NAKI-NAKI/NURE-NURE/NGERONDONG - PERJABUN (NEREH EMPO)

PMS DAIRI - Nai kunuken noria, adi jelma igelari anak perana maka ia enggo ersura-sura erjabi. Jelma si enggo ersura-sura erjabu enda, em kapen  enggo beluh erbahan ukat, erbahan sengkir, nggelai, erbahan pantar ras ngkalaki, enggo beluh ngeroka, alu kata sideban kerina dahin-dahin kesemalen  Karo enggo ientehna mangkar-mangkar.  Kenca sienda maka enggo lit sura-sura njabuken bana. Bagepe ia enggo ikut aron mbelin, entah pe i gelari aron ngengkal. Adi anak diberu maka enggo atena melas sereh, enggo ia beluh nutu peribah, ersigi, ngemban kuran, nimpa, ikut aron mbelin ras enggo beluh mberkis engkal.

Jadi ibas jelma kalak Karo njabuken bana, sue cakap siadi eme sipemena idahina naki-naki entah pe biasa igelari nure-nure, entah nebu-nebbu ibas pengertin cerdik. Sekalak anak perana alu kecerdikenna ngasup ia naluken ukur sideberu, sabab mefati kal ibas diberuk kalak Karo enggo pe lir ukurna tempa la teridah atena ngena ras ukurna erpengue. Nereh empu banci jadi asal mulana ndube ertina, eme : Diberu (si Sereh). Eme reh nandangi dilaki sienggo ndarami/ erdilo/ erngena ate/ ersura-sura man bana, lako ngendesken dirina (sereh diri), rikut nami-nami ibas ukur meriah. Dilaki (si Empo), eme si jadi  si mada / empuna si reh ndai ulihna ertenah bekas ndarami, singena ate rikut sura-sura ndube, siman ergan, rikut nggedang  ate ngalo-ngalosa.

Ema ibas jama sinoria naki-naki enda ertahun-tahun dekahna, maka lit kata erpengue ras seh ku bas perjabun. Erkiteken sie ibas kalak Karo lit ka kebiasan ibahan anak perana  guna ngiket pusuh pihak jabu sidiberu, ikalakina jumanaa, erbahan lipo alu erbuni-buni. Kerina dahin enda idahiken tupung paksa berngi, ija terang kenca wari dahin enggo dung. Piah dungna orangtua tersungkun-sungkun  ndingen ndarami ise kin anak perana sipejore dahin e. Gia adi enggo  ieteh labo imbarken tapi iukuri mbages kerna sura-sura ras tujun anak perana enda.

Ibas naki-naki enda banci ngenda rikutken kelang-kelang,  janah banci ka pedempak. Adi ibahan kelang-kelang, sumpamana anak perana ngirimken kampil man singuda-nguda, alu tenah : "Di enggo sitandaan mesikel aku erkuan. Di lenga sitandan mesikel aku ertutur "  Kune  kari ialoken singuda-nguda e kampil ndai, itetapken me ingan ras paksa jumpa. Maka jadi me ranan naki-naki.

Maka igelari ka nure-nure, sabab ibas ture rumah si  waluh jabu me ingan jumpa ras cakap-cakap. Biasana singuda-nguda ibas  piga-piga daerah, seh kenca berngi wari i ture me ia mbayu amak. nima-nima anak perana reh ndahi ia. 

Maka igelari ka ngerondong, erkiteken ia ercakap-cakap ibas paksa terang bulan, (rondong = ngerondong). Enda ngingetken maka ercakap-cakap tupung iterangi sinalsal bulan berngi wari, tuhu-tuhu mbaba perarihen simehuli, igejapken maka percakapen isaksiken Beru Dayang jile-jile siinganna ngada-ngada usur i bulan.

Lit ka pe kalak ngatakensa, maka kata ngerondong enda (arah jahe-jahe) lit hubungenna ras nondong ) nini tudung). Nodong me kelang-kelang  anak perana ku singuda-nguda gelah banci erkuan. Kalak noria, ingan medem singuda-nguda ibas jabu si lit ije tua-tua (nondong). Nondong me jadi pengawas pergaulen anak perana singuda-nguda bagepe sinaksiken ranan pedempak tupung  berngi wari sanga ia ercakap-cakap, gelah ula terjadi si la payo ibas ope seh ku perjabun. Emaka Nondong enda labo ia terpedem adi lenga kari singuda-nguda mulih ku jabu. Bage me pe maka "ngerondong" (njumpai nini tudung/nondong) dungna salih jadi kata "ngerondong".

Sumber  : Buku Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.