ERJINE-JINE (PERJABUN / NEREH EMPO) - MINDO PERSENTABIN MAN KALIMBUBU / KESENANGEN ANAK BERU

PMS DAIRI - Sekalak anak perana di kune enggo lit sura-sura njabuken bana nandangi sekalak diberu silabo impalna (la anak mamana), jadi maka orangtua nge si  erbahan perarihen ras anak beru, ndahi jabu kalimbubu singalo ulu emas (simada dareh) guna mindo kata persentabin mindo kesenangen ras pasu-pasu nandangi perdalin  anak ibas atena njabuken bana. Rikutken wari sienggo iban, berkat me sangkep nggeluh radu ras anak perana ndai ku jabu kalimbubu mbaba nakan tasak. Sura-sura maka ope iban kalimbubu siiperdemui  nakan anak beruna, lebenlah kalimbubu simada dareh man nakanna.

Kenca elah man, nungkun ke kalimbubu erkelang-kelang anak beru " Eak... enda kita nggo elah man, idah kami maka enggo ibaba kam nakan ku jabu kalimbubunta, kai  ngenda sura-surandu reh ku jabu enda ?"

Nina  anak beru si reh : "Sura-sura kami  ras kalimbubu, kami reh ku jabu kalimbubunta ibas wari enda, erkiteken enggo  parang anak ibas jabu kalimbubu kami, bekas niembah mamina ndube, emaka adi ku ja gia pagi perdalin geluhna, kerna perjabunna, gelah min kalimbubu masu-masu , gia sekali ibas perjabunna pagi entah la gia beru kalimbubu ibuat kalimbubu kami, sue ras peraten Dibata, meriah min pagi ukur kalimbubu"

Ngaloi Anak Beru, sinidapeti " Bagenda kalimbubu kami, enggo menda isungkun kami  kerehen anak berundu ku jabu enda, enggo me ibahanna turi-turinna kerna beberendu si enggo parang,  di kuja gia perdalinen kegeluhen, meriah min ukur kalimbubu, nina "

Arih me kalimbubu ras sangkepna nggeluh kerna sura-sura anak beruna reh kujabuna, emaka nina erkelang-kelangken anak beruna, "Adi bage kin kerehen sembuyakndu ku jabu enda, enggo mekap teridah sura-surana kerna perdalinen geluhna, kami pe meriah kal ukur kami maka bebere mamana, siniembah mamina ndube pedas min erjabu. Akap kami  pe enggo me masana ia erjabu. Di kuja gia pagin perdalanna ibas ia njabuken bana, simeriahna min ukur kami ku jabu kami nge min ia, maka malem ate kami kalimbubundu.

Tapi kerna peraten Dibata nindu, kami lanai beuh ertogan bicara beru apai pe pagin nibabana, enggo me iakap kami seri ras beru ibas jabu kami. Mejuah-juah anakku, bebere mamana  nerusi perdalinen geluhndu"  Ranan enda ipeseh anak beru kelimbubu man anak beru si reh.

Nina Anak Beru si reh : "Bujur ningkami ibas keriahen ukur kalimbubunta, kami  pe seh nge beratna nahe kami njingkangken bana ku jabu enda, adi la kin beru jabu enda ibuat. Tapi sura-suranta la seri  ras sura-sura si medanak. Mindo kami toto kalimbubu gelah beberendu mehuli geluhna ras sangap ia  ibas perjabunna pagin"

Bagenda me ibahan  kata persentabin man kalimbubu  guna mindo keriahen ukur ibas beberena njabuken bana. Alu bage maka kalimbubu  singalu ulu emas pe meriah ukurna naruhken  beberena ku ranan adat "maba belo selambar" nungkun  kata kalimbubu.

Perlu ka pe iban acara mindo kesenangen ukur  anak beru, adi  anakta diberu. Ipindo keriahen ukur bibina ras bengkilana kerna  perjabun permenna, erkiteken  enggo me lit ukur kalak reh ku jabu kalimbubu guna nungkuni kata keriahen ukur kerna rencana perjabun permenna.

Erbage-bage-bage perjabun ibas kalak Karo (arah Kenjulu sidekah) eme  :

1.  Sungkuni arah rumah.

2.  Baba nangkih.

3.  Ibabaken erjabu (murtas dingding).

4.  Merkat sinuan.

5.  Muat beru singumban/bere puhun.

6.  Lako man

7.  Gancih abu.

8.  Mindo lacina.

9.  Mindo ciken

10.Lampu la banci nimpet.

11.Manuk kabang ku lipo.

12.Kawin roh.

13.Sinuan dilaki siipetangkoken.

Sumber  : Buku Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.