Tupung ia nunggahken lau meciho e, terutama orang tua, emaka nina : "Enda anakku, inemken lau meciho enda, lau simalem-malem enda, entah kai kal kin gia pusuhndu rembep-embep, pengerana kami ras bapandu, turangndu ras edandu kerina anakku, ngikutken lau simalerlah pusuhndu, rembep-embep nandangi kami, gelah ula kal ndekah ibas rasisen kerna kam mupus anak ipupus", emaka itungkuhkenna.
Kenca bage, biasana ja me kuasa simbelin, tubuh ka danak-danak enda. Adi kune ije pe lenga tubuh, emaka iterusken me ku mamana-mamina, bibi-bengkilana, nonggal-nonggal sitik me kerina nunggahken lau meciho. Emaka arah kejadin enda, jadi me acara purpursage, menek-menek, morah-morah labanci ndekah ibuniken terlebih enda inget tupung reh kebiaren. Adi kalak sidekah kune ndekah ibas rawisen lit nge usur kejadin sibage rupana.
Tole pe ibahan "ercibal belo cawir " notoken ku Dibata gelah pedas min danak-danak enda ngidah wari terang. Kenca e pe langa ka tubuh, idilo me kalak sirebu ras ia, nungkun sura-surana, janah radu ras sie iibereken "tambar ngerawis" rudang gara ras rudang rudang gadung siarang ipereh ibas mangkuk, dingen ibereken inemna launa. Biasana adi enggo ibahan enda kerina tubuh me anakk-anak enda ras banci ngidah wari terang.
Di enggo mejile perdalinen, tubeh me anak i pupusna, minter me salang sai dalan simbelin. Ikataken tole ibas kalak Karo, enca tubuh danak-danak enda, terus ikutken "agina" eme ikataken "pusaf (pusung)"
Jadi ibas tubuh ikutken agina, bagekin keharusen ibas kalak Karo enda, enggo tetap ia ieteh manusia.. Ibas kalak Karo ikataken rusur manusia enda tubuh telu silanglangna eme : lau, jelmana, pusatna. Janah sue ras kesemalen kalak Karo, agina enda tah pe pusat enda, kenca iiket alu benang benalu, ikeret salu sembilu sempul-sempul , ibaba kubas sada ingan, adi nai buen itama iteruh karang ibuniken alu la idah kalak. Adi kune ieteh. mbiar kita itangko kalak ijadikenna jadi pulungen pemeteh. Sada sipenting ibas ngeretapken hubungen ras agina ndai, eme ikataken "nayat pusung" maka pergunaken me sembilu sempul-sempul, ras sangkalenna pe ageng ranting. Em pe sebabna kalak Karo melasken ingan tubuh alu kata "ingan pusung ndabuh".
Kenca tubuh danak-danak enda, mintes isurungi mamina alu belo penurungi silima-lima, perlebe embut-embutna, emaka ujung jari-jari tanna ras ujung jari-jari nahena, jenari kerina kulana isemburi . Tep-tep ingan nemburi enda iembus empat kali, alu toto ras erti kata empat selpat sila mehuli, selpat liah-liah, turah malem ate.
Bage pe adi nai, mintes ka ngenda isungkun "guru simeteh wari telupuluh manisna lima" kerna pertubuh anak enda, sebab rikut kiniteken tupungna, wari tubuh la seri ulina. Kune tubuh ibas ciger wari, nggit kal pagi ngelawan orang tua, apai ka adi tubuh "wari nunda" banci peturah kematen man nande tah bapa (oge turi-turin Pawang Ternalem, ernande 4 berngi, erbapa 8 berngi).
Bagepe adi tubuuh wari merawa mintes kal ilam-lami. Adi gegehen tendina asa tendi bapana, la banci iangkib bapana seh umur sada tahun, ras ikut pe bapana iperidi tupung acara pepitulayoken dingen iuru-uru. Bagepe adi la mehuli warina, perlu icawiri, gelah anak-anak pagin mbelin alu mbugis-mbugis.
Simehulinakel pertubuh enda eme nangdangi terang wari, sabab maba kemalemen ate kal pagi ku sangkep nggeluh, maba lau simalem-malem ia ku wari sireh enda.
Bagepe nandena ipekena-kena, isurungi alu belo penurungi, isuruh man dak-dak, erdumbarat (medem deherken api batu-batu), iban pengeratahi, iakar entah iokup, gelah pedas megegeh maka mulih kesehaten. Anak si mbaru tubuh pe mintes iperidi, isurungi, dingen ibahanka pe tangkal-tangkal niiketken jerango ku tanna, gelah ula nggege begu-begu ku jabu. Rikut biasana tangkal-tangkal ibahanka tole ibas bulung-bulung kalinjuhang, sangke sempilet ras pitu purih pola, niiket alu benang benalu (benang si telu rupa : megara, mbiring, ras megersing), jenari isemburi alu belo penurungi. Tangkal-tangkal enda sada itama ibabo pintun, sada itambatken deher ingan dumbarat guna ijemak nande kune atena ku ture berngi wari.
Tole nari man sinande ibereken ka ambahna purih tonggal guna banci mpelawes begu ganjang kune reh atena nggege, dingen enda tetap ikape seh ku acara erjuma-juma. Kune nande ndarat tupung berngi, emaka arah pintun labah iamburken rara api, enda ilebei sekalak pernanden sienggo sikap maba rara api ndai.
Rikutken adatna, kenca mbelinanak ipupus, adi anak situbuh anak dilaki, minter iampu mamina (sabab ia me pagi jadi anak beru iampu / ipupus). Di kune anak diberu, minter iampu /niembah bibina. Tupung iampu enda me ijemput mamina/bibina beras meciho itamana ku takal danak-danak ndai, nina : " Sirang beras ras lau, maka sirang ernande-erbapa, ermama-ermami, erbibi-erbengkila, rikutpe ras sangkep nggeluh. Piher beras enda ankku, piheren pagi tendindu ibas penjujuri Dibata simada tinuang. Lampas mbelin anakku, bebere mamana/permen bibina, ula mberanginen, lupa ngindet, lupa mbatuk, gelah kam kal pagi jadi kuda dalin, pisau entelap kalimbubu, sekawal ras suruh-suruhen mamandu, jadi persukuten seninandu ras penungkunen anak berundu, ras kerina jelma simbelang enterem enda " Jenari ibuat mamina/bibina belo penurungi, ingatngatna, dingen isemburina embut-embutna (embeh-embehna), niembusina 4 (empat) kali, radu pe totona "selpat liah-liah, selpat sila mehuli, turah kemalemen ate " bage me tep-tep kali iban sangkep nggeluh di kune reh ku jabu ibas nungkir anak simbaru mbelin enda.
Tidak ada komentar:
Posting Komentar
Mohon Tinggalkan Pesan