1. Anak Beru Iangkip /ampu. Ia me igelari anak beru iperdemui eme kela, perbulangen anak sidiberu.
2. Anak Beru Dareh / Anak Beru Ipupus / Anak Beru Jabu, eme anak bibinta, anak turangta ras sidebanna. Ntah anak sidilaki sinipupus anak sidiberu, banci ia kempu/bebere.
3. Anak Beru Cekoh Baka. Enggo 2 (dua) kali ia erjabu / ngempoi dirinta. Beberenta (anak beru dareh) iempoina ka anakta.
4. Anak Beru Cekuh Baka Tutup. Enggo 3 (telu) kali ia erturut-turut ngempoi anakta sideburu. Contoh : anak beru cekuh baka empoina ka anakta, ia enggo jadi anak beru cekuh baka tutup. Ia me si banci muka tutup baka Kalimbubu (baka = ingan barang-barangg si meherga) Ia me si ertanggungjawab ibas perlingeten kerja.
5. Anak Beru Tua. Anak Beru Tua ibagi ibas 3 (telu) terpuk, eme :
a. Anak beru Tua Jabu. Eme anak beru mulai ibas nini bulang nari ntah tertuan. Ia jadi anak beru tua jabu erkiteken seri pengidahna kerina kalimbubuna. Ia me si njemak ranan ibas kerina runggu adat (susah/senang) ibas jabu kaliimbubu.
b. Anak Beru Tua Kesain. Eme sada merga si enggo itetaoken jadi anak beru ibas kesain ras kesusurenna pejadi anak beru tua ka. Ia me anak beru si ikut manteki kesain enda.
c. Anak Beru Tua Kuta / Anak Beru Singian Rudang, Eme anak beru si ikut manteki kuta, ia enggo itetapken jadi anak beru tua kuta. Kesusurenna pe tetap jadi anak beru tua kuta., nentuken kerja tahun ras ngaturken acara si lit hubungenna ras keadaan kuta (susah/senang).
B. ANAK BERU Si erkelang ku SUKUT.
Anak beru enda la langsung ku Sukut, tapi erkiteken kade-kade tertentu.
1. Anak Beru Sipemeren
Eme anak beru senina sipemerenta. Dalanna kita er-anak beru man bana perban ia anak beru seninanta sipemeren.
2. Anak Beru Minteri.
Ia me anak beru ibas anak berunta nari. Ibas runggu adat kenca enggo erlayas iban kalimbubuna (anak berunta) emaka i pepinterna siakapna geduk denga.
3. Anak Beru Singukuri (ntah Singikuri)
Ia me anak beru ibas anak beru minteri nari. Adi ibas runggu adat kune enggo dia ipepinter anak beru minteri (kalimbubuna) emaka iukurina alu mbagesgelah reh layasna .
4. Anak Beru Sipejoreken.
Kenca ipejore kalimbubuna anak beru singukuri, emaka ipejorena. Ibas wilayah adat Karo tertentu igelari Anak Beru Pengapit, ertina dahin e ras keputusen e iapitna kerina gelah ula nai mosar.
C. Ibas dahin-dahin peradaten, adi ngalo Klaimbubu/Puang Kalimbubu, anak beru pe ngalo ka, eme :
1. Ibereken Kalimbubu bagina e man anak beru, gelarna simajek lape-lape.
2. Ibas Perjabun : adi erdemu bayu ialokenna perkembaren, adi petuturken ialokenna perseninan, adi ngeranaken ialokenna sabe. Sidiberu ibas anak beru ngaloken "Sirembah Ku Lau"
3. a. Ibas ceda ate (cawir metua/i cawir metuaken) adi dilaki si mate : Anak Beru ngaloken sekin (lit deba wilayah adat piso + garut) adi diberu si mate Ia ngaloken Kampil. Anak Beru Minteri, adi dilaki si mate, ia ngaloken santik/kujam-kuajm, adi si diberu si mate, ia ngaloken tuk-tuk. Adi matecawir metua lembu patungna, anak beru ngalo ikur-ikur, biak kalimbubu ngaloken tulan puturna,
b. Adi Ceda Ate adat sapu-sapu iluh man anak beru, anak beru minteri ngalo Benang Si Telu Rupa berupa sen.
Erkiteken si e nandangi Anak Beruunta, kita arus metami. Metami man anak beru eme sikap sayang, keleng, bagepe "murah hati". Terpuk anak beru eme ngaturken ras ngelaksanaken dingen ndungi tep-tep dahin ras kegiaten peradaten si i lakoken pihak kalimbubu. Anak beru piso entelap, kuda dalan ibas ngaturken tep-tep dahin, ras ngasup mereken kemalemen ate ras pusuh mbergeh man kalimbubu.
Tanggungjawabna man kalimbubu tuhu mberat eme njaga gelar kalimbubu ula sempat ceda/mbau bagi kuan-kuan Karo "ola baba anak beru belacan ku datas uruk", ertina ula pagi sempat si la mehuli ibas jabu kalimbubu imomoken ras ipembarken man kalak si deban. Tole nari anak beru "jadi perkakun kalimbubu" ertina anak beru ertanggungjawab ngkawali kalimbubu, jadi babah kalimbubu, amin gia sekali "erga diri" anak beru arus i korbanken guna njagai erga diri kalimbubu, dingen njamin gelah kalimbubu ula malu itengah-tengah jelme si nterem.
Ibas ndahiken dahinna, anak beru la bo pernah ngukuri untung-rugi man dirina. Usuren ras megatinge guna dahin kalimbubu itadingkenna dahinna guna ngelaksanaken tanggungjawab ndungi masalah sijadi ibas kalimbubu.
Lit kuan-kuanen Karo nina : ate keleng anak beru (erturang) la bias beras iabs busan ibereken, tapi page ibas lebengen pe ikur-kur". Ertina keleng ate anak beru man kalimbubu, adi perlu page si enggo isuanken pe ikur-kur mulihi guna kiniulin ras kemalemen ate man kalimbubu.
Emaka kalimbubu arus nge terbeluh rukur ras arus pentar natap kecibal anak beru ibas kerina dampar keadaan nggeluh, bagi pantun si arah teruh enda :
Man
anak beru kita metami
Mindo
ia ula simbaki
Bas
dahinna la i pandanggi
Kune
salah minter embari
Si la teng-teng iajari
Dahi lakonna ula tanggungi.
Sumber : 1. Buku Adat Karo Sirulo - Tuntunan Praktis Adat Istadat Karo Jjilid 1, Penulis Malek Ukur Ginting, Tahun 2008. 2. Ranan Adat , Orat Nggeluh, Rikut Bicara Kalak Karo, Ope Tubuh Seh Idilo Dibata, Penulis : Pdt. Sada Kata Ginting Suka,M,Th, Tahun 2013.
Tidak ada komentar:
Posting Komentar
Mohon Tinggalkan Pesan