KALIMBUBU (SIMERE BERU) RAKUT SITELU

PMS DAIRI - Kalimbubu si mere ndehara man kalak Karo. Kalak Karo tek maka Kalimbubu enda ulu tuah ras kiniulin, emaka ia isebut Simupus takal piher pate geluh. Kalimbubu asal kata "mbubu" ertina "batok kepala" - (berku takal). Ibas praktekna maka Kalimbubu igolongken kubas 2 (dua) bagin eme  :

      A.   Kalimbubu si seh ku Sukut.

 

1.  Kalimbubu Siperdemui.

 

Ia me Kalimbubu erkiteken orangtua/turang ndehara ibas merga tertentu. Kalimbubu enda pe usur I sebut Kalimbubu Si Erkimbang ntah Kalimbubu Simaba Ose. Ose enda ibaba tupung lit kerja-kerja mbeliin ibas anak beruna, umpamana paksa nurun-nurun. Erkiteken si e kelana / silihna ras turangna, janah bage me seterusna. Rikutken sienda maka kalak Karo karo arus me  ia megermet , emaka arus nge lit seperangkat uis Karo i jabuna, kune lit  dahin anak beruna  enggo sikap man buaten. Tole pe adi kerja-kerja meriah, amak labo banci la ibaba luah sebab ia Kalimbubu Sierkimbang, umpama Mengket Rumah.

 

2.    Kalimbubu Simada Dareh.

 

Emekap Kalimbubu erkiteken ia orangtua / turang ndehara. Kalimbubu enda ibas momen-momen ada sambarken gelarna 

 

a.    Kalimbubu Singalo Ulu Emas

Ibas perjabun beberena si dilaki ia ngalo ulu emas. Ibas ia ngalo enda, lit ka utangna, eme : beras 1 tumba, amak tayangen, uis perembah (uis kapal).

 

b.    Kaliimbubu Singaloo Bere-Bere

Ibas perjabun beberena si diberu ia ngalo Bere-Bere. Erkiteken e lit utangna man beberena, sinikataken luah adat berupa :

 

-Lampu

-Kudin perdakanen

-Belanga

-Pinggan perpanganen (2)

-Cangkir / gelas (2)

-Cerek

-Mangkuk perburihen

-Beras meciho 2 tumba (sada garun)

-Tinaruh manuk

-Bantal (2)

-Manuk asuhen (1) rupana megersing

 

Adi  lit buaten Kalimbubu banci ka ia erjile-jile, emetambahen simanjilenken : tilam (2) bantal (2) ras sidebanna sue ras sura-sura.

 

3.    Kalimbubu Singalo Maneh-Maneh

 

Adi  beberenta ntah turangna mate, enggo cawir metua, lanai lit anakna la erjabu, maka kedudukenna ibas acara nnurun-nurun enda eme Kalimbubu Singalo Maneh-maneh. Emaka ialokenna me maneh-maneh, adi dilaki : baju galang / uis kapal – jongkit ras batuna; adi diberu : uis teba ras batuna.

 

4.    Kalimbubu Singalo Sapu-sapu Iluh.

 

Adi beberena/turangna mate tapi anak-anak si mate lenga keriina erjabu, maka ia ngaloken sapu-sapu iluh / morah-morah.  Adi lenga erjabu / kitik-kitik denga arah wilayah adat orang julu ia ngalo “mengga-mengga” ntah morah-morah. Pengalon lit, emaka utang pe lit. Utangna eme :

 

-dagangen 2 yard (sada puang Kalimbubu Dareh)

-Manuk (1)

-Beras (1) garun (2) tumba.

 

Lit ka kebiasan ibas piga-piga wilayah, manuk enda ras beras enggo Itangger, emaka erpagi-pagi lampas ope berkat ku jambur enggo iberena man anak beruna. Dagangen iendesken ibas paksa enda ibas  ia ngelakoken  acara “penayep”  man si mate. Banci ikataken mereken pergegeh ras pengapul ku anak beru ibas I maba baban mberat).

 

Lit ka wilayah adat dagangen enda ibabana tupung ngerana  i jambur. Situhuna si maba dagangen Kalimbubu dareh ras puang  dareh ngenca. Genduari kerina terpuk sangkep nggeluh seh ku anak beru maba dagangen, enda jile-jjile nge labo adat.

 

Ibas keguluten ulin me tukur dagangaen ndai iperduitken  jadi penampat man si rate ceda; asa ibuang-buang itama ku peti jenari itanemken ku taneh.

 

5.    Kalimbubu Binuang (Bapa)

 

Kalimbubu bapa, eme simada dareh bapa. Ia jadi Kalimbubu (binuang) ras ibas dahin-dahin adat ia ngobah gelar sue fungsina, eme :

 

a.    Kalimbubu Simajek Daliken

 

Kune anak beruna Mengket Rumah Baru, ia isebut Kalimbubu Simajek Daliken. Utang adat siman pesehen man anak beruna, eme :

 

-Daliken ras majekkensa (adi nai)

-Manuk megersing (1)

-Tinaruh (1)

-Beras (1) tumba,

 

b.    Kalimbubu Singalo Perkempun

 

Asum anakku erjabu (sereh) maka Kalimbubu  bapangku jadi Kalimbubu Singalo Perkempun. Lit ka versi  nggelarisa Kalimbubu Perninin. Utang adatna la lit, riah riah ukur.

 

6.    Kalimbubu Bena-Bena (Kampah

 

Ia Kalimbubu arah ninibulangta, simada darehna. Ia usurka i sebut Kalimbubu Bena-Bena.

 

7.    Kalimbubu Tua

 

Lit 3 (telu) erbage eme :

 

a.    Kalimbubu Tua Jabu

Emekab  adi ia enggo rindih-iindih  jadi Kalimbubu, mulai ibas nini opung nari.

b.    Kalimbubu Tua Kesain

Eme keturunen Kalimbubu si nai ikut manteki kesain

c.    Kalimbubu Tua Kuta

 

Kalimbubu enda sinuanken lulang asum manteki kuta, emaka igelari pe ia Kalimbubu simajekken lulang.

 

 

B.   . Kalimbubu Sierkelangken ku Sukut

 

1.    Puang Kalimbubu

Eme Klaimbubu erkiteken Kalimbubunta nari, kata sideban mama nandenta. Rikutken dahin adat ia piga-piga kali ganti gelar, eme :

a.    Kalimbubu Singalo Morah Morah

Adi anak beru menterina mate, ia igelari Kalimbubu Singalo Morah-Morah. Ialokenna uis morah-morah ras batuna. Utang adatna : dagangen mbentar.

 

b.    Kalimbubu Singalo Perkempun

Adi erjabu anak beru minterina (anak beberena) ia ngalo adat Perkempun. Arah Langkat  : Singalo Perninin. Lit uatang adatna eme :

-Beras 1 tumba

-Mangkuk mbentar isi beras + tinaruh (1)

-Amak tayangen (1) + bantal (1)

-Manuk asuhen (1) rupa ku biringna

 

2.    Puang Kalimbubu (soler)

Eme kap Kalimbubu Puang Kalimbubu

 

3.    Puang Kalimbubu erkiteken Sipemeren.

Sumber  : 1. Buku Adat Karo Sirulo - Tuntunan Praktis Adat Istiadat Karo Jjilid 1, Penulis Malek Ukur Ginting, Tahun 2008.  2. Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.