NGANTING MANUK

PMS DAIRI - Adi  genduari lanai bo lit kelang wari iban  ras mata kerja nereh empo. Kenca dung pemasu-masun i Gereja, berngi  wari pulung  sangkep nggeluh, kade-kade ras perpulungen i jambur, suari pepagina dahin ndungi kerja adatna. Adi itingkatken  maba belo selambar ku nganting manuk bagenda ka nge acarana.

Ibas dahin nganting manuk nakan peradaten  enggo isikapken  bagi arusna eme : bengkau lit sayat-sayatna, tasak  telu ras  gulenna cipera. Nakan peradaten arah sinereh seh man : sukut, senina/gamet, anak beru kalimbubu singalo bere-bere, puang kalimbubu, perbibin, janah ula lupa Runggun Gereja. Arah siempao seh man : sukut, senina man ranan, singalo ulu emas, singalo perkempun, anak beru ras pinggan Gereja. Nakan itama ibas pernakan mbentar ibaluti  salu uis, bengkauan  itutupi alu bulung galuh ras cerek perpinemenna.

Kenca dung ibagiken emaka erdalin parpangan sienterem ras isina ikut luah siempo : cimpa ntah riris. Emaka iban pertoton man ras pertoton elah man. Kenca nggo dung man, enggo isapui amak iaturken anak anak beru sinereh amak runggu. Jenari sukut pekepar ngelebuhi anak beruna guna runggu eme : Anak beru tua, Anak beru cekuh baka, Anak beru iangkip, Anak beru menteri ras singukuri.

Adi enggo pulung kerina (sidilaki-sidiberu) sangkep nggeluh  pekepar ipedalin kampil pengadati, buena 5/6 ( 5 man sidiberu 1 sidilaki = singalo ulu emas) ras adi banci itambahi sada nari man runggun gereja (sada amakna). Emaka kenca ituriken sura-sura kepulungen ope iterusi ranan adat  iban runggun Gereja pertoton.

Perlu niinget ibas runggu enda adi ipasu-pasu jabuna lanai bo perlu nari isungkun kerna kesenangen ukur kalimbubu/anank beru, tapi iterusken ranan kerna gantang tumba kalimbubu siman sukaten ngulihi ranan erjine-jine (singet-singet) ndube tupung acara maba belo selambar sabab teridah maka enggo me reh  teremna kalimbubu / anak beru pulung.

Gantang tumbu ningen e. eme sukat-sukat ku kalimbubu. Adi gantang = kitik, adi tumba = galang. Kata sideban belin kitikna bentuk pengalon  rikut adat Karo, eme : Pengalon sukut ras sembuyak senina, Pengalon kalimbubu, puang kalimbubu ras anak beruna (perbibin) ras luah adat bagepe simanjilenken, Perembah ras pengalon anak beru.

Kerna bicarana pelain-lain tiap wilayah adat Karo (genduari enggo ispekati 8  wilayah adat Karo). 

Kenca dung icakapken kerna gantang tumba kalimbubu  iterusi runggun kerna mata kerja, bentuk kerja, ingan kerja, patung kerja, rose, ertembe-tembe, acara ngerana/perlandek, nakan  peradaten ras sidebanna.

Alu litna kesempaten pekepar, dahin nganting manuk enggo ilayasi aku pertoton. Erkiteken pepagi  wari me mata  kerja sijalapen biasana iban tupung tukur emas kalimbubu i pedalin. Arah pudi enda enggo lit perkembangen  mbaru bas kalak Karo, maka kenca dung  acara nganting manuk iterusi ergendang kibot. Labo ningen lit adatna tapi ilayasi perlandek rikutken adat Karo, eme :

1. Landek kerina sangkep nggeluh pekepar guna pejumpaken sierjabu. Reh sempo alu pemabai anak beruna - maba kamppil sitelu, ku jabu sinereh janah rende lagu Maba Kampil. Pihak sinereh enggoertima emaka seh kenca i jabu  sinereh kampil ialoken, diberu ibaba ku jabu sidilaki alu iarakken sangkepna  nggeluh  janahh rende Maba Kampil. Seh itengah pengantin ipelandek ras radu sie  sangkep nggeluh pekepar  surut ku inganna jenari kundul.

2. Sada kebiasan genduari penganten iadu landek  jenari ibere  sokongen duit guna nampati penjayonna (perlu  iukuri ndauh  maka adi rikut adat Karo, orangtua nge pejabuken anak).

3. Jenari landek pegancihen ibenai sukut sidilaki, sukut sidiberu, itutup anak beru. (Kerna sienda perlu icakapken gelah jumpa siterulin, gelah ula ningen la lit adatna tapi bagi adat  ka iban).

Adi lit sura-sura kerna dahin maba belo selambar ras nganting manuk i pesada, kenca dung i runggui anak beru pekepar (sijalapen), iban ka acara "nehken riah ukur orangtua" radu persentabin anak ku orangtua. Lit iakap ulina maka adi erjabu perlu nge calon pengantin mindo restu ku orangtua pekepar, dingen adi lit kin salah lepak kidekah enda (entah kin ganina) si perlu iperobahi, gelah robah guna si mehuli ibas mengketi jabu si mbaru.

Orangtua pekepar  melasken ukurna meriah, guna njemba-njemba si erjabu maka tetap  ate tutus, megenggeng, mperobahi lagu ras jabuna pe  pagi sempabu. Rananna idungi alu njunjungi beras piher, alu kata pedah : (beras i tama ku takal anak).

1. Sada, pepagi perukurendu duana.

2. Dua, ula erpenduan ukur ras sangkep nggeluhndu.

3. Telu, teldus me pagi si la bagi ukurta.

4. Empat, selpat banga kelesa, selpat liah-liah.

5. Lima, ertima pagi tuah i jabundu, ras ertima pagi tendi i rumah.

6. Enem, gelem pagi ulihndu  latih ras anak-anakndu.

7. Ptu, pitut pagi babah kalak ngerana si erbahanca pecah perang sirongkak-rangkik ku jabundu.

8. Waluh, erpengaruh pepagi geluhndu ku kawes ku kemuhen sider kubertengna.

9. Siwah, uwahken pepagi nipi gulut, uwahken nipi jahat gelah nilah pepagi si la mehuli.

10.Sepuluh, nuluh perbahanen kalak ntah  man manusia ntah man begu.

11.Sepuluhsada, di enggo salah sai dalan si mbelin, ersada perukurendu, ersada pepagi cakapndu i tengah-tengah jabundu ras sangkepndu nggeluh.

Kenca njunjungi beras piher ibas kalak Karo eme ncidahken  ukur meriah ras mejuah-juah, bage pe nehken kehamaten sekaligus petetap ate guna ndalani kehgeluhen, ras tetap erpengarapen man Tuhan, nehken toto ku Dibata simada geluhta.

Kenca iban orangtua  acara nehken pasu-pasu kerna kesenangen ukur  ibas perjabun anak emaka itutup runggun gereja alu erbahan ranan ras pedah-pedah uga erjabu ras persikapen kai si man pekenan ibas pemasu-masun. Mbaba pertoton  guna nutupsa runggun sidiberu ras  mbukasa arah runggun sidilaki. Natap ku kerja Maba Belo Selambar pe banci  itingkatken  ku maba manuk ibas sada wari, guna penghematen waktu  ras  dana,  engkai ka maka la banci kerja pasu-pasu tumbuk was kerja  adat ibas sada wari. Sienda jadi pertimbangen man banta kerina.

Sumber  : Buku Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.