteh orat kerna kundulen tinaruh.
3. NDUNGI BICARA KALIMBUBU. Ningen e lit hubungenna kubas ranan pasu-pasu si ipesehna ndube. "Jumpa anak dilaki ras anak diberu kam" nina. Enda enggo natang tuah anak nipupusna maka idungi me bicarana, perbahan toto enggo ipeseh Dibata. Kenca tubuh kari, enggo ka lain bicara kalimbubu, iberekenna ndawa (uis perembah), ibereken bayang-bayang (gelang nahe, tan, bura cemata, ras gendit ibas pirak nari).
4. NGGETUK BULUNG ITUNG. Eme lit hubungenna ras pangan entabeh. Sebab pangan si ibaba kalimbubu eme manuk sangkepi/manuk teratur, ibeleguni alu buluhng itung, kuh adumna iban. Bulung itung enda peralaten mbungkus pangan, tapi genduari enggo me lit panci.
5. CEKUH GUMBAR. Nuriken maka tupung ia nangkih/ipenangkih seh i jabu sidilaki icekuhna busan, tamana ku ampuna ras ku barana. Ertina labanci la ia megegeh ncari gelah ula kurang siman pangan (beras ibas busan). Genduari kenca natang tuah, gelarna "cekuh gumbar" ertina buat simehuli ras sientabeh si lit ibas gumbar e (sebab gumbar ingan pangan entabeh).
Pangan sinibaba kalimbubu ras puang kalimbubu, eme : nakan tasak, adumna manuk sangkepi sinibeluguni alu bulung itung, cina labar-labar, tinaruh manuk si itangger, kurung ras nurung i gule, gulen cipera, iaba ka cimpa lepat, cimpa tuang, cimpa buka siang, gulame, galuh silewuh sada cikat ras pola entebu sada kitang.
Kerehen kalimbubu ras sangkepna nggeluh ku jabu sinatang tuah, ku jabu nak; anak beruna enggo me ikut anak beru ngkuskasken kerina keperlun dahin enda. Nakan tasak enggo ibaba ku jabu sinatang tuah. Emaka jabu siman dapaten e ras perpulungen, kerina pesikap pangan. Janah seh rumah si mandahin, lenga bo lit cakap, emaka terjeng ndurndurken isap ras ndurndurken kampil gelah ngisap-ngisap ras man belo.
Adi enggo pulung kerina sangkep nggeluh, runggun enggo banci erbahan kebaktin pengataken bujur.
KALIMBUBU NGENDESKEN PANGAN MAN SINATANG TUAH .
Adi enggo pulung siman dapeten rikut sangkepna : sukut, sembuyak, senina, kalimbubu bagepe anak beru, seh me aturen man. Ope seh aturen man, maka kalimbubu ras paung kalimbubu enggo nikapken kelengkapen pangan bage pe ngosei sinatang tuah (si dilaki make bulang-bulang/cengkok-cengkok, erkampuh, ras sidiberu ertudung, erlangge-langge, ergonje). Nakan rikut manuk sangkepi itama ibas pinggan pasu, janah iban ka lanamna uis mbiring. Cimpa si man pangan si cukup erbagena itama ibas sada pingga ras pangan si deban iendesken ku jabu sinatang tuah.
Nina mama/mamina, "Enda anakku, reh kami kerina orangtuandu, kalimbubu ras sangkepndu si arah kami kerina mereken pangan maba nakan man bandu anakku, gelah i bas kam sanga la megegeh, seh min kerina sura-surandu. Mekuah ate Dibata, kam pe sehat-sehat la mberanginen. Janah arihndu pe ras kela ula siganjang teruken, gelah min pemere Dibata simbelin silenga siidah pe anakku bagi ukurtalah pagi kerina, salang sai dalan simbelin. Juah-juahen kam pepagi seh mupusken tuah, ula sangkut-sangkut ukur, ula bera-bera pusuhndu, ras ula lit simenek-menek" Emaka icabinken uis arinteneg : "Teneng tendi rumah "
Kenca ibelasken kalimbubu ranam enda, ngaloi sinatang tuah : "Ue nande, ue eda, kualoken kal sura-suranndu e, janah sada kal ukur kami ras kelandu/turanghndu ngaloken kerehendu, mbera-mbera mekuah ate Dibata man banta kerina, seh kal sura-suranta kerina. Pusuh kami pe labo ermenek-menek ras ermorah-morah, malem kal ate kami ngaloken kerehendu".
Iban Runggun pertoton, emaka ibenaken me man, janah i tatap perpanna, emaka iban ka perpan sienterem.
Kenca elah man, iban me percakapen. Janah simenaken percakapen e anak beru si man dapaten, sebab utangna sipemena eme nungkuni kai sura-sura kerehen kalimbubu :
"Eak, enada kita enggo elah man, apai nge kam teman kami ngerana, anak beru kalimbubu enda ?"
Emaka ngaloi kalimbubu, janah isuruhna sekalak anak beruna ngaloi. Iban me cakap : "Adi kam kin penehen kami ranan, enggo kuidah kita elah man enda, kai sura-surandu ras kalimbubu sekali enda reh ku jabu kalimbubu kami enda ?"
Jenari ngaloi anak beru kalimbubu, nina : "Eak, ibas wari sekali enda, reh kami ras kalimbubu kami ikut pe ras piga-piga sangkep nggeluh, eme kapen maba nakan, tah nigelari mbaba tinaruh mbentar, eme erkite-kiteken enggo menda metunggung pemere Dibata, gia lenga si idah. Tapi ibas si e ersura-sura kami ras kalimbubu kam ras sangkepna nggeluh maka min seh sura-sura, seh pagi pemere Dibata gelah si lenga si idah kita e bagi ukurta lah reh pagi kerehenna, cirem pusuh ngalo-ngalosa.Enda me kerehen kami."
Kenca i orati anak beru jabu sinatang tuah, emaka tole nina : "Adi kin ndube enggo reh kalimbubu maba nakan, kuga ngenda ibas kerehenna, ma salangsai menda? Ijabab anak beru kalimbubu : "Salangsai ngenda dahin simbelin, seh ngenda sura-sura ibas penjujuri Dibata."
PEDAH-PEDAH MEREKEN PERGEGEH KU JABU SI NATANG TUAH
Ibas kerehen kalimbubu ku jabu sinatang tuah, mereken gegeh ras pasu-pasu arah pangan sinibabana iban e acara ngerana mereken pedah-pedah man jabi sinatang tuah, eme "
1. Tegun kalimbubu sierkimmbang ras perbibin.
2. Kalimbubu singalo ulu emas (arah si dilaki).
3. Puang Kalimbubu sierkimbang (arah si diberu/singalo perkempun)
4. Puang kalimbubu singalo ciken-ciken (arah si dilaki)
5. Anak beru simaba nakan (arah sii diberu)
6. Bapa Nande (sukut ras senina) arah si dilaki.
7. Sinatang tuah
8. Tokoh agama sekaligus nutup perjumpan alu pertoton.
SIMULIH SUMPIT KALIMBUBU
Kenca dung percakapen / nehken pedah-pedah pendungi ranan anak beru sinatang tuah nungkun kerna pemulih kalimbubu. Adi enggo dat ieteh permulih kalimbubu, si pemena lebe arus lit simulih sumpit isina :gula, tualah, beras ras sira. Arah si mulih sumpit enda teridah kesangapen e ialoken, entebu ras malem pepagi pendapaten, terlebih silenga ngidah terang wari enda, eme danak-danak ibas bertin ngasup ka pepagi nirai jelma sinterem, gelah banci erguna, mpekena si la payo, masin pagi rananna negu-negu jelma si enterem kubas dalin si terjoren, kubas simehuli.
Tole tambahaenna rikut kengasupen lit, si mulih sumpit, sue ras kegeluhen kalak Karo adi kalimbubu reh soal serpi arus iban, janah kerehen kalimbubu enda adi terjaka, la bancii rugiken kalimbubu. Kerna duit enda labo kal bahan utama ibaskalak Karo, soal bue sitikna serpi, lit nge maka banci. Jenda kal me situhune letak geluh Karo, maka ibas kegeluhenna pang ia ngelatihken bana gelah geluhna min ulin geluh sipepagi asa wari si sendah.
Sumber : 1. Buku Adat Karo Sirulo - Tuntunan Praktis Adat Istiadat Karo Jjilid 1, Penulis Malek Ukur Ginting, Tahun 2008. 2. Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.
Tidak ada komentar:
Posting Komentar
Mohon Tinggalkan Pesan