Luahna perisapen ras kampil.. Seh ijabu sidiberu, erkiteken ibas wari silepas pe enggo me ieteh pihak sidiberu maka ia enggo ersikap, enggo itanggerna nakan. Kenca elah man berkat me sitelu enda , janah sidiberu itaruhken kandu-kanduna singuda-nguda denga. Perdalinen ibas nangkih, pernanden si reh ras dilaki ndai arah lebe mabai dalin, ije maka sinaruh sidiberu ndai, emaka sipenangkihken, emaka dilaki siempo jenari kandu-kandu siempo (sinaruh sidilaki).
Seh ku rumah orangtua sidilaki, entah pe ku pihak sidilaki, seh ibas jabu minter ialo-alo alu cakap mehuli , "Mari kena anakku kundulken ". Sebab jelma nggeluh perlu kal iergaken, eme sababna maka sinangkih enda bengket arah pintun kenjulu ku jabu. Ije maka lope ia kundul entah pe kenca kundul ipedeher busan, janah nina pernanden sini je "Adi enggo kam seh ijabu enda, cekuh busan enda, tama kuampuhndu ras kubara".
Tujunna, kalak Karo enda kenca nangkih minter ncekuh busan, sabab busan enda me ingan beras ibas kalak Karo, alu la ikataken pe maka gelah diberu si reh ku jabu enda, metenget ibas ngelitken pangan pagi rebi. Sabab beras me sipebelin-belinken jela maka seh nangkih. Enda me makana, maka arus tutus erdahin adi enggo adi enggo pang erjabu. Dung cekuh busan, adi lit kin ndai nakan minter ka man. Emaka minter me anak beru jabu enda ngereme beras jadi cimpa. Kenca sek paksana, sinigelari enggo mel beras, berkat me sidiberu sinangkih ndai ras kandu-kanduna ras iarakken piga-piga pernanden lako nutu cimpa. I jenda enggo kari ieteh beluh tah lang ia nutu peribah sierjabu ndai, janah enggo beluh ningting, tepung alu ndiru.
Kenca dung cimpa enda itutu ibaba ku rumah. Cimpa sinibahan eme cimpa matah entah cimpa buka siang. Seh i rumah ipan ras-ras. Syarat-syaratna maka cimpa enda labanci kerina ipan kelele sada berngi. Kegunanna kari me, di mulih sinaruh sidiberu arus ibabana cimpa nangkih ndai jadi luahna. Tole maka ise si reh kelele sada berngi. arus tersitik-sitik gia lit terbereken cimpanangkih ndai. Sabab adi la kari bage rikut kalak Karo, maka iuru me bapa nande siipenangkihken ndai. "La kin nge lit cimpa anakna ndai " , eme kata jelma sienterem. Tep-tep kalak nungkir ku jabu, arus lit cimpa nangkih ndai, gia tersitik-sitik. Kenca sie ibas terang wari pepagina, ibahan me sada/dua utusen ku jabu pihak sidiberu (kalimbubu) enda, guna ngendes ras mereken penadingen. Ibas ngendes enda jumpa pulung me radu ras anak beru kalimbubu enda.
Kegunaan ngendes enda, sada ngatakensa maka "Enggo tetaplah ukurndu, maka anakndu enggo seh kujabu siempo " Peduaken, mereken pengendesen ndai erkiteken ia enggo seh, "Enam penadingen kami kelele kami reh maba belo selambar" (Adi lenga ngembah belo selambar, kalimbubu lenga banci reh ku jabu anak beruna (orang julu), tapi arah Singalorlau banci idahina, alu kata nungkir maba nakan.
Ibas keadaan genduari, adi enggo lit kesadan arih anak singuda (simedanak) orangtua ngikut saja. Guna nehi sura-sura siedalin, orangtua erbahan hubungen guna sitandan ras erbahan arih pekepar alu isaksiken anak beru ras ibahan acara adat "maba belo selambar".
Sumber : Buku Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.
Tidak ada komentar:
Posting Komentar
Mohon Tinggalkan Pesan