MERGA SILIMA

 PMS DAIRI – Merga asal kata meherga, artinya adalah penting. Menurut bahasa Sansekert “mrga” artinya dalan, lapang entah curak, Pada suku Karo ada (lima) merga dengan sebutan Merga Silima. Tep-tep merga lit sub merga. 

Adi sada sub merga ia hubungenna ersembuyak tapi lain sub merga, ersenina entah sigamaten. Kalak karo arus nge idaramina biak senina/gamet. 

Guna ngerunggui dahin susah-senang ibas peradaten arus lit kelang-kelang ngerana. Tapi labo ka banci kerina sub merga banci jadi senina ku ranan. Contoh Ginting Suka – biak senina ku rananna Ginting Munte. 

Uruten 5 (lima) merga i Karo rikutken jari silima ibas tanta, eme : Karo-karo (indung-indung), Ginting (tuduh-tuduh), Tarigan (jari tengah), Sembiring (jari manis) ras Perangin-angin (kidel-kidel).

Rikutken orat nggeluh, ikataken arah lebe maka tiap sub merga lit nge biak senina/gametna guna peseh rananna tupung dahin-dahin adat ibas susah/senang gia sekali.

Contoh labo banci ibuat kalak Ginting Suka ibuatna senina kurananna Ginting Suka, tapi  kalak Munte. Biasana la banci seri sub mergana. Emaka ijapa pe kita ringan, arusna min enggo lit ibuat biak seninanta, sembuyakta,, kalimbubunta, puang kalimbubunta, bagepe anak berunta, gelah kune lit dahin-dahinta ula nari mesera ngerungguisa.

Karo enda, enggo pe kita nggeluh ibas kemajun zaman enda, ras ija pa pe kita nggelluh, adi lit dengan merga/beru ibas dirinta  labo kita banci sirang ersangkep nggeluh.

Emaka ku japa pe kita laws tetaplah meherga siban kita alu namaken Merga ras Beru. Ula beneken si meherga ibas dirinta selaku kalak Karo. Ula mela jadi kalak Karo, sebab geluh erpalasken adatna lit ibas ia si mehuli mehamat er-kalimbubu, melias er-senina ras metami er-anak beru.

Sumber  : 1. Buku Adat Karo Sirulo - Tuntunan Praktis Adat Istadat Karo Jjilid 1, Penulis Malek Ukur Ginting, Tahun 2008.  2. Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.