ERBAHAN GELAR - ANAK TUBUH

PMS DAIRI - Kerna erbahan gelar, sanga embah ku lau ndai pe banci. Adi terjaka, maka iban ka ngenda perpulungen, kerna pangan labo jadi ukuren kal. Si jadi ukuren eme kerna  hak ras kewajiben mereken gelar. Adi anak dilaki, mamana me i suruh rukur erbahan gelarna, adi anak diberu, bibina. Saja kesemalen geluh kita kalak Karo, maka erbahan gelar enda arus lit beras  ras tumba,  em sinigelari  " beras padi-padi" . 

I buat beras jenari itama kubas tumba, emaka enggo dat gelar anak dilaki  sinibahan mamana/mamina, anak diberu  sinibahan bibina/bengkilana, emaka reh ranan "Adi kin gelar enda ndai enggo dat kam, cuba dage jemput  beras padi-padi tah padi padi kin kari tah pe sempabu e gelarna ras lang". Kesemalen beras padi-padi enda, alu bilangen "kep" (kep ertina genep).

Emaka  ijemput sibiak mami/bibbi : "Enda enggo iban kami gelar si tongat  si beru enda, adi kep kari beras si ku jemput e sempabu kal nge ia kari mbaba gelar sienda".  Je maka beras sinijemput ndai ibeligai sada-sada, sada..... dua ...... telu ..... empat, kep nina Maka ibas bilangen kep, maka kujapa pe nggenapi tetap pendahinna, la nggandili kujapa pe. 

Lit ka deba, iulih-ulihhi maka kep, ngayak 3 x; bicara ngayak telu kali lenga kep, emaka ningen "tah  labo e serasi gelarna"  Emaka kalak Karo  kenca ga;ang pe lit isambari gelarna, engkai sabab gelar sipemena sinibereken kalimbubu kurang serasi akap ipakena. Kurang serasi enda, ibas ia usur pinakiten, entah  ukurna  la bagi kalak, entah pendahinna la bagi kalak. Adi nai sue ras kineteken maka itotokenna kal ibas pusuhna ras ukurna erbahan  gelar enda,  sebab la kenca payo gelar enda iakap banci mpengaruhi perdalinen geluhnaa.

Adi kin ningen kalimbubu/anak beru  erbahan gelar, la nge berhak bapa - nande erbahan gelar. Tentu berhak, tapi ibas persetujun kalimbubu entah anak beru. Gia nande-bapa si ersura-sura, siteridah berhak mamana / bengkilana.

Adi erdahin perlu ka nge ngadi

Buah duku nanamna entebu

Ijemput kami beras padi-padi

Gelah gelarndu e kari simpabu 

Sumber  : Buku Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.